Proverb 13
13
1Enn zanfan saz ekout konsey so papa;
me enn vantar refiz rekonet so erer.
2Bon dimoun rekolte fri so bon parol;
bann malonet touletan swaf laviolans.
3Fer bien atansion ar seki to dir e to pou prezerv to lavi;
seki koz ninport san reflesi, pou zwenn tase.
4Enn dimoun ki pares, so dezir zame abouti.
Fer zefor! Travay dir, e tou to dezir pou realize.
5Dimoun onet deteste mansonz;
move dimoun fer lezot onte ar zot bann insilt.
6Lonette, li enn proteksion pou bann dimoun drwat;
pese bann malfeter amenn zot larwinn.
7Ena ki pena nanye, me zot met dan zar, deklar risar;
Ena ki ena fortinn, me zot fer krwar ki zot vant pe kriy faminn.
8Bann ris servi kas pou protez zot lavi;
me lavi bann pov zame pa menase.
9Enn dimoun drwat, li kouma enn lalimier ki briye for-for;
me enn malfeter, li kouma enn lalanp ki pe tengn.
10Bann arogan nek provok dispit;
me bann ki ekout konsey ena lasazes.
11Larises mal-gagne pa pran letan pou evapore;
me dibien ki ou ramase kouma gout lapli, pou fini par vinn enn rezervwar ki deborde.
12Kan lespwar tom dan dilo, leker fermal;
me kan enn rev realize, leker zwaye.
13Si kikenn rezet enn bon konsey, li ava pey konsekans;
me seki respekte komannman Bondie, li ava gagn rekonpans.
14Lansegnman enn saz, li enn lafontenn ki donn lavi;
li ed twa evit bann piez lamor.
15Bon rezonnman fer twa gagn respe lezot;
bann foser swiv sime perdision.
16Dimoun rezonab reflesi avan azir;
enn vantar fer letalaz so lignorans.
17Mesaze foser amenn maler;
mesaze fidel amenn bon nouvel.
18Si to refiz aprann, to pou res pov e lezot pou mepriz twa;
me si to aksepte koreksion enn profeser, to pou gagn loner.
19Kan enn dimoun realiz so dezir, sa fer li plezir;
me enn grannwar prefer res dan nwar.
20Frekant dimoun saz e to pou vinn saz;
me si to mars ar dimoun bet, to pou gagn problem.
21Maler pourswiv bann peser;
prosperite rekonpans bann fidel.
22Bon dimoun kit leritaz pou tizanfan;
larises bann move dimoun fini dan pos bon dimoun.
23Karo abandone kapav donn malere boukou manze;
me bann inzis prefer les terin anfris.
24Paran ki pa koriz so zanfan pa kontan li;
paran ki kontan so zanfan pa ezite pou koriz li e met li dan bon sime.
25Bon dimoun manze, vant rasazie;
move dimoun plengne, vant grogne.
Currently Selected:
Proverb 13: KMOTPOR
Highlight
Share
Copy
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.
