YOHANE 18

Yesu kuwa óh

(Mat 26:47-56; Marko 14:43-50; Luka 22:47-53)

1Yesu axweesanaywós nguwa hhe'eés, iri ti'iít nee eeharuuseerós ay gayuú yaaér Kedroni. Didaádae asalmo i deer. Yesu nee eeharuuseerós tari baraadií dáh. 2Nee Yuda, kudá' gu saki/itá wa slaá', didaádá' ga xuu', asma Yesu i didaádá' kaakáy daqtá yaariire nee eeharuuseerós. 3Múk Farisayo nee kaahamuusér uren ar Mungú, askaári kana haniís dír Yuda, nee sagadiyuusér Doó Mungú sleeme. Yuda girir dáh baraá asalmoodá', inooín ta tsaa'asoó kón nee xooslár slaqwara. 4Ala Yesu tidá' sleémeero gu slaw ga xuu', giri harahi'iít, giri yaahaás, «Heé ta leelehhita' a heemá?»

5Tari oó', «A Yesuú Nasareti.»

Yesu iri oó', «An aníng.»

Yuda, kudá' Yesu gwa sakii/, aa sihhiít dinkwa nee mukdá' ngwa oohár ay. 6Yesu qoomár ngiwa báy, «An aníng», tari alií kií/, tari huuhu'ún yaamií alé. 7Yesu giri malé yaahaás, «Heé ta leelehhita' a heemá?»

Tari oó', «A Yesú Nasareti.»

8Yesu iri oó', «Nuna qaroó báw, a aníng. Ala bar aníng in leelehhitá', kuká' mawaak, i quutliye'.» 9/Aymi'iiká' gina káh as /aymuuwí iwa boo/i, kudá' aa geerií oó', «Baabá, baraá kudá' sleémeero naa hanisi, oo aa qwaar i kaahh tumu wák.»

10Ala Simon Petro i paángár kón. Paángarós gari duúx baraá qawaywo, lawaalmoó kaahamusmoó úr oo Mungú guri iiár doó /iyáy tsaát. Nee lawaalmoodá' umuuwós a Malko. 11Ala Yesu Petro guri báy, «Paángarók ki/iseek. Slahh'eemisuú#18:11 Slahh'eemisuú: Baraá tsifrír Grikiro gár taa gooín a xooslmo. Baabá naa aníng i haniís, aníng adór ngur maw sleemuuwo?»

Yesu kuna huúw amór Anasi

12Askaáridá' nee geeraharusmooín nee sagadiyuuseedár múk Yahudi Yesu kuri óh, kuri tseék, 13kuri ala huúw ay dír Anasi. Asma Anasi a taatoó harér Kayafa. Nee Kayafa a kaahamusmoó úr oo Mungú kurkudae. 14Nee inós a kudaádá' múk Yahudi gwa bay, a tsiní heé wák iwa gwaai as daanduú muu sleémeero.

Petro Yesu nguwa satlaánk

(Mat 26:69-70; Marko 14:66-68; Luka 22:55-57)

15Simon Petro nee eeharusmoó hatlá' Yesu kuri eehár. Nee eeharusmooduú hatlá' nee kaahamusmoó úr oo Mungú ti xuiyá'. Gawaá adoorihe nee Yesu tari aldáh ay baraá afeenír doó kaahamusmoó úr oo Mungú. 16Ala Petro iri sihhiít tsee/aá wa ale dír afeenidae. Ala eeharusmooduú hatlá', kudá' nee kaahamusmoó úr oo Mungú ti xuá', iri ti'iít, iri axweés nee dasiidá' afkú doó ga/aw, as Petro nguwa baraá afeenírí dahaasi, nguri dahaás. 17Dasiidá' afkú doó ga/aw, Petro guri beér, «Kuúng a eeharusmoó wák oo heewíheéke?»

Inós iri oó', «A aningeeká.»

18Qoomaadae lawaale nee xuumuuse asla kaa oohiís, asma tsaaqwa i deer, nee ta sihhimiit didár asltá wa ale, ta asltá axwaaneemiis. Petro sleeme iri sihhiít bihhi'ín i alé, iri axwaaneés.

Kaahamusmoó úr oo Mungú iwa Yésú yaahamiisi

(Mat 26:59-66; Marko 14:55-64; Luka 22:66-71)

19Kaahamusmoó úr oo Mungú Yesu guri yaahamiís daanduú eeharuuseerós nee intsaahhatimisuuwose. 20Yesu iri oó', «Aníng ana axweemaamiís dír geeraá muu sleémeero daqisleém. Dír án niwa intsaahhatimaamiis a baraá maraá saaliingw nee baraá Doó Mungú, dír múk Yahudi sleémeero iwa burumburimaamiti. Gár naa axweés ar sufa i káhh. 21Ala aníng mihar yaahamisá'. Kudá' án iga axamiisiye' yaahamiisaak gár án naa axweés a milá. Inooín ka xuu'.»

22Yesu adoorí ooaro ngiwa hhe'eés, xuumusmooko wák oo didá' wa sihhmiít, Yesu guri tlaaqarmo slaáhh, iri oó', «Kaahamusmoó úr oo Mungú mus qítl adoosíng beemuuwo?»

23Yesu iri oó', «Gár tlaakw ar naa oó' barnaxes i deer, tlakweemaasíng laqaamang. Ala barnaxes looeema ina oó', gár isa sláhh a milá?»

24Aluuwo Yesu kuri huúw ar píngu nee Anasi amór Kayafa, kaahamusmoó úr oo Mungú.

Petro Yesu nguwa malé satlaánk

(Mat 26:71-75; Marko 14:69-72; Luka 22:58-62)

25Qoomaadae Simon Petro i sihhimiit i axwaneemisi. Múk hatlá' didaádae iri oó', «Kuúng a eeharusmoó wák oo heedáeéke?»

Ala Petro iri tlaánk iri oó', «A aningeeká.»

26Lawaalmoó wák oo kaahamusmoó úr oo Mungú a mar'afmoó heedá' Petro aa iia tsaát. Inós iri oó' dír Petro, «Ahaá, aníng kuúng ugwa áriíke, tawa baraá asalmoó i dir'a' nee inós?»

27Petro iri malé tlaánk, nee hamtidár kilae konkomo iri uú'.

Yesu kuwa huúw dír geeraá Pilato

(Mat 27:1-2, 11-14; Marko 15:1-5; Luka 23:1-5)

28Yesu kurir tláy dír doó Kayafá wa ale, ay boómár ur. Nee qoomaadá' a matlaatlér boo/. Ala múk Yahudi aa dahiiká baraá boómár úr i alé, as tawa meetin, mikiwa ilaá/ muruú /aymár Pasaáka /aymaaro. 29Pilato giri harati'iít tsee/aá i alé, giri báy, «Gár heewí kuwa sakwasleemuta' a milá?»

30Tari oó', «Bira dakuusiiká geera ngu huwaanaaká amoorók.»

31Pilato giri báy, «Gimsé', kuungá' ar tlawaak, sakwasleemuutaak ar hara'ayarhúng.»

Múk Yahudi tari oó', «Atén ya/aám a koomaanaaká ar hee kuwa gaasaan.» 32Tí ina tleehharút as /aymuudá' Yesu aa oó' iwa boo/i. Asma inós loohír ir gwaai gaa geerií oó'.

33Pilato iri malé dáh baraá boomár úr i alé. Yesu guri ateét guri yaahaás, «Kuúng a waawutmoó múk Yahudíro?»

34Yesu iri oó', «Yaahasasíng amór i dahh a amoorók kilóge, laqaá múk hatlá' kangw'eé' nguna dirók i káh?»

35Pilato iri oó', «Aníng a heé Yahudíro? Xooroorók ar kilá' nee kaahamuusér uren ar Mungú kuúng una huwiyé' amor'eé' alé. Gár taa tléhh a milá?»

36Yesu iri oó', «Waawuti'iimar'eé' ar baraaká' yaamuuwooká. Waawuti'iimar'eé' geera bar ar baraaká' yaamu, eeharuuser'eé' geera án iga aleesláqw, aníng mitiwa haniís amór múk Yahudi. Ala waawuti'iimar'eé' ar baraaká' yaamuuwooká.»

37Pilato guri yaahaás, «Ala kuúng a waawutmoówoóke?»

Yesu guri báy, «Kuúng an kát adór aníng tar waawutmo. Aníng gár tisa laqwaál nee gár nisa hardáh baraaká' yaamií alé, a tí kilós, ‹Kángw looeema nguwa kah. Umuúqo heewo oo bartá looeema, axweesante'eé' ga axamiis.› »

38Pilato guri báy, «Looeema a milá?»

Sakwasleemár gwa'ara

(Mat 27:15-31; Marko 15:6-20; Luka 23:13-25)

Inós /aymuuwí yaahaasaro nguwa hhe'eés, iri malé ti'iít amór múk Yahudi, iri oó', «Aníng gár heewí ngus sakwasleemuut a ara'araaká. 39Kuungá' a xuá' baraá tlehhemi'iihunge, adór aníng heé wák ngur gwedadiit dirhúng i alé, bál deelór Pasaáka bira xeér. Ala a sla'á'a waawutmoó múk Yahudi nguwa gweer?»

40Sleémeero tari tseeamín ta kaahi, «A kwisingeeká. Baraba na gweerang.» Ala Baraba a fisusmo.

Currently Selected:

YOHANE 18: IRQW

Highlight

Copy