YOHANE 12

Yesu kuwa Betaniár wa sliík ar mooyaangw

(Mat 26:6-13; Marko 14:3-9)

1Bál Pasaákuwo deelór aa met tawa lahhoó', Yesu iri hardáh amór Betania, amoodá' Lasaro i dirii'i. Inós a kudá' taa waaslee/atís baraá múk aa qaátl wa ale. 2Yesu kuri deelór úr i tleéhh amoodá' wa ale. Marta guri sagadiyús, nee Lasaro a heé wák dír mukdá' aa dír muruú /aymár i iwiiti. 3Maria mooyángw ta babay nardo guri taatáhh, oo har qoomoó tlaqtá kílo. Ku hhohhó', slám tlaxoorós ka ló'wa ur. Ya'aá Yesu giri slík, giri fíts ar se'éngw sagós. Nee do'da' iri haáts mooyangwdae. 4Ala Yuda Iskarioti, kudá' wák baraá eeharuusér Yesuwo, inós an kudá' Yesu gu sakií/. Inós iri oó', 5«Ahaá, mooyaangwí mus kwa weerisiiká ar shiliíngi tsiire tám, nee shiliíngirí kari liitlakuusér i haniis?» 6Inós adoorí gaa ooiiká as liitlakuuse ngiwa gurtláy, ala asma inós tawa fisusmo. Nee inós a heé tlakwayduú peésa gu amohhe'eemamiís. Inós peésaadá' ta baraadií qamaamin gan fisaasín.

7Yesu iri oó', «Maweek, ngi qas ay bál deelór foolar'eé'. 8Asma liitlakuuse umuú daqto nee kuungá' a dinkwa, ala aníng nee kuungá' a dinkwaarooká umuú daqto.»

Ta loohír leelehhiit ar Lasaro kur gaasi

9Múk yaariír oo Yahudi kaangw nguwa sláy adór Yesu ir amoodá' i dirií', tari hardáh. Ala gár nisa hardihiyé' a Yesu kiloseeká, ala as Lasaroodá' Yesu aa waasle/atís baraá múk aa qaátl wa ale nguwa ariya' sleeme. 10Gawaá adoorihe kaahamuusér uren ar Mungú tari al'axweés as Lasaro sleeme kuwa gaasi. 11Asma múk Yahudi oo yaariír tina paraátl nee inooín asma Lasaro, Yesu kuri haratlintií'.

Yesu iwa bar/úr dáh Yerusalemu

(Mat 21:1-11; Marko 11:1-11; Luka 19:28-40)

12Bál tsár múk yaariír nina hardáh as deelór ur. Kari axaás adór Yesu nir hardáh baraá gixsár Yerusalemu. 13Haleemaá slaansla kiri taataáhh, tari tsee/ií ti'iít as kuwa al'ay. Tari tsimahhuús ar afór ur, ta kaahi,

«Hosana, i xirfuuti kudá' hardáh ar umuú Aako,

Waawutmoó múk Israeli.»

14Yesu gwarendmoó daqwaay ngwa i tsa/án, adoodá' kara gooín,

15«Múk gixsár Siyoni, ma da'ayumiitaara',

Qaytsité', waawutmoohúng naa hardáh,

aa tsa/án gawaá daanduú gwarendmoó daqwaay.»

16Hargeeraawo muruuwí eeharuuseerós gwa tsahhiká. Ala Yesu kuwa xirfayeés, kari insláy adór muruuwí kura daanduuwósí gooín, nee adór ira tleehharuút.

17Mukdaádá' dáw bál Yesu Lasaro nguwa ateét baraá /aantár wa ale, nguri waasle/atís, kaangwí kuna alki/iít dír muu. 18An gár Yesu kusa al'áy nee múk yaariír, asma kángw layaadá' aa tleéhh kuna axaás. 19Múk Farisayo tari kilooín axweés, tawa kaahi, «Aga aandí'iíke, gár kuungá' ta aleesleera' i káhh. Qaytsiité', muu sleémeero gwa eehár.»

Múk Yunani i Yesú artá wa slaa'

20Mukko Yunani i deer baraá tla/ángw mukdá' aa sluufmisuú ay, bál deeloodá' ure. 21Mukwí ina hardáh dír Filipo, heé gixsár Bet-saida ar yaamaá Galilaya, kuri báy, «Aáko, atén Yesu u artá wa sla'aán.»

22Filipo iri hardáh dír Andrea, kaangwí guri oó'. Andrea nee Filipo Yesu kuri ádbáy. 23Yesu inooín giri báy, «Siiwa aa xeér ar Garmoó Hee kuwa xirfayeesi. 24Án a kah, ilmoó angaáno bira huuiiká baraá hhapér i alé, iri gwaa', aqo in hootatín adoodá' i dirii'i kilós alé. Ala bira gwaá', mamaá yaariir gin laqwaal.

25Heé slafiingós gu slaá', gu qwaarees, nee heé slafiingós gu aáhh baraá yaamuukaákae, gu ba/amis tam ay slafíngw alhhe'eesay wásl. 26Aníng hee bir sagadiyuus, i eehari. Daqaní didaádá' aníng ni diriia, an didá' sagadiyusmooeé' sleeme i dirii'i. Slám aníng hee bir sagadiyuus, heewí ku ilaiwawaa/ nee Baabá.»

Yesu i gwa'araarós alki/iit

27«Muunaáeé' daxta aa amoqwaár. Aníng hám ma oó'? An oóa, ‹Baabá, án ba/amisáng baraá siiwarihe.› Ala adoorí a ooaaká, asma gaarí an gár siiwarí ngisa i hardáh. 28Baabá, kuúng umuuwók xirfayeeseek.»

Aluuwo afo niri gawaá doorií wa ilaawáts, ar kah, «Ugwa xirfayeés, nee hám u malé xirfayeés.»

29Boo/aydá' didá' wa sihhimiít, adoodá' ngiwa axaás, tari oó', «Kududuhaay i deer.» Bahh'alé tari oó', «Malaykamo nee inós nina axweesiyé'.»

30Yesu iri oó', «Afoorí naa hardatká as aníng, ala as kuungá'. 31Daxta sakwasleemár múk baraaká' yaamu naa xeér. Hám heedá' úr oo yaamuuká' ku tsee/ií kwaahh. 32Aníng birta gáwtí tleés, muu sleémeero u amor'eé' uuruúx.» 33Adoorí gana axweés as ngiwa laqan adór inós ir gwaai a adoomá.

34Boo/aay iri oó', «Atén gár naa axasaán baraá hara'ayaaro Kristo in slafaafín ay alhhe'eesay wasle. Nee ala kuúng mas kat, Garmoó Hee gár kuwa hariím a gáwtí tleesa? Garmaawí oo Hee a heemá?»

35Yesu iri oó', «Qoomár niinawe gwa/aateema i kumiitiyá' iwa gwa/aatiya' dirhunge. Hi'iimité' ar baraá gwa/aateemaaká', giwti munduwa ót. Asma hee bir baraá giwtír wa hi'iimiit, amór i kay ga xuiiká. 36Qoomaarí gwa/aateema kiwa koonda', gwa/aateemaaká' haratlintiaak, as tawa múk gwa/aateemaaká' tleehhita'.»

Múk Yahudi Yesu gwa haratlinti'iiká

Yesu adoorí gari oó', iri tláy, iri nahhaatár áy, as mukuwa ár. 37Yesu tam layaá yaariir gaa tlehhahhiiti geeraaín wa ale, ala kwa haratlinti'iiká. 38Asma /aymuudá' aarusmo Isaya aa oó' iwa boo/i, kudá' iwa káh,

«Aáko, heé axweesanayrén gwa haratlintii' a heemá?

Nee /uuruú Aako heé kway laqán a heemá?»

39Gawaá adoorihe ngwa haratlinti'iiká, asma aarusmo Isaya ina malé oó',

40«Ilaaín gaa taampúy,

nee muner'ín gaa gawdeés,

as makawa ár ar ilaaín,

nee makawa tsaáhh ar muner'ín,

tari hhu'u'ún, án ngiri hungu/uús.»

41Axweesanaywí aarusmo Isaya guna oó', asma inós xirfuú Yesu guna ár, nee kangós guri axweés.

42Ala tam adoorihe baraá mukdá' urene múk yaariír i deer oo Yesu gwa haratlintii'. Ala mukwí taa laqaniká, asma múk Farisayo, as mikiwa baynitís dír doó saaliingo. 43Asma inooín gár ta slai a muu gin xirfayeemiis ta ak Mungú ngiwa xirfayeesi.

Axweesantá Yesu hee gu sakwasleemút

44Yesu iri tseé' ar afór ur, iri oó', «Hee bar aníng iga haratlintií', heé aa haratlintií' a aningeeká, ala a kudá' aníng iga ya/aaw guna haratlintií'. 45Nee kudá' aníng i ga/áw, heé i ga/ay a aningeeká, ala a kudá' aníng iga ya/aaw gun ga/áy. 46Aníng nina baraá yaamií hardáh, as niwa gwa/aateemaá yaamu tleehhiit, asma kudá' aníng iga haratlintii' miwa baraá giwtír wa hoót. 47Hee bar axweesanay'eé' gwa axaás, ala gwa oohiiká, aníng u sakwasleemuutaaká. Asma aníng naa hardihiiká as muu nguwa sakwasleemuut, gár nisa hardáh a muu nguwa ba/amis. 48Hee bar aníng iga sií', nee bar axweesanay'eé' gwa ya/aniká, heewí heé gu sakwasleemuút i deer. Axweesantí hám naa axweés, gun sakwasleemút bál deelór alhhe'eesaywo. 49Asma aníng aga axweesiiká ar sla'aarir'eé' kilós. Ala Baabuúdá' aníng iga ya/aaw, inósuú kilá' ina hara'ayín daanduú tidá' ni ooa nee tidá' ni axweesa. 50Nee aníng a xuú' adór hara'ayaarós tar slafíngw alhhe'eesay wásl. Gawaá adoorihe axweesantá án ni axwees, a tidá' Baabá aníng iga báy.»

Currently Selected:

YOHANE 12: IRQW

Highlight

Copy