IIMU/UUNGW 35

Yakobo kuwa tsuúq

1Munguú Yakobo guri báy, «Tláw, tsa/ám ay yaamaá Beteli, ta amoodá' wa hót. Nee amoodaádae aníng ir kitángw ilahhooárí tléhh. Aníng a Mungú kudá' ugwa i ti'iit qoomár Esau hhiyaawók kuwa ilaagóp.»

2Yakobo múk do'ós sleémeero nee kudá' nee inós alhootá' giri báy, «Munguiidá' ta koonda' hingeesaak, ti hheehhe'ese', nee tlabaahúng warqesaagáy. 3A tlawaán a tsa/amán amór Beteli, aníng Mungú nguri kitángw ilahhooár tleéhh, inósuudá' aníng iga axaas, qoomár slahh'amaayer'eene, nee tari dinkwa nee aníng baraá loohi sleémeero ar naa oohi.» 4Inooín munguiidá' ta haratlintaati'i ngiri Yakobo i haniisiyé'. Nee saaqaanduú baraá iaaín i diriia, Yakobo giri tiíp dír gamuú ti'ita, iisaapoó gixsár Shekemu.

5Yakobo nee daaqaywós qoomár niwa aa'aá kaya', Mungú yaamuloouuse nee inslaaway'ine giri dae tsaát, tari qiitliiká daaqoó Yakobo eeharto. 6Naagáy Yakobo iri hardáh Lusu, gixsadá' ta bay Beteli, tidár baraá yaamaá Kana'ani, inós nee mukdá' sleémeero ti al koomá'. 7Kitángw ilahhooa guri tleéhh. Didaádá' gari báy El-beteli.#35:7 El-Beteli: Gídaabárós a Munguú Beteli. Asma an didá' Mungú nguwa i ti'iít, qoomár iwa goów as hhiyaawós. 8Debora, alee/isuso'ór Rebeka, iri kahhút, kari foól dír gamuú ti'ita, baraá Beteli. Ti'itudá' kuri báy Alon-bakuti.#35:8 Alon-bakuti: Gídaabárós a Ti'ituú tawa tsuunqumisi.

9Munguú Yakobo guri malé i ti'iít, qoomár niwa kií/ baraá Padan-aramu wa ale, guri tsuúq. 10Mungú guri báy, «Umuuwók a Yakobo, ala tu malé bayká Yakobo, ala daxta umuuwók an Israeli.» Guri ateét «Israeli.» 11Mungú guri báy, «Aníng an Munguú duú Aleesleemusmoó mura' sleémeero, kumiít tawa doogiin. Xoordaá yaariir nin baraawók wa ti'iitiyá', nee waawitá sleeme. 12Yaamuká' naa Abrahamu nee Isaka i haniís, ngi kuúng i haniís sleeme, tawa kók nee xwayladá' ta aluuwók wa laqwaali.» 13Mungú iri tláy gáwtí alé didiíwa axweés nee Yakobo. 14Yakobo uhumoó tlaa/e guri sihhtís didá' nee Mungú tawa axweés, di/i gari gawaadá' i tsiririxiís, nee muruú wahaangw, as ilahhooa ngiwa haniisi dír Mungú. 15Yakobo didá' gari báy Beteli, didá' Mungú iwa axweés nee inós.

Gwa'arár Raheli

16Yakobo nee mukós tari kumiít aaiiwo dír Betelí wa alé. Tawa nakaá/ Efrataro, Raheli asltá xwayla gana iimu/uún ar /uuru. 17Qoomár asltadá' ngiwa slahh'és, alee/isuso'oodá' gari beér. «Ma da'ayumiitaar, asma garma u malé xwayluúr.» 18Qoomár iwa tsatmit (asma xwayla gana gás), na/aydá' guri umií tsát, guri beér Ben-oni,#35:18 Ben-oni: Gídaabá Garmoó gurhaamir'eé'. ala baabuúwós guri báy Benyamini.#35:18 Benyamini: Gídaabá Garmoó gitsee/aá hhoo'.

19Raheli iri kahhút, kari foól bihhaá loohír Efrata kaw, an Betilehemu. 20Yakobo uhmoó inslaslaangw guri sihhtís gawaá /aantárí alé, an uhmoó gawaá /aantár Raheli ay laarí. 21Israeli iri kumiít aaiiwo, iri heémarós kikií' dír tsitsinír Ederi ngiwa waaraáhh.

Daaqoó Yakobo

(1Qom 2:1-2)

22Qoomár Israeli iwa hoót baraá yaamuudá' wa alé, Reubeni nee Bilha, /ameenír hatlá'#35:22 /Ameenír hatlá': Hháw 22:24 soomuuseek. ar baabuúwós, tari alqaát. Israeli kangwdá' guri axaás.

Daaqoó Yakobo a mibaá nee tsár. 23Daaqoó Lea an Reubeni, na/oó baris oo Yakobo, nee Simeon, nee Laáwi, nee Yuda, nee Isakari nee Sebuluni. 24Daaqoó Raheli an Yosefu nee Benyamini. 25Daaqoó Bilha, sagadiyuso'ór Raheli an Dani nee Naftali. 26Daaqoó Silpa, sagadiyuso'ór Lea an Gadi nee Asheri. Kuká' an daaqoó Yakobo kudá' aa laqwaál baraá Padan-aramu wa alé.

Gwa'arár Isaka

27Yakobo iri hardáh amór baabuúwós Isaka, baraá yaamaá Mamre, gixsár Kiriat-arba, tida' ta bay Hebroni, iri amoodá' wa hoót, yaamuudá' Abrahamu nee Isaka naa hootiyé' ar dah'iima. 28Kureeraá Isaka aa hoót a tsiiru nee mibeeri dakaát. 29Isaka a aakoó aa uray, diimay gway daáhh, kuri foól nee daaqaywós Esau nee Yakobo.

Currently Selected:

IIMU/UUNGW 35: IRQW

Highlight

Copy