MATAYO 18
18
Heé ak úr a heemá?
(Marko 9:33-37; Luka 9:46-48)
1Qoomaadae eeharuuse Yesu guna i daqeér guri beér, «Heé úr baraá waawuti'iimár dooriiwo a heemá?»
2Yesu na/oó wák guri ateét, guri tla/angw'ín i huúw, 3iri oó', «Án a kah, kuungá' barnaxes a warqeera'aaká tari adór na/ii tleehhitá', a baloó data'aaká baraá waawuti'iimár dooriiwo. 4Heé úr baraá waawuti'iimár dooriiwo an kudá' taa kilós niinawees adór na/aywí wa ale. 5Hee bar na/oó wák oo adór kwí gwa ilaóh ar umuueé', a aníng ina ilaóh.»
Muruú múk gee/asliím baraá tlakweema
(Marko 9:42-48; Luka 17:1-2)
6«Ala heé na/oó wák baraá na/iiká' ninakwe, kuká' án iga haratlinti'ii'i, gwa baraá tlakweemií gee/aasl, gár kus hhoó' a tlaa/ár ur ar xoosliingw kan gawaá istós i tseek, kway /aytiis baraá iltá tlawi. 7Múk baraaká' yaamu, a tsaxwaaín, asma muruú yaariír i deer oo múk gee/asliím baraá tlakweema. Muruuwí inqo tawó deer, ala heedaádá' ngu huwaahuúw, a tsaxwaawós.
8«Bar dakók kuúng u baraá tlakweemií gee/aslín, laqaá yaaeerók, tsateek, amór saaw ti kwahh. A tsiní slafiingw kuwa sleer dakók tawa wak, laqaá yaae, ta tawa dabaá koonda, laqaá ya'a', turi kwaahh baraá asltá baloó gwaa'aaká. 9Barnaxes iltók kuúng u baraá tlakweemií gee/asliín, tu/eek, amór saaw ti kwahh. A tsiní slafiingw kuwa sleer tawa heé ila wák, ta tawa ilaawók koonda tsaraawo, turi kwaahh baraá asltá baloó gwaa'aaká.»
Slaqsoó bee/ír aa qwat
(Luka 15:3-7)
10«Ti harmagahhe', tam oo wák baraá na/iiká' ninakwe mu waaqaa'ara'. Asma án a kah, malayker'ín umuú baalaaro gawaá dooriiwo i dír geeraá Baabuúeé', kuduú gawaá doorí dirí'. [ 11Asma Garmoó Hee nina hardáh as tidá' aa qwat ngiwa ba/amisi.]
12«Xáy, barnaxes hee bee/ángw tsiiru gu kón, nee bee/ír wák iri qwát, bee/angwdá' mibeeri gwaleél nee gwaleél gu geexaykáhe gawaá tlooma, iri tláy as bee/idá' aa qwat ngiwa leelehhtuú ay? 13Barnaxes ngaa sláy, án a kah, bee/idá' ga saqwalaalaa/ ta bee/angwdá' mibeeri gwaleél nee gwaleele oo aa qwaariiká. 14Sleeme tam Baabuúhúng kudá' gawaá doorí dirií', ga slaiiká tam heé wák iwa qwaari baraá kuká' ninakwe.»
Hhiyaawók bura sadakuús, adór ta laq?
15«Hhiyaawók kuúng bura sadakuús, tláw gurbueek, kuúng nee inós kiloohúng. Kuúng bura iiárií qaás, hhiyaawók ugwa sleér. 16Ala bar kuúng ugwa iiárií qaasiiká, tláw nee heé wák ti malé koonde', laqaá múk tsár, as umuúqo axweesanto ka tsati ar afér lamabu'uusér tsár laqaá tám. 17Nee inooín barnaxes gaa malé iiárií qaasiiká, haratlintaauuse xu'utiseek. Nee haratlintaauuse barnaxes gaa malé iiárií qaasiiká, heé adoosíng diroge masók a adór heé xoordaá hatlá' nee heé koódír ohaahiím.»
Tseegamo nee gweermo
18«Án a kah, umuúqo gaaro ar taa tsegé' baraakaá' yaamuwo, gawaá dooriiwo kaa tseék sleeme. Nee umuúqo gaaro ar taa gwedé' baraakaá' yaamuwo, gawaá dooriiwo sleeme kaa gweér.
19«Slám án a kah barnaxes múk tsár baraá tla/angwhunge taa al'axweés baraakaá yaamuwo baraá umuúqo gár ta firina, kingi haniis nee Baabuúeé' kuduú gawaá doori. 20Asma dír múk tsár laqaá tám i dirii'i, barnaxes taa burumburiít ar baraá umuueé', aníng a baraá tla/angw'ín i dirií'.»
Slaqsoó lawaalmoó gurtleemuú koomaaká
21Aluudae Petro iri daqáy amór Yesu guri báy, «Aáko, hhiyaaeé' án bir sadakumiis, ngu gurtlaatlaw a sagaáwa magá'? Tam ay sagaáwa faánqwe?»
22Yesu iri oó', «Aníng a ooaaká tam ay sagaáwa faanqw, ala an oo', tam faanqw sagaáwa mibeeri faanqw. 23Gawaá adoorihe waawuti'iimár doori a slaqamís nee waawutmooko wák oo faarór muruuwós gaa slaa' dír lawaaleerós. 24Qoomár Faaro ngiwa iimu/ún, kuna heekwií huúw oo ta shiliingír kumér kúm iinuusi. 25Heewí gár daqaarmoowós ngur bui iwa kahh, daqaarmo iri oó', ‹Inós weerisaak, nee hareerose nee na/iiwo nee umuúqo gár i kona, as iinaadá' kawa bui.› 26Lawaalmoodá' iri dír geeraá daqaarmoodií tumbarara'aát, guri harhheehhe'eemiís guri báy, ‹Aáko, qiítl gár niinawe, án muruuwók sleémeero ngu buú'.› 27Daqaarmoodá' guruuwós iri tláy, lawaalmoodá' guri gweér, iinaadá' gari gurtláy.
28«Ala lawaalmoodá' iwa didá' wa tláy, lawaalmooko nee inós al gadiyumamiisá' guri ár, oo iinaarós koóm ar shiliíngi tsiiruú wák. Guri óh, guri tsaweér, guri báy, ‹Iinar'eé' ay dír ngi bu' laarí.› 29Iinusmoowós kudá' iri tumbarara'aát geeraawós i alé, guri harhheehhe'eemiís iri oó', ‹Gám qiítl gár niinawe, án iinaarók sleémeero ngi buú'.› 30Ala inós kangwdá' gwa ya/aniká, guri tseegár áy, ay dír iinaadá' ngi bui. 31Lawaalér hatlá' kaangwí nguwa aán, tari ló'wa gurhaamuút, kaangwí sleémeero kway ooár áy dír daqaarmooín kudá'. 32Daqaarmo lawaalmoodá' aáng aa gurtláy, guri ateét guri báy, ‹Kuúng a lawaalmoó tlaákw. Án kuúng iwa harhheehhe'és iinar'eé' sleémeero ar ta koon ana gurtláw. 33Ahaá kuúng daxta a hariindaakáhe iinusmoowók kuwa gurtleer, adoodá' án kuúng ura gurtláw?› 34Daqaarmoodá' iri buúhh, guri huúw dír múk gu slahh'eemiís ay dír iinaadá' sleémeero ngi faaki bu'utuuwo.»
35Yesu iri oó', «Adoorí an adór Baabuúeé' oo gawaá doori kuungá' nu laqi, barnaxes umuúqo heewo hhiyaawós gu gurtlatlayká ar muunuú ló'.»
Currently Selected:
MATAYO 18: IRQW
Highlight
Share
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
