MATAYO 19
19
Intsaahhatimisuú Yesu daanduú talaáka
(Marko 10:1-12)
1Qoomár Yesu muruuwí axweesanto nguwa hhe'eés, iri Galilayár wa tláy ay Yudea, amór gayuú yaaér Yordani. 2Kuri eehár nee boo/oó yaariír, inós giri amoodá' wa hungu/uumiís.
3Yesu kuri i daqáy nee múk Farisayo as kuwa iiari, kuri báy, «Xáy, hee hareerós ngiwa geexay as umuúqo gaaro a hariímáro?»
4Yesu iri oó', «Ahaá, aga soomusi'iikáhe adór tleehharusmoó muu iimír iimu/uungo hhawaata nee /ameeni ngira tleéhh, 5iri oó', ‹Gawaá adoorihe hee baabuúwós nee aayoorós gin geexáy, tiri haragwaaiyá' nee hareerós, nee kuká' tsár tari slaqwtá wák tleehhiit.› 6Gawaá adoorihe inooín a sangw tsareeká, ala a wak. Múk Mungú aa haragaás, hee munguwa paraátl.»
7Nguri bayé', «Ala adór Mose hara'ayaarí ngira haniís a adoomá, tí hee hareerós ngiwa talaákárí haniisi, gari guus?»
8Yesu iri oó', «Mose ina ya/án /ameena kawa gusisiinda' as saga gawdeemaahúng, ala iimír iimu/uungo a adoosingeeká. 9Nee kuungá' nu baw, umuúqo heewo oo hareerós gaa guus, bar aa fuquská, iri duuxún harér hatlae, kwí aa fuquús. Nee heé hareedá' taa guús gaa duux, aa fuquús sleeme.»
10Eeharuuse iri ó', «Kángw hee nee hareerós bar qo adoosíng, a tsiní duuxo bar kaa máy.»
11Yesu giri báy, «Múk axweesantí ilaooharo ga aleesláw, a sleémeerowooká, ala aqo har kudá' taa aleesleemií haniís. 12Asma muu i deer oo duuxo ga aleeslawaaká, asma kuna adoodár tleéhh iimír kuwa laqwaali. Múk hatlá' i deer oo duuxo ga aleeslawaaká asma kuna adoodár tleéhh ar dabér muu. Kooko sleeme duuxo ga máy asma waawuti'iimár doori. Múk intsaahhastí ilaooharo ga aleesláw ngi ilaoohi.»
Yesu na/ii ngiwa tsuúq
(Marko 10:13-16; Luka 18:15-17)
13Aluuwo na/aá ninakw kiri dirósí huúw as dabaawós ngiwa gawaaín i qaasi nee ngiwa aleefirin. Eeharuuse mukdá' na/ii ngaa huuw guri iigahhát. 14Ala Yesu iri oó', «Na/aá ninakw mawaagáy, ni amor'eé' hardihiye', slám mi ila/aamara'. Asma múk adór na/iiká', waawuti'iimár Mungú a tooín.»
15Dabaawós giri gawaaín i qaás, iri quútl didae.
Masoomoó daqaarmo
(Marko 10:17-31; Luka 18:18-30)
16Aluuwo heeko wák ina hardáh dír Yesu, guri báy, «Intsaahhatusámo, gár hhoo' ar ni tleehh a milá as slafíngw alhhe'eesay wásl nguwa slaw?»
17Yesu iri oó', «Asma milá mas hhooeemaá yaahamís dir'eé'. Oo hhoó' a wak. Kuúng bar dahmaá slá' baraá slafiingw, hara'aya na ooheek.»
18Heedaádá' iri oó', «Hara'aya a gaalá?»
Yesu guri báy, «A tí, ‹Hee mu gaasaar, fuqi ma awaar, Gár hee ma fiisaar, Hee mu /aysántí tsataar, 19Baabuúwók nee aayo ilaiwawa/eek, nee Inslaawmoowók slaeek adoodá' kuúng tir kilók sla'.› »
20Masoomoodá' iri oó', «Tisíng sleémeero aga qaro óh, ala gár iga wa /aaruur a male milá?»
21Yesu guri báy, «Barnaxes kuúng a heé ganaá' tlehhitár wa slá', tláw, muruudá' ta koon weeriseek, peésaadá' ka hanís dír narkuute, daqaní aníng ir eehát. Kuúng daqaari'iimarók a gawaá doorií eér.»
22Masoomoodá' /aymuudá' nguwa axaás, iri quútl ar gurhaami, asma inós a ló'wa daqaarmo.
23Yesu eeharuuseerós gari báy, «Án a kah, ka gawit daqaarmo iwa dahi baraá waawuti'iimár doori. 24Slám nu malé baw, ka inslaahh angamía iwa waarahh ar baraá fooxár laqwa, ta daqaarmo iwa baraá waawuti'iimár Mungií dahi.»
25Eeharuuse adoodá' ngiwa axás, iri waa/ó/ ló'wa ale, iri ó', «Barqo adoosíng ala heé ba/ám a heemá?»
26Yesu eeharuuse gari i qaytsiít gari báy, «Dír muko adoosíng i ya/aandaaká, ala dír Munguhe umuúqo gaaro i ya/aán.»
27Petro iri oó', «Qaytsiít, xáy atén mura' sleémeero ugwa geexawaán, kuúng uri eeharaán, gár atén ta slawaan a milá?»
28Yesu giri báy, «Án a kah, kuungaásingá' aníng iga eehade', baraá yaamuudá' /aben, kudá' Garmoó Hee iwa iwiiti gawaá kitangwduú xirfuuwós, kuungá' sleeme a iwitá' baraá kiteeriidá' mibaá nee tsár, tlahhi'iidá' mibaá nee tsár awa múk Israeli kiri sakwasleemutá'. 29Slám malé alé umuúqo heewo oo do'ós gwa geexay, laqaá qaymo, laqaá hhiya', laqaá hho'o, laqaá baabá, laqaá aayo, laqaá na/ii, as aníng, muruuwí sleémeero gu sagaáwa tsiiru wa ilaoh, nee slafíngw alhhe'eesay wásl guri aal. 30Ala baraá kudá' geeraá hara'a, awa yaariir i alií ki/iyá', nee kudá' alaá hará', ta geerií waaraahh.»
Currently Selected:
MATAYO 19: IRQW
Highlight
Share
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
