IIMU/UUNGW 21

Isaka kuwa laqwaál

1AAKOÓ MUNGÚ Sara gari insláy, nee adoodá' aa dirós i oó', gari tleéhh. 2Sara iri tsít, Abrahamu guri na/oó garmaá i xwayluúr baraá diimaywose ar afi qoomaadá' Mungú aa dirósí oó'. 3Garmaadá' Sara aa Abrahamúi xwayluúr, Abrahamu guri umií tsaát, umuuwós tay Isaka. 4Garma deelo dakaát ngiwa áy, Abrahamu guri hheehhe'eés adoodá' Mungú ngwa báy. 5Abrahamu kureeriiwós a tsiiru qoomár garmaawós Isaka kuwa laqwaál. 6Sara iri ó', «Mungú aníng ina qwal/atís, nee umuúqo heé adoorí ga axaasi nee aníng an al qwalaala/aán. 7Heé adoorí geera gaa Abrahamú i xuu', ar Sara na/ii ngiwa du'umis. Ala tam adoorihe án inós ugwa na/oó garmií xwaylúw baraá diimaywose.»

8Na/aay iri uráy, kuri /oomeés, Abrahamu deelór ur gari tleéhh, baalaadá' Isaka kuwa /oomeés.

Guusár Hagari

9Na/ayduú Hagari tidár Misri, tidá' nee Abrahamu taa al laqwaal, Sara guna aán iwa garmaawós Isaka baramaanuusi. 10Abrahamu guri beér, «Lawaalo'oosíng nee garmaawós kwisinge guuseek, asma garmaaeé' Isaka nee garmaasuú lawaalo'o ni al aalin'aaká.» 11/Aymuuwí Abrahamu guri ló'wa gurhaamír ar áy as garmaawós. 12Munguú Abrahamu guri báy, «/Aymuuwí miwa tlakúy dír geeraawoge as garmaasíng, nee lawaalo'osíng. Umuúqo gár Sara naa oi, na iiárií qaaseek, asma yaeemirók dír niwa ti'it a baraá Isaka. 13Garmaasuú lawaalo'o aníng sleeme u xooro tleéhh, asma inós sleeme a xwaylarók.»

14Abrahamu iri tláy matlaatlér boo/e, muruú /ayma nee quruuntlír ma'aá wahaangw gari haniís dír Hagari. Na/aay guri daanduú Hagari tseék, gari guús. Inós iri tleér, iri hi'iimít baraá xaanxoó Be'er-shebár wa alé. 15Ma'aydá' baraá quruuntli niwa faakiyé', inós na/aay guri qaatís dír gamuú xa'anoó niiná. 16Inós iri adorqí surúk, har saweemá mahaangw iwa hardihi, iri iwít, asma inós ina baraá muunaáwósí ó', «Aníng adór na/aay ir gwagwa'an mawa ga/áw.» Nee na/aay iri tseé' /aa/eewo.

17Mungú afór garma gari axaás, nee malaykamoó Mungú Hagari gari gawaá doorí wa ateét, gari báy, «Gár kiíng i daawitimiis a milá? Hagári, ma da'ayumiitaar, asma Mungú afór garma gaa axaás didií dirii'i. 18Tláw, garma ooheek baraá dabaawók, asma aníng inós un xoorór ur tleéhh.» 19Mungú inós gari ila' gwa/atís, inós hhalángw ma'aá koóm guri aán. Iri tleér, quruuntlír aáng gari i hhék, gari hatsís ma'aywo, nee garma guri qeér ma'aywo sleeme. 20Mungú nee na/aay ta dinkwa, na/aay iri uráy, iri baraá xaanxáy wa hoót, tari slakaatusmo. 21Iri baraá xaanxoó Paranír wa hoót. Aayoorós guri harér i sleér baraá yaamaá Misrír wa ale.

Kaahi sleemuú Abrahamu nee Abimeleki

22Qoomaadae Abimeleki nee Fikoli, heedaádá' úr oo slaqwaruuseerós gaa geerahaar, Abrahamu guna báy, «Mungú nee kuúng a dinkwa baraá umuúqo gár ta tlehha. 23Gím daxta, lo'o /ayeek ar umuú Mungú, ar kuúng gár tlaakw ngiwa aníng i tlehhká, laqaá na/iieé', laqaá na/aá nangw'eé', ala aqo ar adoodár gurhhooadá' aníng naa kuúng i tleéhh, kuúng ngin aníng i tléhh, baraá yaamuká' tawa hot.»

24Abrahamu iri oó', «Án lo'o a /aáy.»

25Abrahamu iri quraruú/ dír Abimeleki, asma hhalángw ma'aay kudá' sagadiyuusér Abimeleki aa hayót. 26Abimeleki iri oó', «Gaasíng an baloó xuaaká, nee heé adoosíng gaa tleehh u xuaaká, slám kuúng adoosíng ngaa baloó o'ká. Án adoosíng aga baloó axasiiká, aqo har laarí kilós.» 27Abrahamu hikwa nee bee/aangw giri haniís dír Abimeleki, inooín tsaraawo al'axweesani kari káh. 28Abrahamu dareemoó faanqw oo bee/aangw guri bihhií amaásl. 29Abimeleki Abrahamu guri yaahaás, guri báy, «Ahaá, dareemáywí faanqw oo bee/aangw taa bihhií amaásl oo milá?»

30Abrahamu iri oó', «Dareemáywí kuúng un baraá dabaaeé' wa ilaót, as daqaní kuúng tawa lamabu'usmo, adór heé hhalaangw gwaa fool tar aníng.» 31Gawaá adoorihe umuú didá' kuri báy, Be'er-sheba, asma inooín tsaraawo lo'o ngina didá' wa /ayé'.

32Al'axweesani kari dír Be'er-shebár wa axweés. Abimeleki nee Fikoli geeraharusmoó slaqwaruuseerós tari tláy, tari kií/ ay baraá yaamaá Filisti. 33Abrahamu ti'ita guri dahaás didár Be'er-sheba, umuú AAKOÓ MUNGÚ, Munguúduú alhhe'eesay wásl guri ateét baraá firoorose. 34Abrahamu iri hoót deelór yaariire baraá yaamaá Filistír wa alé tawa /eetusmo.

Currently Selected:

IIMU/UUNGW 21: IRQW

Highlight

Copy