IIMU/UUNGW 34

Dasu'uumár Dina kawa hhitín

1Looarka wake Dina dasír Lea, tidá' Lea aa xwayluúr dír Yakobo, ina ti'ít as /ameenár yaamuudá' ngiwa taaqwesár eer. 2Shekemu garmoó Hamori, oo múk Hifi, heé úr oo yaamuudá', Dina ngiwa ár, gari óh ar /uuru, tari alqaát nee inós, gari dasu'uuma hhitín. 3Muunaáwós dasiirír Yakobo gari ló' wa slaá'. Dasiirí gari i axweés ar axweesantá hho'. 4Shekemu baabuúwós guri báy, «Dasirqá' aníng wa lehhiitang.»

5Yakobo gari axaás adór dasiirós Dina kara dasu'uuma hhitín. Nee daaqaywós i baraá darmií dirii', ta muruuín de'én. Yakobo iri xasliít daaqaay ngar wa waátl. 6Hamori baabuú Shekemu iri tláy as nee Yakobo tawa axweesi. 7Qoomaadár kilae daaqoó Yakobo nina baraá de'éngw wa waátl. Kaangwí nguwa axaasiyé', tana ló'wa gurhamuút, tana buúhh, asma gaarí ka alsi'ím dír múk Israeliwo ar dasír Yakobo kawa /uurúr óh, kari dasu'uuma hhitín. Asma gaarí a gár ta waki ló' wa ale. 8Hamori iri axweés nee inooín giri báy, «Garmaaeé' Shekemu dasirhúng gaa waatlakweés. Na'asé', haniisare' ngi duuxi. 9Ti dasu duxuutaán, dasuuhúng haniisare' aténí alé, kuungá' dasuurén duxuutaak. 10Kuungá' nee atén ta alhootaán, nee yaamuká' a koohúng, hooté', halaanu'uuma tlehhiitaak baraaká' wa alé, nee daqaari'iité'.»

11Shekemu baabuú Dina nee hhaeewós giri báy, «Án ya/aamaré', umuúqo gár ni oa'a aníng ngi haniís. 12Tam gwada doogaak, nee qeemuuwo ngi haniís ar adoodá' ngira oé', ala masók dasiirí ngi hanisá' án ngiwa duux.»

13Daaqoó Yakobo, Shekemu nee baabuúwós Hamori nguna al/ayiyé', asma hho'or'ín Dina kana dasu'uuma hhitín. 14Tari oó', «Adoosíng ngi tleehhanaaká hho'oorén ngiwa hanisaan, dír heé taa hheehhe'eesiiká. Adoosíng bara tleehhaán, a alsi'imu direne. 15Atén nee kuungá' birti kaahi slawaán, a hhawaataá ayaahúng kin hheehhe'eemiis adór atén wa alé. 16Daqaní atén dasuurén ngu hanisaán, nee koohúng nguri duxuutaán, tari alhootaán, atén tari adór múk wák. 17Ala adoorí bar ya/aanda'aaká ar kuungá' tunduwa hheehhe'eemisi, hho'oorén ar tlawaán.»

18Hamori nee garmaawós Shekemu axweesantí ngiri ya/ané'. 19Nee garmoó aáng adoodá' tleehhamooro taa alduuxiiká, asma kwa ló'wa sla'atís nee dasiidár Yakobo. Asma garmaadá' a heé ilaiwa/amér koóm dooine.

20Hamori nee garmaawós Shekemu tari hardáh dír afkú gixsar'ín, dír bariisér kwasleema, tari oó', 21«Mukwí a múk hhó', gimsé', ni ayaarén wa hootiye', nee halaanu'uuma ngi tleehhiye' baraaká' wa alé, asma yaamu i bu'uutiyá', nee ti dasu duxuutané'. 22Ala ar dakwí wák kilose ti kaahi slawaané' tawa ayaarén wa hooti sleémeero, tawa múk wák oo taa hheehhe'eemiís umuúqo hhawaatuuwo adór inooín wa alé. 23Xáy, bee/angw'ín nee daqaari'iimar'ín nee makay'ín sleémeero a kooréneéke? Gimsé', ti kaahi slawaané', inooín ta ayaarén wa hooti.» 24Hhawaataá baraá gixsadá' sleémeero tiri axweesani slayé' nee Hamori nee Shekemu. Umuúqo hhawaatuuwo baraá gixsadae kuri hheehhe'eés.

25Naagáy bál tame tawa slahhaai tiqtiro, daaqoó tsár oo Yakobo, Simeon nee Laáwi hha'aá Dina, umuú heewo paángarós gana taataáhh, gixsa kari i hardáh ar migi, hhawaate sleémeero kiri baraá tiqtidí áy, kiri tsuú/. 26Hamori nee garmaawós Shekemu kiri tsuú/ ar paánga, Dina kingari ar tláy dír doó Shekemu wá ale. 27Daaqoó Yakobo ina haraatláy, mura' sleémeero oo baraá gixsadá' kuri hayóh, asma hho'or'ín kawa dasu'uuma hhitín. 28Bee/angw'ín kuri hayóh, nee hikwaaín nee daqwaayer'ín nee múk baraá gixsar'ín, nee mura' sleémeero oo baraá xatsooín i diriia. 29Daqaari'iimar'ín sleémeero nee na/ii'ín sleémeero nee /ameenar'ín sleémeero nee muruú baraá maráy dirií', kunguri hayóh.

30Yakobo Simeon nee Laáwi giri báy, «Iga slahh'esé' iwa heé tlaákw tlehhé' baraá tla/ángw múk ayaawihe, múk Kana'ani, nee múk Perisi. Aníng muk'eé' ku niiná, birta i burumburiít, tin muux, án nee múk dooeene tiri qwaarees.»

31Inooín tari oó', «An gár hhoo' xáy, hho'oorén ngiwa adór tsaatuso'o tleéhh?»

Currently Selected:

IIMU/UUNGW 34: IRQW

Highlight

Copy