YOHANE 19

1Yesu kurir tláy nee Pilato, kuri muúx ar qaw'i. 2Nee askaári slamángw laqaya' guri tlaatláp, guri qás gawaá ságw Yesu. Guri tsiitís ar inqwaarír sirdaa/aat. 3Kuna i tseewúy, kuri taaqweemiís ta kaahi, «Laawaay, Waawutmoó múk Yahudi.» Kuri tlaaqarma' muúx.

4Pilato iri malé ti'iít tsee/ií alé, giri báy, «Heewí ngu tsee/ií huúw amorhúng i alé, as án kuungá' nuwa xu'utis adór aníng dakuúsár heewí ngus sakwasleemuut ngir ara'araaká.» 5Yesu niri tsee/ií ti'iít, slamángw laqaya' ngwa dahaás, nee inqwaaridá' siirdaa/aat ngaa tsiít. Pilato iri oó', «Heewí ga/aawaak.»

6Qoomár kaahamuusér uren ar Mungú nee xuumuuseero adoodá' kawa ár, tari tseeamín ta kaahi, «Kikiieek, kikiieek.»

Pilato giri báy, «Kuungá' kilá' ar tlawaak, kikiiaak, asma aníng gár heewí ngus sakwasleemuut a ara'araaká.»

7Múk Yahudi iri oó', «Atén hara'aya a koomaán. Hara'ayaarihe inós gár kuwa hariím a gwa'ara, asma inós i kaahi, ‹Aníng a Garmoó Mungú.› »

8Pilato adoodá' ngiwa axaás, dae guri ak eér. 9Iri malé dáh baraá boómár ur, Yesu guri báy, «Kuúng amór ta dahh a amá?»

Ala Yesu aa ilawatsiiká. 10Pilato iri oó', «Ni ilawatskáhe? A xuakáhe aníng adór nir aleesleemuú koóm oo uwa gweer. Slám a aleesleemuú koóm oo uwa kikii'.»

11Yesu iri oó', «Kuúng aleesleemuú ta koon daanduueene i kaahh bar geera Mungú ngwa kuúng i haniisiiká. Ala heé aníng iga dabaawók i qaas, tlakweemaawós ki ak ur.»

12Gawaá adoorihe Pilato loohi gari leelehhiít ar Yesu ngur gweeri. Ala múk Yahudi tari tsimaahhuús ta kaahi, «Kwí bura gwét, kuúng a mulqumoó waawutmoó múk Romarooká. Heé ti waawutmo tlehhiít, i waawuti'iimár waawutmoó múk Romár waaqaaqaa'.»

13Pilato axweesantí ngiwa axaás, Yesu ngway tsee/aá i huúw. Pilato iri iwiít gawaá kitángw sakwasleema, didár ta bay Tlaa/ár Tlambaraáhh (tsifrír Ebraniaro ka babay Gabata). 14Siiwadá' a looár lahhoó' ar tlaatla/aangw ar baalaadár amohhe'eemisuú Pasaáká, nee looaytleérós a deelór Pasaáka. Pilato múk Yahudi guri báy, «Ga/aawaak, Waawutmoohúng.»

15Inooín tari tseeamín, «Hingeeseek! Hingeeseek! Kikiieek!»

Pilato iri oó', «Waawutmoohúng un kikiía?»

Kaahamuusér uren ar Mungú iri ó', «Atén waawutmoó hatlá' u koomanaaká, aqo har waawutmoó múk Roma kilós.»

16Aluuwo Pilato Yesu guri duúx amor'ín, asma inooín kuwa kikii'i.

Yesu kuwa kikií' gawaá msalaába

(Mat 27:32-44; Marko 15:21-32; Luka 23:26-43)

Inooín Yesu nguri huwiyé'. 17Yesu iri ti'iít, i msalaábarós loohiis, ay dír ta bay «Fartá saga» (tsifrír Ebraniaro ka bay Golgota). 18Didá' kawa áy, kuri kikií' gawaá msalaába. Múk tsár oo hatlá' kway kikií', kooko bihhaaqá' kuqá' bihhaaqá', nee Yesu i tla/ángw i dirii'. 19Pilato slambaree/i gari gooín gari qaás gawaá msalaába. Gár taa gawaadí gooín a tí, «Yesú Nasareti, Waawutmoó múk Yahudi.»

20Múk Yahudi oo yaariír /aymi'iiká' gina soomuús, asma didá' Yesu kway kikií' ka tseew dír gixsa. Nee /aymi'iidá' kina gooín ar tsifrír Ebrania nee ar Latini nee ar Griki. 21Kaahamuusér uren ar Mungú Pilato kuri báy, «/Aymi'iisíng, ‹Waawutmoó Muk Yahudi› mi adoosír gooiimaar. Ala adoorí tir gooiin ‹Heewí ina oó', Aníng a Waawutmoó múk Yahudi.› »

22Pilato iri oó', «Gár án naa gooiím, aga gooiím.»

23Qoomár askaári Yesu nguwa hhe'és kikiiaro, tlabaawós kiri qasmiís bohhu tsiyáhh, umuúqo askaarmo boohharós gay sláy. Inqwaarirós sleeme kana hayóh. Inqwaaridá' a inqwaarír taa tleéhh ar adór hiyaay ar hirit wasl. 24Askaári iri kilooín axwés iwa kat, «Hiyaay u feehhisaanaaká. Ala un tsawdoórí tleehhaán, áx heé gu sláw a heemá.» Adoorí ina tleehharút asma Gooi iwa bo/, tidá' kah,

«Tlabaaeé' kina qasmiís baraá tla/angw'ín wa ale.

Nee hiyay'eé' kuna tsawdoórí tleéhh.»

An adoodár askaáridá' aa tléhh.

25Didár msalaábaro aayór Yesu aa didí sihhít, nee hho'oorós nee Maria, harér Kleopa, nee Maria Magdalene. 26Yesu aayoorós gari ár, nee eeharusmoodá' aa slaá', i sihhimiit, ku didí tseéw. Yesu aayoorós gari báy, «Aáyo, garmaawók ga/aaweek.»

27Aluuwo iri malé oó' dír eeharusmoodá', «Aayoorók ga/aaweek.» Iimír qoomaadár kilae eeharusmoodá' aayór Yesu garir waátl iwa hot dír do'ós wa ale.

Gwa'arár Yesu

(Mat 27:45-56; Marko 15:33-41; Luka 23:44-49)

28Qoomár Yesu ngiwa tsaáhh adór umuú gaaro ira tleehharút, iri oó', «Aga waxiít.» Adoorí gana oó' as Gooi iwa bo/.

29Nee didaádae xooslmo i deer oo difaáír qarqaár koóm warqamooko kuri difaáidá' qarqaárár tikiís, kuri siíhh gawaá daaír hisoópo. Warqamoodá' kuri afkú Yésúr kwatiít. 30Yesu difaáidá' qarqaar ngiwa sláy, iri oó', «Aa hhooeér.»

Saga guri xupu'uús, muunaáwós iri /eét.

Yesu kuwa bihhi muút

31Ala múk Yahudi Pilato guri firín as ya'aá mukdá' taa kiki'ín kiwa geqay, nee kiwa hingeesi gawaá misalabaduuwo. Adoorí kana slaá' tleehhamooro, asma a baalár amohhe'eemis, nee looár tlaw tawa deelór Sabaáto. Inooín kaa slaiiká tu'u iwa iwiwiitiya' gawaá misalabaduú wa ale deelór Sabaátoro. Asma deeloodár Sabaáto a deelór ló'wa ur. 32Askaári iri didií hardát, heedá' nee Yesu taa al kikií', guri ya'a' giqeér, nee heedaáduú tsár sleeme. 33Ala tawa hardáh dír Yesu, ya'aawós kaa giqayká, asma kuna tsaáhh adór ira qaroó gwaá'. 34Askaarmoó wák bihhaá Yesu giri muút ar lawala, nee hamtidár kilae tseere nay ti'ít nee ma'aay. 35Kudá' tí gaa ar, gana lamabu'ún, as kuungá' sleeme kawa haratlintia'. Lamabu'uungós oo ló'. Inós ga xuu' adór kaangwí i kaahi tar ló'. 36Kaangwí ina tleehharút as Gooi iwa bo/, tidá' kah, «Tam fartós ar ta geeqay i káhh.» 37Slám Gooi i malé kat, «Heedaádá' inooín naa mutiyé' ngu i qaytsitiyá'.»

Foolár Yesu

(Mat 27:57-61; Marko 15:42-47; Luka 23:50-56)

38Yosefú Arimatayár daáhh a eeharusmoó Yesu, ala taa geehhoeesiiká, asma inós in múk Yahudír da'ayumiit. Inós Pilato guna firín as slaqwtá Yesu ngiwa hingeesi gawaá msalaábaro, nee Pilato iri ya/án. Yosefu iri tláy, slaqwtá Yesu gari hingeés gawaadá' wa ale. 39Nikodemu nee Yosefu tina alkoné'. Inós an kudá' aáng Yesu gwaa i daqay xweerá alé. Inós aleedoogír mooyángw manemane nee udi guna huúw, har qoomoó kílo mibeeri kooán. 40Inooín slaqwtá Yesu kari untsuús ar inqwaarír taa tleéhh ar kitaáni dinkwa nee mooyangwdá'. Adoorí an adór múk Yahudi i tlehhahhiti bar ta tuaá foliit. 41Didaádá' Yesu kway kikii'i asalmo i deer. Nee baraá asalmoodaádae baa'ár /aben i deer, ar taa baloó heéwí qaasiiká. 42Slaqwtá Yesu kari baraá baa'adií qaás, asma baa'adá' ka didií tseew, slám looár tlaw a deelór Sabaáto ar múk Yahudi.

Currently Selected:

YOHANE 19: IRQW

Highlight

Copy