YOHANE 11

Gwa'arár Lasaro

1Heeko wák i tiiq, umuuwós a Lasaro. Inós a heé gixsár Betania, gixsadá' Maria i hot, nee hho'oorós Marta. 2Maria tidá' ya'aá Aako gaa slik ar di/tá mooyángw koom, giri fíts ar se'éngw sagós. Hhiyaawós Lasaro i tiiq. 3Hhaeedá' niri ya/abiné' amór Yesu, kuri báy, «Aáko, mulqumoowók i tiiq.»

4Ala qoomár Yesu kaangwí nguwa axaás, iri oó', «Tiqtisíng ar gwa'araarooká, ala as xirfuú Mungú, as Garmoó Mungú iwa xurfuuti ar tiqtisíng.»

5Yesu Marta nee hho'oorós nee Lasaro gina ló'wa slaá'. 6Yesu ngiwa axaás adór Lasaro ir tiíq, iri amoodií tlaatla/iít deelo tsare. 7Aluudaádae eeharuuseerós gari báy, «Qwalaasé', a malé Yudéár kawaán.»

8Eeharuuse iri ó', «Intsaahhatusámo, lata'aángár /aben múk Yahudi una loohi leelehhiít as tuwa tlaquuti ar tlaa/e. Slám a amoodá' i kí/a?»

9Yesu iri oó', «Ahaá, looár tlaatla/aangw a mibaá nee tsáreéke? Hee bir hi'imiit tlaatla/aango dukutsmo gu tuuiiká. Asma gwa/aateemaá yaamu gi ga/áy. 10Ala bir hi'imiit xweeraawo, dukutsmo gu tuu', asma gwa/aateemaá baraawós i kahhiyá'.» 11Yesu alaá axweesanaywí nguwa he'eés ooaro, iri oó', «Mulqumoorén Lasaro aa guú', nee án hamí a amoodá' káw as nguwa tleesár aw.»

12Eeharuuse iri ó', «Aáko, bar ina guú', ahaá ala i hunguú/iíke?»

13Yesu kángw aa káh a daanduú gwa'ara, ala inooín ka xui, kángw i kaahi a daanduú gu'ute. 14Yesu kaangwí guri gwa/atís, iri oó', «Lasaro aa gwaá'. 15Aníng a qwalalaá/ as kuungá', asma qoomaadae a amoodá' i diriiaaká. As kahhó' kuungá' tawa haratlintia'. Ala gusé' amoorós.»

16Tomas, kudá' ta babay Daangamo, iri oó' dír eeharuusér hatlá', «Qwalaasé', atén sleeme a daqawán, as tawa alqatlaan nee inós.»

Yesu a waasle/ nee slafiingw

17Baalaadá' Yesu iwa hardáh, Lasaro kwa qaroó foól deelo tsiyáhh aa waaráhh. 18Betania ka tseew dír Yerusalemuro adór kilomiíta tám. 19Nee múk yaariír oo Yahudi tinda hardáh dír Marta nee Maria, as kiwa gurkwa/amisi as hhiyaaín iwa gwaá'.

20Marta ngiwa axás adór Yesu ir laweé', guri al'eér. Ala Maria i dó' wa iwiwít. 21Marta Yesu guri beér, «Aáko, kuúng geera bar diirí dirí', hhiyaaeé' geera alók aa gwaaiiká. 22Ala tam hamí a xuú' adór umuúqo gár ta dír Mungú i firiinda, Mungú ngi haniis.»

23Yesu iri oó', «Hhiyaawók i waaslee/.»

24Marta iri ó', «A xuú' adór ir waasleé/ baraá waasle/uwo bál deelór alhhe'eesaywo.»

25Yesu gari báy, «Aníng an waasle/ nee slafiingw. Heé aníng iga haratlintii', tim i gwaai, inós i slaaf. 26Nee kudá' slaáf, nee aníng iri haratlintii', inós i baloó gwaaiiká ay slafíngw alhhe'eesay wásl. Xáy, tí aga haratlintí'i?»

27Marta iri ó', «Eeít, Aáko, aníng aga haratlintií' adór kuúng tar Kristo, Garmoó Mungú, kudá' baraá yaamií hardáh.»

Yesu iwa /aa/amín

28Marta adoorí ooaro ngiwa hhe'és, iri amór dó' i kí/, hho'oorós Maria gari bihhií atét, iri ó', «Intsaahhatusmo naa hardáh, kiíng i ateetín.» 29Maria adoorí ngiwa axás, iri tleér ar gaanslaay, iri hardát amór Yesu. 30Nee Yesu qoomaadae aa hardihiiká baraá gixsadá', i didaádá' i kaahh, didár Marta ngway al'eér. 31Múk Yahudi, kudá' nee Maria al'iwiwitá' dír dó' wa ale as gurkwa/amis, kawa ár adór Maria ira tleér ar gaanslaay, tari ti'iít, kari aluú wa eehár. Inooín geera ka xui in /aa/aá eér amór /aanta.

32Maria iwa hardát didá' Yesu i dirii'i, nee qoomár nguwa aán, iri tumbarara'át dír ya'aá Yesu, iri ó', «Aáko, kuúng geera bar diirí dirí', hhiyaaeé' geera alók aa gwaaiiká.»

33Yesu Maria ngiwa ár iwa /aa/amiin, nee mukduú Yahudi nee inós ti alkoomá' i /aa/amín sleeme, guruuwós iri tláy, muunaáwós iri amoqwaár, 34iri oó', «Dír kway qasé' a diimá?»

Tari oó', «Aáko, qwaláng areek.»

35Yesu iri /aá/. 36Múk Yahudi iri oó', «Qaytsité' adór ngura slaá'.»

37Bahh'alé ta kaahi, «Kwí bar taampa gana ila' qaytsitís, ala gwa'arár heewí ila/aro geera gaa aleeslaykáhe?»

Lasaro kuwa waaslee/atís

38Yesu iri amoqwaqwadín malé alé baraá muunaáwose, iri hardáh ay dír /aanta. /Aantadá' kaa baraá guruú tlaa/ár i foól, nee tlaa/ár hatlá' kari afkudí qaás. 39Yesu iri oó', «Tlaa/a hingeesaak.»

Marta, hho'ór heedaádá' aa gwaa', iri ó', «Aáko, aa tsutsuú', asma aa hoót baraá /aantár wa ale deelo tsiyáhh.»

40Yesu iri oó', «Án kiíng iga báwiíke, bara haratlintí', xirfuú Mungú u aán.» 41Tlaa/adá' kari hingeés. Yesu iri gáwtí qaytsiít, iri oó', «Baabá, án kuúng un sluufiís, asma án kuúng iga iiárií qás. 42Aníng aga xuú' adór kuúng ir iiárií qamaamiín umuú deelooro. Ala tí aníng gár ngisa oó', a as boo/aywí oo muu, kwí diirí dirií', kawa haratlinti'i adór án kuúng ira ya/áp.» 43Yesu adoorí ooaro ngiwa hhe'eés, iri tseé' ar afór ur, «Lasáro, ti'iitáng.» 44Inósuudá' aa gwaa' niri ti'iít, kwaa untsuús ar inqwaruú tuua, iimír ya'aá wa ale ay daba', nee gitse/awós kaa tseék ar warqamo. Yesu iri oó', «Gweeraak, i tlay.»

Ta loohír leelehhiit ar Yesu kur oohi

(Mat 26:1-5; Marko 14:1-2; Luka 22:1-2)

45Múk Yahudi oo yaariír oo naa hardah amór Maria, adoodá' Yesu aa tleéhh kawa ár, kuri haratlintií'. 46Ala múk Yahudi bahh'alé tari tláy amór múk Farisayo, adoodá' Yesu aa tleéhh kari alki/iít. 47Kaahamuusér uren ar Mungú nee múk Farisayo, mukduú doó kwasleemár ur kuri ateét tari oó', «Adór heewí ku laqaan a adoomá? Asma heewí layaá yaariir gi tlehhiit. 48Nee atén bura tawó mawaán, muu sleémeero gu haratlintii'. Nee múk Roma niri hardah, doorén kwí oo Doó Mungú kuri fee/, nee xooroorén kari waawuti'iima hayoh.»

49Heeko wák baraá tla/angw'ine, umuuwós a Kayafa, inós a kaahamusmoó úr oo Mungú kurkudae, ina oó', «Kuungá' gár ta baloó xua' i káhh, 50slám a aldakuta'aaká adór ir hariín heé wák iwa gwaai as daanduú muu, asma xooro sleémeero miwa qwát.» 51Kayafa /aymuuwí inós kilós gwa ooiiká. Ala inós kurkudae a kaahamusmoó úr oo Mungú. Gawaá adoorihe axweesantós tí a aari adór Yesu ir gwaá' as daanduú xooroorí. 52Ala as xooroorí kiloseeká. Nee tam as mukdá' Mungú gu haratlintií' baraá xoorduuwo nguwa burumburi as tawa wák tleehhiti.

53Iimír baldá' adór Yesu kur gaasi kari al'axweés. 54Gawaá adoorihe Yesu aa hi'imiitiiká malé alé ar geehhoeema baraá tla/ángw múk Yahudiro. Iri quútl amoodae, iri tláy bihhaá xaanxaay, ay dír gixsarka ta bay Efraimu, iri amoodá' wa hoót nee eeharuuseerose.

55Deelór ur ar Pasaáka ar múk Yahudi deeloodae aa naká/, nee múk yaariír niri tlatláy ayaaín wa ale, tari tsa/án Yerusalemu, qoomár deeloodár Pasaáka iwa xeeriiká, as tiwa hheehhe'eesiya'. 56Inooín Yesu kuri leelehhiít. Tawa baraá Doó Mungú wa sihhimiiti, tiri yaahamisiyé' tawa kaahi, «Xayshé', a adoomá, i hardihiikáhe baraá deeloorí ure?» 57Qoomaarihe kaahamuusér uren ar Mungú, nee múk Farisayo, hara'aya kaa qaroó oó', tawa kaahi, ‹Bar hee ngu xuu' dír i dirii'i, kaangw ngu huwi as kuwa oohár ay.»

Currently Selected:

YOHANE 11: IRQW

Highlight

Copy