Proverb 7
7
Lasazes pou protez twa kont ladilter
1Mo zanfan, pa bliye mo parol;
gard mo bann komannman dan fon to leker.
2Si to gard mo bann komannman, to pou viv lontan;
gard mo bann lansegnman kouma to pli gran trezor.
3Gard zot touletan, kouma enn bag dan to ledwa;
grav zot lor lardwaz to leker.
4Pran lasazes kouma to prop ser;
konsider disernman kouma to meyer kamarad.
5Lasazes ek disernman pou protez twa kont bann fam ki amenn move lavi.
Fam adilter ena bann parol dimiel; lasazes ek disernman pou protez twa kont zot.
6Enn fwa, atraver lafnet mo lakaz,
mo pe get deor.
7Mo pe obzerv bann zennzan ale-vini. Zot paret san lexperyans;
parmi, ena enn ti zenes san bonsans.
8Li pas kot enn lakrwaze.
Ayo! Mo trouv li pran sime lakaz enn fam adilter.
9Soley finn kouse, aswar pe vini;
pe fer deplizanpli som.
10Mo trouv enn fam koste ar li;
so labiyman extra sexi; enn sou laont li pena.
11Li koz for-for ek li san pider.
So lipie pa kapav res anplas dan lakaz.
12Timama dan lari, timama kot bazar;
li nek veye dan tou ti kwin lari pou piez bann ti zenes.
13Li may ti-lom-la, li anbras li;
e li dir li avek enn lasirans:
14“Mo ti ena enn sakrifis aksiondegras pou ofer;
mo finn tini mo promes zordi.
Mo ena bon laviann kot mwa#7:14 Kan ti ofer enn sakrifis aksiondegras, enn parti laviann-la ti ofer Bondie. Seki ti ofer sakrifis la ti bizin manz lot parti-la. Li ti bizin manz tou, mem zour, oubien landeme sakrifis-la. Get Levitik 7: 11-17..
15Mo ti pe rod twa partou; to mem ki mo bizin;
aster mo finn trouv twa, mo bien kontan.
16Mo finn prepar mo lili avek enn zoli dra;
mo dra exotik, an-lin ki sorti Lezip.
17Mo finn parfim mo lili,
avek parfin lamir, lalwes ek kanel.
18Vinn ar mwa! Anou dormi ansam ziska gramatin.
Les nou profit sa plezir-la ansam.
19Pa traka twa, mo mari pa la;
li finn al an-vwayaz pou enn long letan.
20Li finn sarye boukou lamone;
li pa pou retourne avan plennlinn.”
21Fam-la reisi met ti-lom dan siro;
li atir li ar so bann parol dou.
22Ti zenes-la nek swiv li deswit;
li ale, kouma enn bef pe al labatwar,
so latet bese koumadir serf pe al rant dan piez,
23ziska ki enn dibwa pwint transpers so lekor.
Li kouma enn zwazo ki pe fons dan file;
li pa kone ki so lavi andanze.
24Aster-la, mo piti, ekout mwa bien;
ekout bien sak parol ki mo pe dir:
25Pa les to leker derape lor so sime,
pa les to lipie egare dan so lale.
26Boukou finn zwenn tase avan twa;
boukou finn trouv lamor, mem si zot ti for.
27Si to rant dan so lakaz, koumadir to finn pas par laport lamor;
li amenn twa direk dan lemond bann mor.
Currently Selected:
Proverb 7: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
