IIMU/UUNGW 22

Isaka kuwa ilahhooár wa haniís

1Nee alaá muruuwí sleémeero Munguú Abrahamu guri iiár, guri báy, «Aá Abrahamu». Abrahamu iri oó', «Aníng a diirí.»

2Mungú iri oó', «Garmaawók kwisíng oo kilós, nee oo kuúng ta ló'wa sla', Isaka, ar tlawang ay baraá yaamaá Moria. Daqaní kuúng ngu ilahhooár da/tá wa hanís gawaá tloomár aníng ni kuúngí laqaam.»

3Abrahamu matlaatlér boo/e iri tláy, daqwaywós guri amohhe'eés, daaqoó tsár nee garmaawós Isaka giri báy, «Ti amohhe'ese' aaií wa alé.» Migiruú ilahhooár da/a guri amohhe'eés, nari tlayé' nee mukós kwihe ay amoodá' Mungú aa oó' dirósí ale. 4Bál tám Abrahamu ina geerií qaytsiít, didaádá' ta kay gari amór saáwí ár. 5Abrahamu daaqaydá' tsár guri báy, «Kuungá' diirí hungu/usaak, nee daqwaay ga/aawaak. Aníng nee garmaaeé' Isaka a amorqá' kawaán, a Mungú firór awaán. Atén kuungá' nuqo diirií awaán.»

6Abrahamu migíruuduú ilahhooadár da/a guri tsa/aás gawaá ságw Isaka garmaawós. Inósuú kilá' dakose asla nee tsataywo giri óh, tsaraawo tari altláy. 7Isaka iri oó' dír baabuúwós i ale, «Baabá».

Abrahamu iri oó', «Aníng a diirí, garmaaeé'.»

Isaka iri oó', «Qaytsiít, migír nee aslto i koomaán, ala deelmoó bee/i oo ta gaasaan as ilahhooadá' ta da/i i amá?»

8Abrahamu iri oó', «Garmaaeé', Mungú inósuú kilá' deelmoó bee/i oo ta ilahhooár da/tá wa hanisaan ngu sláy.» Naagáy inooín tsaraawo tari kumiít geerií alé.

9Tawa hardáh didá' Mungú aa oó', Abrahamu kitángw ilahhooa guri tleéhh. Migír guri hhaáf gawaá kitangwdá', garmaawós Isaka guri tseék ar hima, guri qaatiís gawaá daanduú migíruudá'. 10Abrahamu tsataay guri óh, dakós guri gáwtí tleés as garmaawós nguwa isa tsati. 11Ala malaykamoó AAKOÓ MUNGÚ iri gawaá doorí wa ateét, iri oó', «Abrahámu! Abrahámu!»

Abrahamu iri oó', «Aníng a diirí.»

12Malaykamo iri oó', «Dakók mu tleesaar gawaá garmií alé, laqaá tam mu gaa /iisaar. Asma daxta aníng aga tsaáhh adór kuúng Mungú kur ilaiwaawá/. Qaytsiít tam sleeme kuúng garmaawók oo kilós oo ta sla', ugwa ila/iká dir'eéní haniisaro.»

13Abrahamu iri qaytsiít, naxes gwaanda i dír aluuwós, kwa xareemi óh nee xwaansláy. Abrahamu gwaanduú aáng guri óh, guri ilahhooár da/tá wa haniís kitángw garmaawós wa ale. 14Abrahamu yaamuudá' giri báy, «AAKOÓ MUNGÚ ngi haniis.»#22:14 Ngi haniis: Laqaá: AAKOÓ MUNGÚ i xumiis. Adoodá' kar ateetin tam de'emuuká', «Gawaá tloomár AAKOÓ MUNGUHE kingi haniis.#22:14 Kingi haniis: Laqaá: Gawaá tloomaro AAKOÓ MUNGÚ ku geehhoó'.

15Malaykamoó AAKOÓ MUNGUÚ Abrahamu guri sagaáwa tsár wa ateét gawaá doorí wa alé, 16iri oó', «AAKOÓ MUNGÚ i kaahi, ‹Án lo'o aga /aáy ar umuueé', as kuúng adoosíng kawa tléhh, ar garmaawók oo kilós kuwa /itiindiiká haniisár dir'eene, 17án daxta kuúng u ló'wa tsuúq, nee xwaylarók an ló'wa tlahhás, tari adór tsatse/uú doori nee adór hhasángw afaá tlawi. Nee xwaylarók wakuuser'ín gari bál, nee gari sawaawuti'iín. 18Ar baraá xwaylaroge xoordu sleémeero tsuuqa ngiri slayá', asma kuúng afor'eé' aga iiárií qás.› » 19Abrahamu iri kií/ amór daaqaywós, tari tláy, tay alkií/ ay Be'er-sheba. Abrahamu iri hoót baraá Be'er-shebár wa alé.

Xwaylár Nahori

20Alaá muruuwihe Abrahamu kuri báy, «Milka sleeme daaqaay gwaa xwayluúr dír hhiyaawók Nahori. 21Na/oó baris a Usi, oo tsár a Busi, oo tám a Kemueli, baabuú Aramu. 22Awa hatlá' a Kesedi, nee Haso, nee Pildashi, nee Yidlafu nee Betueli.» 23Betueli Rebeka gari laqwaál. Daaqaywí dakaát Milka guna xwayluúr dír Nahori, hhiyoó Abrahamu. 24/Ameenirós.#22:24 /Ameenirós: Gídaabárós a /ameenír hatlá', a hareerooká, ala a /ameenír nee hhawaata tawoó alhootá'. tidá' quturmo wasl, umuuwós a Reuma, inós sleeme guri na/ií xwayluúr. Na/iiká' a Teba, nee Gahamu, nee Tahashi nee Ma'aka.

Currently Selected:

IIMU/UUNGW 22: IRQW

Highlight

Copy