Proverb 8
8
Lasazes pe lans enn lapel
1Ekoute! Lasazes pe kriye for-for;
disernman pe lev so lavwa.
2Lor bann oter, dan bor sime
lor lakrwaze, lasazes pe diboute.
3Dan lantre lavil,
divan bann laport, li pe kriye:
4“Ekout mwa, tou imin ki lor later;
mo pe lans zot tou enn lapel:
5Zot, bann ti-lespri, aprann gagn disernman;
zot ki ankor bet, aprann vinn intelizan.
6Ouver zorey! Ekoute! Tou seki mo pe dir inportan;
mo pou pronons bann parol sir.
7Dan mo labous, laverite ki koule;
mo lalev deteste tou koze mansonz.
8Mo pe dir zot bann parol laverite;
mo pa koz manti ek mo pa tronp dimounn.
9Bann ki ena lespri trouv mo bann parol kler;
bann ki ena bon konesans trouv mo koze korek.
10Swazir mo bann lansegnman; zot vo plis ki larzan;
swazir osi konesans; li vo plis ki lor pir.
11Mwa, lasazes, mo ena plis valer ki bann bizou;
mo pli presie ki tou seki zot kapav dezire.”
Bann tit lasazes
12Mwa, lasazes, mo viv avek prekosion;
mo devlop konesans atraver boukou refleksion.
13Kan nou respekte LESEGNER, nou deteste lemal.
Mwa, lasazes, mo deteste lorgey ek larogans;
mo pa siport lemal ek mansonz.
14Mo donn bon konsey ek bon rezonnman,
mo ena boukou pwisans ek disernman.
15Gras-a mwa, bann lerwa regne;
gras-a mwa, bann dirizan pas bon lalwa.
16Gras-a mwa, bann dirizan gouverne;
e bann ziz rann bon zizman.
17Mo kontan seki kontan mwa;
e bann ki fer zefor rod mwa, pou trouv mwa.
18Mwa ki donn larises ek loner;
mwa ki donn prosperite ek bann dibien ki dire.
19Kado mo done vo plis ki lor, mem lor ki pli bon kalite;
mo bann don vo boukou plis ki larzan meyer kalite.
20Mo mars lor sime ladrwatir,
lor sime lazistis.
21Mo donn larises seki kontan mwa;
mo ranpli zot kof ar trezor.
Lorizinn lasazes
22 LESEGNER ti kree mwa dan koumansman;
mo premie parmi so bann aksion ki li finn fer, ena bien lontan.
23Depi koumansman, avan mem ki later ti existe,
LESEGNER ti kree mwa.
24Kan mo ti pran nesans, pa ti ankor ena losean;
pa ti ankor ena lasours ek labondans dilo.
25Mo ti la, avan ki ti donn bann montagn zot form;
avan ki ti met bann kolinn anplas.
26Li ti kree mwa avan ki li ti kree later ek bann plantasion;
e avan ki ti ena premie grin lapousier.
27Kan li ti kree lesiel,
kan li ti tras lorizon lor lamer, mo ti la.
28Kan li ti met bann niaz dan lesiel;
kan li ti ouver robine lasours dilo, mo ti la.
29Kan li ti tras frontier lamer, anpes li depas so limit;
kan li ti plas bann fondasion later, mo ti la.
30Mo ti touzour akote li, kouma enn arsitek;
touletan, mo ti fer tou pou fer li plezir;
e so prezans ti donn mwa enn gran lazwa.
31Li enn gran plezir viv dan lemond ki li finn kree;
li enn gran lazwa viv kot bann imin.
Tou seki ekout lasazes pou viv ere
32Aster-la, ekout mwa mo bann zanfan:
bienere zot, ki mars dan mo sime.
33Ekout mo bann konsey;
zame pa rezet bann konsey-la, e zot pou vinn saz.
34Zot bienere, tou dimounn ki ekout mo parol;
seki toulezour divan mo laport,
e seki touletan dan lantre mo lakaz.
35Sa-enn ki aksepte mwa la, li ava viv lontan;
e li ava gagn faver LESEGNER;
36Me dimounn ki rezet mwa, li fer limem dimal;
dimounn ki pa kontan mwa, li kontan lamor.
Currently Selected:
Proverb 8: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
