LUKA 10

Yesu eeharuuseedá' mibeeri faanqw nee tsár ngiwa ya/aáw

1Aluuwo Aako eeharuusér hatlá' mibeeri faanqw nee tsár#10:1 Mibeeri faanqw nee tsár: Baraá gooír Yunaniro bahh'alé gár taa gooín a mibeeri faanqw. gana tsawaár. Giri ya/aáw tiwa tsádér wa koomakona', tawa girin dirose, umuúqo didá' inós i keemuú wa slai, baraá gixsadu nee amór hatlae. 2Giri báy, «Bu'uungw ku yaariír, ala múk gadiyuús ku niiná. Gimsé', heé qaymo loó' firiimaak, múk gadiyeé ngu huwi baraá bu'uungós. 3Tlawsé', án kuungá' nun adór deeloó bee/ángw wa ya/aáw, baraá tla/ángw tawer. 4Peésa ma tlin'ír huwaara', laqaá tlakwi'i, laqaá ya/ata', loohiro hee mu taaqwesara'. 5Doó ti data'a ta geerií oa', ‹Wayda doohúng ngu ay.› 6Heé wayda gu koóm bir deer, wayduuhúng gu áy. Bir kaahh, wayduuhúng ni amorhúng i kii/. 7Ta baraá do'dá' wa hotá', muruú /aymár dooín ku /agá' nee ta wahaandá'. Asma heé gadiyuús i harín bu'utuwo. Ma maraá hatlá' i lolohiimara'. 8Umuúqo gixsár ti data'a burtunda ilaóh, muruú /aymár tinda geeraahúng i qaás ku /agá', 9tiqtuusér dáw ka hungu/uumisá', muu ku beera', ‹Waawuti'iimár Mungú naa tseewuúr.› 10Ala umuúqo gixsár ti data'a ar tunduwa ilaohiiká, ta ti'itá'. Baraá luhuuwose bar hi'iitá', ta oa', 11‹Tam teerír baraá gixsarhúng ar ya'aarén gaa leer, ngi kuukuuaán amorhúng i alé. Ala tí xuaak, waawuti'iimár Mungú naa tseewuúr.› 12Án a kah, deelór alhhe'eesoó yaamuwo, a tsiní múk gixsár Sodoma sakwasleemar'ín ngiwa ilií oohi, ta gixsarihe.»

Gurbu'úngw gixsadaá naa hhu'u'un'iiká

(Mat 11:20-24)

13«Kiíng gixsár Korasini, nee kiíng gixsár Bet-saida, a tsaxwaahúng. Asma muruudá' xuawaslén aa tleehharuut dirhunge, geera dír iwa tleehharuút bar an baraá Tiro nee Sidoni, geera iimirihe naa qaroó hhu'u'uné', nee guniyadu kay tsiít, tay iwiít baraá da/ara. 14Bál deelór sakwasleemaro a tsiní múk Tiro nee Sidoni, sakwasleemar'ín ngiwa ilií oohiya', ta kuungane. 15Nee kiíng gixsár Kapernaumu, xáy ti tsa/aási ay gawaá doori? Aasla'áy, tin /aytiis ay baraá gi'i.»

16Yesu eeharuuseerós gari báy, «Heé axweesantahúng gaa ya/an, a axweesante'eé' gana ya/án. Heé kuungá' naa sii', a án ina sií'. Oo aníng iga sii', a kudá' án iga ya/aaw guna sií'.»

Ki/imaá kudá' mibeeraá faanqw

17Kudá' mibeeraá faanqw nina ki/iyé' ar qwala/, ta kaahi, «Aáko, tam neetlaame sleeme tina ilaiwawá/ as kuúng.»

18Yesu giri báy, «Án Neetlaangw ugwa ár, i gawaá doorí wa /e/eetín adór mankari. 19Ga/aawaagáy, aleesleemu nguna haniís oo dayshe nee xiiraawe kiwa adarata', nee /uuruú kuduú wakusmo kuwa arba/a, tam gár kuungá' nu aw i káhh. 20Ala ma qwalaala/aara' as adoodá' neetlaame nuwa ilaiwaawa/. Ala na qwalaala/é' as umerhúng kawa gooín gawaá dooriiwo.»

Bar/uú Yesu

(Mat 11:25-27; 13:16-17)

21Hamtidár kilae Yesu kuri qwal/aás nee Qeeruú hhoohhoó' oo Mungú, iri oó', «Án kuúng un sluufiís, Baabá, Aakoó doori nee yaamu, asma muruuwí ugwa laqaandiiká dír múk dahareemaá koóm nee fuquraangw, ala una laqaán dír na/aá ninakw. Eeít, Baabá, asma an adoodá' kuúng kara slá'.»

22Iri oó', «Umuú gaaro kinga dabaaeén i qaás nee Baabuúeé'. Ala heé Garma gu xuú' i kaahh, aqo har Baabá kilós. Slám heé Baabá gu xuú' i kaahh, aqo har Garma kilós, nee kudaádá' Garma xu'utisaro aa slaá'.»

23Yesu iri amór eeharuuseerósíi warqáy, inooín kilooín giri i axweés, giri báy, «Múk amohhoó' a kudá' tí kuungá' taa aandé' gaa ar. 24Án a kah, aaruusér yaariir nee waawitá tí kuungá' ta ga/eera', arto kana slaá', ala kaa ariiká. Nee tí kuungá' ta axamisa' axaasaro kana slaá', kari axaasiiká.»

Slaqsoó heé hhoó' oo Samaria

25Aluuwo intsaahhatusmooko hara'ayár Mose ina sihhiít, Yesu guri yaahaás ar iiara, iri oó', «Intsaahhatusámo, adór ni laaq a adoomá ar slafíngw alhhe'eesay wásl ngur aal?»

26Yesu guri báy, «Gár taa gooín a milá baraá kitaábuú hara'ayaaro? Kawa soomús, mi kát?»

27Intsaahhatusmooduú hara'ayár Mose iri oó', «Ar taa gooín a tí, ‹Aakoó Munguúwók slaeek ar muunaáwók sleémeero, nee ar qeeruuwók sleémeero, nee ar /uuruuwók sleémeero, nee ar fuquraangók sleémeero›, nee ‹Inslaawmoowók slaeek adoodá' kuúng tir kilók sla'.› »

28Yesu guri báy, «Tisíng i qoón. Bar adoosíng aga tléhh daqaní slafíngw alhhe'eesay wásl u sleér.»

29Ala heedá' tina kilós gan'amií harafaár, iri Yésú yaahaás, «Ahaá, inslaawmooeé' a heemá?»

30Yesu iri oó', «Heeko wák nina Yerusalémú wa aweér, i Yeríkór káy. Kuri óh nee fisuuse. Kway tlaba' hingeés, kway muúx, gwa'ara ngiwa nakaá/ kway geexáy. 31Naxés kaahamusmooko Mungú gitsee/awo nina aweér ar loohidá'. Heedaádá' nguwa ár, iri bihhií paásl. 32Nee heeko tlahhoó Laáwi aa malé didaádií hardah, nguwa ár, aqo ina paásl sleeme. 33Ala heeko Samaria oo aausmo, didaádá' heedaádií dirii'i ngiwa áy, nguwa ár, guruuwós iri tláy. 34Iri tseewúy dír heedaádá' taa muúx, inkaahhi'iiwós giri tseék, giri di/tár sliík, nee difaái. Guri gawaá daanduú daqwaywós i tsa/aás, guri huúw ay dír doó dahaaye, guri amohhe'eemiís. 35Looaytleérós shiliíngír tsár gay heeduú doó dahaayeérí haniís. Iri oó', ‹Heewí amohhe'eemiseek, nee gár aa waarahh shiliíngirí tsare, án birna kií/ ngi buú'.›

36«Xáy, bar kuunge, baraá mukwí tame, inslaawmoó heedaádá' fisuuse aa ót a heemá?»

37Iri oó', «A kudá' gwa gurtlay.»

Yesu intsaahhatusmooduú hara'ayár Mose gway báy, «Gím tláw daxta, kuúng sleeme adoodá' na tleehheek.»

Yesu iwa dír doó Marta nee Maria káy

38Tawa hi'iiti, ina hardáh dír yaamuukaari. /Ameenirka umuuwós ta bay Marta, guri dír do'ós i dahi'ís. 39Inós i hho'ór koón, umuuwós a Maria. Maria ina iwít dír Aako, as axweesantós ngiwa axamis. 40Ala Marta ina daawiimít gadiyér yaariire. Iri dír Yésú ii daqeér, guri beér, «Aáko, adoorí ka hhoóe kuunge, hho'or'eé' gadiyeé sleémeero ngiwa aníngií meér. Ádbaweegáy, anií alee/is.»

41Aako gari báy, «Márta, Márta, kiíng an daawiimít nee an amoqwaqadiín asma muruú yaariír. 42Ala gár slahhaa' a wak kilós. Maria gár hhoo' gana tsawát, tidá' ta baloó hingeesiiká dirose.»

Currently Selected:

LUKA 10: IRQW

Highlight

Copy