IIMU/UUNGW 32

Yakobo nee Esau

1Qoomár Yakobo iwa kumiiti aaiiwose, malaykér Mungú nee inós tina doogiyé'. 2Yakobo ngiwa ár, iri oó', «Gaarí a slawtá múk Mungú.» Didá' gari báy Mahanaimu.#32:2 Mahanaimu: Gídaabárós a slawtá tsár.

3Yakobo ya/abuuse gari geerakawís amór hhiyaawós Esau, amór Seiri baraá yaamaá Edomu. 4Gina hara'ayín, iwa kaahi, «Adoorí an adór aakooeé' Esau ku beera', ‹Sagadiyusmoowók Yakobo i kaahi, Aga hoót ar dahi'iima dír Labani wa ale ay hamí. 5Hikwa i koóm nee daqwaayeero, muruú ququmát, nee sagadiyuusér hhawaate nee ar /ameenaaro. U ya/abtoórí ya/abiít, taataeé', a haraxuú' adór ir ilaaót.› »

6Ya/abuuseedá' iri kí/ amór Yakobo, kuri báy, «Ana hardahaán amór hhiyaawók Esau, inós i loohír i dirii' as uwa ilaoohi, nee múk tsiire tsiyáhh ti koná'.» 7Yakobo iri ló' wa da'ayuút iri amoqwaár. Mukdá' nee inós dinkwa guri qasiís baraá daqooroó tsár, bee/aangw nee muruú hatlá' nee angamía, 8iri baraá muunaáwós i oó', «Barnaxes Esau daqtá wák gaa i hardáh nee gari hhaamiís, ala tidár hatlá' aa /uúr.»

9Naagáy Yakobo Mungú guri firín iri oó', «Munguú baabuúeé' Abrahamu, Munguú baabuúeé' Isaka, AAKOÓ MUNGÚ kuúdá' án iga beer, ‹Kií/ baraá yaamuuwók nee amór mukók,› ina al'axweesántí hanís ar iwa hhooárí tlehh, 10aníng a ló'wa hariimaaká hhooeemaadá' nee inkihhimuudá' sleémeero kuúng naa aníng i laqaandi, anuú sagadiyusmoowók. Asma yaaér Yordani ngiwa waaraáhh, gár ni koom i káhh, aqo har hhara kilós. Ala daxta a daqooroó tsár koóm. 11Án kuúng u firiím, ba/amisáng daxta baraá dabaá hhiyaaeé' Esauwo. Asma án inós u da'ayumiiít tiwa haramuki, nee sleémeero tiri tsuu/, ín aayo dinkwa nee na/iiwo. 12Inslaweek kuúng án ina al'axweesántí hanís ar iwa hhooárí tlehh, nee xwaylar'eé' kawa tlahhas adór hhasángw afaá tlawi, kudá' faaro ga ya/aamaaká.»

13Naagáy Yakobo iri didií deél xweeraadae. Boohhár daqaari'iimarós gari paraátl tawa gár i haniisi dír Esau hhiyaawós: 14Aaraá tsiire tsár nee gurtaawe mibeeri tsár, bee/aangw tsiire tsár, nee gwaandaawe mibeeri tsár, 15angamíár du'umiis mibeeri tám nee na/ii'ín, hikwaá mibeeri tsiyáhh nee awe mibaangw nee daqwaayér /ameena mibeeri tsár, nee ar yaqaambe mibaangw. 16Giri sagadiyuuseerós i saayín umuú heewo daqtós, giri báy, «Giirimé', pa/aangw ku geexeerá' tla/ángw daqa nee tiqá' baraá aaiihunge.» 17Kudá' geerií giiriím gway báy, «Hhiyaaeé' Esau bar nee kuúng taa dogé', bir kaahi, ‹Kuúng a sagadiyusmoó heemá? Nee muruuwók kwí oo heemá?› 18Kuúng ta o', ‹Muruuwí a daqaari'iimár sagadiyusmoowók Yakobo, nee an gár ni kuúng i haniisi, kuúng aakooeé' Esau. Yakobo inósuú kilá' i alií dirii', i lawee'.› » 19Hara'ayaarí gana káh dír sagadiyusmoó daqtá tsár nee ar tame nee awa hatlá' sleémeerowo, i kaahi, «/Aymi'iiká' ki katá' dír Esau birta dogé' nee inós. 20Alaá tí sleémeerowo ku beera', ‹Yakobo sagadiyusmoowók i alií dirii', i lawee'.› » Yakobo adoorí gana tleéhh, ina baraá muunaáwós i oó', «Doóqa Esau muruuwí burungwa ár, muunaáwós i barií kii/. Atén birta doogaán, doóqa ila' ti ya/aná', iri ilaaoh.» 21Gawaá adoorihe muruudá' guri giiriís, ala inós iri deél dír slumtadá'.

/Ootsito

22Xweeradaá kilae Yakobo iri daarkiít, tlaawaywós tsaraawo gurir tláy, sagadiyuuseerós tsaraawo nee na/iiwós kudá' mibaá nee wak, yaae gari waaraáhh dír dahhsantá ta babay Yaboki. 23Yakobo mukós nee muruuwós sleémeero guri waarahhaás gayuú yaae. 24Yakobo iri kilós meét.

Heeko wák nina hardáh, tina /otsatsitiyé' nee inós ay ságw looa. 25Heedaádá' ngiwa ár adór Yakobo arba/atiro ngur aleeslayká, kutl/umoó Yakobo guri kwatiít, Yakobo iri yaae han'aát. 26Heedaádá' Yakobo guri báy, «Án geemawáng ni tláw, asma iimi aa /awaakuúr.»

Ala Yakobo guri báy, «U geemawaaká ay dír án i tsuq.»

27Inós gway yaahaás, «Asma kuúng a heemá?»

Iri oó', «Yakobo.»

28Heedaádá' iri oó', «Kuúng tu malé bayká Yakobo, ala tun bay Israeli, asma nee Mungú tina /ootsité', nee muu sleeme, kiri arbá/.»

29Yakobo guri báy, «Na'ás, umuuwók ooang.»

Ala inós iri oó', «Gár umuueé' kus yaahamis a milá?» Yakobo guri tsuúq.

30Yakobo umuú didá' guri báy Penieli, i kaahi, «Nee Mungú taa araán ila nee tí, ala aníng a slaáf.» 31Yakobo Penieliro iwa waraahhi looa naa qaroó tsiiríhh, inós i soopín asma kutl/umoodá'. 32Tam ay laarí múk Israeli fu'unaá dír kutl/umo gi /aa/ayiiká, asma didá' an dír heedaádá' aa kwatiít qoomár tiwa /ootsitiyé' nee Yakobo.

Currently Selected:

IIMU/UUNGW 32: IRQW

Highlight

Copy