MATAYO 17

Kaloó Yesu iwa warqáy

(Marko 9:2-13; Luka 9:28-36)

1Alaá deelo lahhoó' iwa waaráhh, Yesu Petro nee Yakobo nee hhiyaawós Yohane giri ar tláy ay gawaá tloomár tleer kilooín ale. 2Kalaywós iri geeraaín wa warqáy. Gitsee/awós niri gwa/aatiyé' adór tsee/amá. Inqwaruuwós iri ló'wa /awkuukúy, iri mirarií/. 3Inooín kiri harati'iít nee Mose nee Eliya. Yesu nee Mose nee Eliya tari axweés. 4Petro Yesu gway báy, «Atén tawa diirí wa hootaan ka hhoóeéke? Isleeraá tám ngi diirí tleéhh. Kooko a kók, nee kooko oo Mose, kuquú Eliya.»

5Qoomár tawa axweesi, huunkír /awaak gina mahhtír i tléhh. Afo nina baraá huunkidá' wa ilawáts i kat, «Kwí a Garmaaeé', sla'aarusmooeé' oo aníng iga qwal/atis. Inós iiárií qaasaak.»

6Eeharuuse afoodá' ngiwa axás, iri ló'wa da'ayút, iri yaamií slar/amít. 7Yesu nay hardáh giri kwatmiít, iri oó', «Tlawaaré', ma da'ayumitaara'.» 8Tawa qaytsiít, heé ta ara'ari naxés i kaahh, aqo har Yesu kilós.

9Qoomár niwa gawaá tloomár wa awdiitiya', Yesu eeharuuseerós gari báy, «Kaangwí taa aandé' mu baloó heé bawaara' ay dír Garmoó Hee ni baraá gi'i wa waaslee/i.»

10Eeharuuseerós guri yaahás guri beér, «Ahaá, intsaahhatuusér hara'ayár Mose mis kat, ‹Eliya gár kuwa hariím aqo nin geerií hardah.› »

11Yesu giri báy, «Ar ló', Eliya nin geerií hardah. Nee inós sleémeero gari amohhe'ees. 12Ala án kuungá' nu baw, Eliya naa qaroó hardáh, aqo muu inós guna tsaahhiiká. Ala inooín tidá' taa slaá' tleehhamooro, kana dirósií tleéhh. Inooín sleeme Garmoó Hee ngun adoodá' wa slahh'eemisiyá'.»

13Qoomaadae eeharuuse gari tsáhh adór kángw aa dir'ín i káh tar kángw Yohanedá' Baatimaamiís.

Yesu garmoó neetlaame aa eér nguwa hungu/uús

(Marko 9:14-29; Luka 9:37-43a)

14Tindiwa hardáh dír boo/aay, heeko wák Yesu guri i daqáy, guri i tumbarara'aát, 15iri oó', «Aáko, garmaaeé' gurtlawang, asma inós i /araarán, nee ku ló'wa slahh'eemaamiis. Umuúqo daqto i huuhuaaín baraá asla nee baraá ma'aay. 16Una huúw dír eeharuuseerók, ala inooín hungu/uusaro kwa aleeslayká.»

17Yesu iri oó', «Kuungaásingá' qartá haratlintaao wasl, nee ar aa qwat. Án nee kuungá' ta alhotaatimaan ay xaylá? Án kuungá' nu alqiqtlaatliim ay xaylá? Na/aay amor'eé' huwaare'.» 18Yesu neetlaame gari iigahhaát, neetlaameedá' na/aay guri geexeér. Na/aydá' iri hunguú/ siiwadár kilae.

19Eeharuuse Yesu guri i daqeér qoomár inós tawa kilós, guri beér, «Ahaá, atén neetlaameedá' masa harslaaqataán duuxaro?»

20Yesu iri oó', «Asma haratlintaaorhúng ka /aár. Án a kah, haratlintaaór har qoomoó ilmoó haradaáli bar koondá', a aleesleerá' tloomarí kawa beera', ‹Quútl diirihe, tláw amorqá',› alók geera tidá' taa oé' i tleehharút. Tam /aymuú ta harslaaqata' tleehhamooro i kaahh. [ 21Ala neetlaamér adoorí gár duuxaro ga aleeslaw i káhh, aqo har firo nee gwaawito.]»

Yesu gwa'araarós ngiwa malé geerií oó'

(Marko 9:30-32; Luka 9:43b-45)

22Qoomár sleémeero tawa baraá Galilayárií dirii'i, Yesu eeharuuseerós gari báy, «Garmoó Hee daxta ku qaas baraá dabaá muu, 23nee kuri gaas, ala bál tame kuri waaslee/atis.»

Eeharuuse adoorí ngiwa axás iri ló'wa gurhaamút.

Ohmér Doó Mungú kawa buú'

24Tawa Kapernaúmúrií hardáh, mukdá' ohmér Doó Mungú ohiím Petro kuri i daqáy, kuri báy, «Intsaahhatusmoowók ohmér Doó Mungú ga hanmaamisiikáhe?»

25Petro iri oó', «Ga hanmaamiis.» Petro iwa baraá dó' i dáh, dír ira gaa ooiiká, Yesu guri geerií yaahaás, guri báy, «A adoomá Símon, waawituú baraaká' yaamu koódi ngiwa ohin, laqaá ohme, dír ngiwa ohin a dír muu gaalá? A dír na/ii'íne, laqaá a dír dahaaye?»

26Petro iri oó', «A dír dahaaye.»

Yesu iri oó', «Ala bar adoosíng, na/ii ki amohhoo'. 27Ala atén ohomuuseerí buhhtisaro a sla'aanaaká. Gawaá adoorihe kuúng tláw, baratsufi kwahheek baraá tlawi, siyoódá' ni geerií hardáh ooheek. Nee afkós bura waatlés, shilingmo uqo aán. Daqaní ku húp, ku hanís ohmér wa ale as daanduueé' nee kók.»

Currently Selected:

MATAYO 17: IRQW

Highlight

Copy