IIMU/UUNGW 28

1Naagáy Isaka Yakobo guri ateét, gway tsuúq, guri báy, «/Ameenír múk Kana'ani ma duuxaar. 2Tláw ay Padan-aramu, amór doó aakoowók Betueli, dasír wák baraá dasú maamáywók Labaniwo na duuxeek. 3Munguú Aleesleemusmo u tsuuqi as xwaylár yaariir kawa sleer nee iwa doogiin, as tawa múk yaariír tleehhit. 4Kuúng u tsuuqi dinkwa nee xwaylarók ar adór Abrahamu ngura tsuúq, as yaamu kiwa al, kwisíng tawa adór dahaaymoó wa hot, yaamuudá' Mungú aa Abrahamú i haniís.» 5Naagáy Isaka Yakobo guri ya/aáw. Inós iri tláy ay Padan-aramu, amór Labani, garmoó Betueli, heé Aramu, hhiyoó Rebeka, aayór ín Yakobo nee Esau.

Esau i duuxuuxún harér tame

6Esau gari tsaáhh ar adór Isaka Yakobo ngura tsuúq nee gway ya/aáw ay Padan-aramu, nee nguwa tsuúq, guri báy, /ameenír Kana'ani ma duuxaar. 7Gaa malé tsaáhh adór Yakobo baabuúwós nee aayírose ngira ilaiwaá/, iri tláy Padan-aramu. 8Esau gari tsaáhh adór baabuúwós kur sla'atimisiiká nee /ameenár Kana'ani. 9Ala alaá /ameenadár hatlae Esau ina tláy ay amór Ishmaeli, garmoó Abrahamu, Mahatati hho'ór Nabaioti dasír Ishmaeli gari duúx.

Tlataá Yakobo baraá Beteli

10Yakobo iri Be'er-shebár wa tláy, iri amór Haranír xuú'. 11Iwa dirkaárí hardáh, ina qaát didaádí alé, asma looa aa dát. Tlaa/anoó wák oo didá' guri taataáhh, guri sagós ar tlakwaá', iri qaát. 12Iri tlatiitín, nee baraá tlataadae tsa/a/amto guna ár oo taa yaamuú wa sihhtís ay doori. Slám malaykér Mungú in tsa/a/aán nee in awdít ar gawaá tsa/a/amtoodá'. 13Nee ga/aaweek, AAKOÓ MUNGÚ aa sihhiít gawaá tsa/a/amtoodaádí alé.#28:13 Tsa/a/amtoodaádí alé: Laqaá: Bihhaawósí alé. Yakobo guri báy, «Aníng an AAKOÓ MUNGÚ, Munguú Abrahamu baabuúwók, nee Munguú Isaka. Yaamusíng taa i qát án ngi kuúng i haniís nee xwaylarók. 14Xwaylarók ka yaariir adór teerír yaamu, nee xwaylarók tsee/a gin tsát, kuúng an tsiiyayaaxát ay /uwa, da/aáw, /iya nee basa. Múk yaamu sleémeero ku tsuuq as kuúng nee na/iiwók. 15Aníng nee kuúng a dinkwa. Án kuúng u de'eém amór taqo keera, nee uri ki/ís baraá yaamuká'. U geexawaaká ay dír al'axweesantadá' naa oó' ngay boo/ees.»

16Yakobo iri tláy baraá gu'uteero, iri oó', «Ar ló', AAKOÓ MUNGÚ i diirí dirii', aníng aga xuiiká.» 17Yakobo iri da'ayuút, iri oó', «Diirí i ló'wa dae tláq. Diirí a tsuwa doó Mungú nee afkú doori.»

18Yakobo matlaatleero iri tseewa tláy, tlaa/anoodá' aa sagós ar tlakwaá' guri taataáhh, guri adór uhmoó wa foól, guri di/tí tsiririxiís as nguwa paraatli. 19Didá' gay báy Beteli,#28:19 Beteli: Gídaabárós a Doó Mungú. ala umuú gixsadá' geeraawo a Lusu. 20Yakobo al'axweesani gari qaás i kaahi, «Mungú ala kuúng bar dinkwa nee aníng, nee bir de'eén baraá aaiieene, muruú /ayma nee tsitaywo bur ngu hanmís, 21nay kií/ amór doó baabuúeé' ar saxareema, 22daqaní kuúng AAKOÓ MUNGÚ, an Munguúeé'. Tlaa/anoowí naa diirí sihhtís adór uhmo, a do'ók. Baraá tidá' sleémeero kuúng niqo hanisa, aníng ar wák baraá bohhaá mibaango ngi dirógí haniís.»

Currently Selected:

IIMU/UUNGW 28: IRQW

Highlight

Copy