يَحْيَى 6
6
عِيسَىٰ يَثِيَرْ دَ مُتُمْ دُبُو بِيَرْ
﴿مَتْ 14.13-21؛ مَرْ 6.30-44؛ لُكْ 9.10-17﴾
1بَايَنْ وَنَّنْ سَيْ عِيسَىٰ يَڧٜىٰتَرٜىٰ تٜىٰكُنْ غَلِيلِ، وَتُواْ تٜىٰكُنْ تِبَرِيَ؞ 2سَيْ مُتَنٜىٰ دَيَوَ سُكَبِيشِ، دُواْمِنْ سُنْ غَ عَلَمُنْ بَنْ مَامَاكِنْ دَ يَكٜىٰيِ وَمَاسُثِيوُاْ؞ 3سَيْ عِيسَىٰ يَهَوْ تُدُ يَذَوْنَ عَثَنْ تَرٜىٰدَ أَلْمَجِرَنْسَ؞ 4تُواْ، لُواْكَثِنْ بِكٍ ڧٜىٰتَرٜىٰوَ، وَتُواْ بِكٍ يَهُودَاوَا يَيِ كُسَ؞ 5دَ عِيسَىٰ يَطَغَ عِدُواْ يَغَ تَارُواْ مَيْ يَوَ سُنَ تَظُوَ وُرِنْسَ، سَيْيَثٜىٰ وَ ڢِلِبُسْ «إِنَا ذَامُ سَيُواْ إِسَشّٜىٰنْ عَبِنْثِنْ دَ مُتَنٜىٰنَّنْ ذَاسُثِ؟» 6عِيسَىٰ يَيِ وَ ڢِلِبُسْ وَنَّنْ تَمْبَيَ نٜىٰ دُواْمِنْ دَيْ يَڠُودَ شِ، غَمَا عِيسَىٰ يَارِغَا يَسَنْ أَبِنْدَ ذَيْ يِ؞
7ڢِلِبُسْ يَأَمْسَ يَثٜىٰ «أَيْ، كُواْ عَبِنْثِ نَيَوَنْ كُطِنْ دَ لٜىٰبُرَ ذَيْسَامُ أَ رَانَكُو طَرِے بِيُ مَا بَذَيْ إِسَ كُواْوَنّٜىٰنْسُ يَسَامِ كَطَنْبَ؞»
8سَيْ طَيَ دَغَ ثِكِنْ أَلْمَجِرَنْ مَيْ سُونَ أَنْدَرَوُسْ، طَنْعُوَنْ سِيمَنْ بِتْرُسْ، يَثٜىٰ وَ عِيسَىٰ، 9«غَا وَنِ طَنْ يَرُواْ نَنْ دَ دُنْڧُلٜىٰنْ غُرَاسَ بِيَرْ نَغَارِنْ بَلٜىٰ دَ كُمَ كِيڢِ بِيُ؞ عَمَّا مٜىٰ وَطَنَّنْ ذَاسُيِ وَمُتَنٜىٰ مَاسُيَوَ حَكَ؟»
10 عِيسَىٰ يَثٜىٰ وَ أَلْمَجِرَنْسَ «كُڢَطَا وَمُتَنٜىٰ سُذَوْنَ؞» أَوَنَّنْ وُرِے كُوَ أَݣَويْ ثِيَوَ دَيَوَ؞ سَيْ مَظَا سُكَ ظَظْذَوْنَ، سُنْ كَيْ وَجٜىٰنْ دُبُو بِيَرْ؞ 11عِيسَىٰ يَطَوْكِ دُنْڧُلٜىٰنْ غُرَاسَرْ، بَايَنْدَ يَيِ غُواْدِيَ غَ اللَّهْ كُمَ، سَيْ يَرَرَّبَ وَمُتَنٜىٰنْ دَسُكٜىٰ ظَوْنٜىٰ، يَبَاسُ دُكْ أَبِنْدَ ذَيْ إِشٜىٰسُ؞ حَكَكُمَ يَيِ دَ كِيڢِنْ؞ 12دَ سُكَثِ سُكَ ڧُواْشِ، سَيْيَثٜىٰ وَ أَلْمَجِرَنْسَ «كُتَتَّارَ غُڟَڟَّرِنْ دَ سُكَ رَغُ دُواْمِنْ كَدَ كُواْمٜىٰ يَلَلَثٜىٰ؞» 13سَيْ أَلْمَجِرَنْ سُكَ تَتَّارَ غُڟَڟَّرِنْ غُرَاسَرْ سُكَ ثِكَ ݣُونْدُنَ غُواْمَشَا بِيُ، وَتُواْ غُڟَڟَّرِنَّنْ دَغَ دُنْڧُلٜىٰنْ غُرَاسَ بِيَرْ نَبَلٜىٰ نَنْ وَطَنْدَ سُكَ ضَغٜىٰ بَايَنْدَ مُتَنٜىٰ سُكَثِ؞
14دَ جَمَعَ سُكَغَ وَنَّنْ عَلَمَرْ بَنْ مَامَاكِنْ دَ عِيسَىٰ يَيِ، سَيْ سُكَثٜىٰ «بَاشَكَّ، وَنَّنْ شِينٜىٰ أَنَّبِنَّنْ مَيْ ذُوَا دُونِيَا؞» 15دَ عِيسَىٰ يَغَانٜىٰ مُتَنٜىٰنْ سُنَ شِرِنْ ذُوَا سُطَوْكٜىٰشِ ڧَرْڢِے دَ يَجِ سُنَطَشِ سَرْكِے، سَيْ يَسَاكٜىٰ كُواْمَاوَ كَنْ بَبَّنْ تُدُ شِ كَطَيْ؞
عِيسَىٰ يَيِ تَڢِيَ عَكَنْ ضُوَ
﴿مَتْ 14.22-33؛ مَرْ 6.45-52﴾
16دَ يَمَّ تَيِ، سَيْ أَلْمَجِرَنْ عِيسَىٰ سُكَ غَنْغَرَ ذُوَا تٜىٰكُ؞ 17أَ لُواْكَثِنْ نٜىٰ وُرِے يَڢَارَ دُهُ، كُمَ عِيسَىٰ بَيْ رِغَا يَاذُواْ وُرِنْسُ بَ تُكُنَ؞ سَيْ أَلْمَجِرَنْسَ سُكَ شِغَ جِضْغٍ ضُوَ سُكَ ڢَارَ ڧٜىٰتَرٜىٰ تٜىٰكُنْ ذُوَا كَڢَرْنَهُمْ؞ 18سَيْ تٜىٰكُنْ تَڢَارَ هَوْكَ سَبُواْدَ وَتَ إِسْكَ مَيْ ڧَرْڢِے تَكٜىٰ بُوسَوَ؞ 19بَايَنْ سُنْيِ تُوڧِ وَجٜىٰنْ كِلُواْمِتَ بِيَرْ كُواْ شِدَ، سَيْ سُكَغَ عِيسَىٰ يَنَ تَڢِيَ عَكَنْ ضُوَ، يَنَ تَظُوَ كُسَدَ جِضْغٍ؞ سَيْ أَلْمَجِرَنْ سُكَ ڢِرْغِتَ؞ 20عَمَّا عِيسَىٰ يَثٜىٰ مُسُ «نِنٜىٰ، كَدَ كُجِڟُواْرُواْ؞» 21سَعَنً سُكَ يَرْدَ سُكَ كَرْٻٜىٰشِ ثِكِنْ جِضْغٍ؞ نَنْ دَ نَنْ جِضْغٍ يَكَيْ وُرِنْ دَ ذَاسُ؞
مُتَنٜىٰ سُنْ نٜىٰمِ عِيسَىٰ
22دَ غَرِ يَوَايٜىٰ سَوْرَنْ مُتَنٜىٰنْ دَسُكٜىٰ ظَوْنٜىٰ عَڧٜىٰتَرٜىٰنْ تٜىٰكُنْ سُكَ لُورَ ثٜىٰوَ دَا مَا جِضْغِ طَيَ نٜىٰ كُرُمْ يَذُواْ وُرِنْ، سُكَ كُمَ لُورَ عِيسَىٰ بَيْ شِغَ ثِكِنْ جِضْغٍ تَرٜىٰدَ أَلْمَجِرَنْسَبَ، أَلْمَجِرَنْسَ نٜىٰ كَطَيْ سُكَ تَڢِے؞ 23عَمَّا أَݣَويْ وَطَنْسُ جِضَاغٜىٰنْ دَ سُكَذُواْ دَغَ تِبَرِيَ سُكَ ڟَيَ كُسَدَ وُرِنْ دَ مُتَنٜىٰنْ سُكَثِ غُرَاسَ بَايَنْدَ عِيسَىٰ يَيِ غُواْدِيَ غَ اللَّهْ؞ 24دَ مُتَنٜىٰنْ سُكَغَ ثٜىٰوَ عِيسَىٰ دَ أَلْمَجِرَنْسَ بَاسَ نَنْ أَوُرِنْ، سَيْ سُكَ شِغَ جِضَاغٜىٰنْ ضُوً، سُكَ تَڢِے كَڢَرْنَهُمْ سُنَ نٜىٰمَنْ عِيسَىٰ؞
عِيسَىٰ نٜىٰ غُرَاسَ مَيْ بَادَ رَيْ
25دَ سُكَ سَامٜىٰشِ عَڧٜىٰتَرٜىٰنْ تٜىٰكُنْ، سُكَثٜىٰ مَسَ «مَلَمْ، يَوْشٜىٰ كَا ذُواْ نَنْ؟»
26 عِيسَىٰ يَأَمْسَ مُسُ يَثٜىٰ «حَڧِيڧَ، إِنَغَيَ مُكُ، كُنَ نٜىٰمَنَ نٜىٰ دُوانْ كُنْثِ غُرَاسَ نَنْ كُنْ ڧُواْشِ، عَمَّا بَ دُواْمِنْ كُنْ غَانٜىٰ عَلَمُنْ بَنْ مَامَاكِ دَ نَيِ بَنٜىٰ؞ 27كَدَ كُيِ وَهَلَرْ عَيْكِ عَكَنْ نٜىٰمَنْ عَبِنْثِ مَيْ لَلَثٜىٰوَ عَمَّا كُيِ عَيْكِ عَكَنْ عَبِنْثِنْ دَ ذَيْ دَوَّمَ ذُوَاغَ رَيْ نَهَرْ أَبَدَا؞ وَنَّنْ شِينٜىٰ عَبِنْثِنْ دَ طَنْ مُتُمْ ذَيْبَاكُ؞ دُواْمِنْ عَكَنْ طَنْ مُتُمْ نٜىٰ اللَّهْ عُبَا يَارِغَا يَسَا عَلَمَرْ شَيْدَرْسَ تَنُونَ يَرْدَ؞»
28سَيْ مُتَنٜىٰنْ سُكَ تَمْبَيِ عِيسَىٰ سُكَثٜىٰ «مٜىٰ ذَامُيِ دُوانْ مُثِكَ أَيُّكَنْ دَ اللَّهْ يَكٜىٰسُواْ؟»
29سَيْ عِيسَىٰ يَأَمْسَ مُسُ يَثٜىٰ «وَنَّنْ شِينٜىٰ أَبِنْدَ اللَّهْ يَكٜىٰسُواْ كُيِ، وَتُواْ كُبَادَ غَسْكِيَ غَ وَنْدَ يَعَيْكُواْ؞»
30سَيْ مُتَنٜىٰنْ سُكَ تَمْبَيِ عِيسَىٰ كُمَ سُكَثٜىٰ «تُواْ، وَثٜىٰ عَلَمَرْ بَنْ مَامَاكِ ثٜىٰ ذَاكَيِ دُواْمِنْ مُغَنِ مُبَادَ غَسْكِيَ غَرٜىٰكَ؟ مٜىٰ ذَاكَيِ؟ 31كَاكَنِّنْ كَاكَنِّنْمُ سُنْثِ مَنَّ أَدَاجِ، يَدَّ يَكٜىٰ أَرُبُوثٜىٰ عَثِكِنْ رُبُوتَثِّيَرْ مَغَنَرْ اللَّهْ ثٜىٰوَ ‹يَبَاسُ عَبِنْثِ دَغَ سَمَ دُواْمِنْ سُثِ؞› » #ڢِتْ 16.4،15؛ لِـ ڧِدْ 11.8؛ نٜىٰهْ 9.15؛ زَبُو 78.24
32سَعَنً عِيسَىٰ يَأَمْسَ مُسُ يَثٜىٰ «حَڧِيڧَ، إِنَغَيَ مُكُ، بَ مُوسَٰى نٜىٰ يَبَاكُ عَبِنْثِنَّنْ دَغَ سَمَبَ، عُبَانَ نٜىٰ يَكٜىٰبَاكُ عَبِنْثِ نَغَسْكِيَ دَغَ سَمَ؞ 33أَيْ، عَبِنْثِنْ اللَّهْ شِينٜىٰ وَنْدَ يَكٜىٰ سَوْكُواْوَ دَغَ سَمَ يَنَبَا دُونِيَا رَيْ؞»
34سَيْ سُكَثٜىٰ مَسَ «مَيْغِرْمَ، كَدِنْغَ بَامُ إِرِنْ وَنَّنْ عَبِنْثِ كُلُّمْ!»
35 عِيسَىٰ يَأَمْسَ مُسُ يَثٜىٰ «نِنٜىٰ عَبِنْثِ مَيْ بَادَ رَيْ، وَنْدَ يَذُواْ وُرِينَ بَذَيْ ڧَارَجِنْ يُنْوَبَ، وَنْدَ يَغَسْكَتَادَ نِے كُمَ بَذَيْ تَٻَ جِنْ ڧِشِنْ ضُوَبَ؞ 36عَمَّا كَمَرْ يَدَّ دَيْ نَڢَطَا مُكُ، كُنْ غَنِّ، دُكْدَهَكَ بَكُ بَادَ غَسْكِيَابَ؞ 37دُكْ وَطَنْدَ عُبَا يَبَانِ، ذَاسُذُواْ وُرِينَ، وَنْدَ كُمَ يَذُواْ وُرِينَ كُوَ بَذَنْ كُواْرٜىٰشِبَ؞ 38غَمَا نَا سَوْكُواْ دَغَ سَمَ، بَدُواْمِنْ إِنْيِ نُڢِينَبَ، سَيْدَيْ إِنْيِ نُڢِنْ وَنْدَ يَعَيْكُواْنِ؞ 39كُمَ نُڢِنْ وَنْدَ يَعَيْكُواْنِ شِينٜىٰ، كَدَ إِنْٻَاتَرْ دَ كُواْ طَيَ دَغَ ثِكِنْ دُكَنْ وَطَنْدَ يَبَا نِے، عَمَّا دَيْ إِنْ تَاشٜىٰسُ أَ رَانَرْ ڧَرْشٜىٰ؞ 40دُواْمِنْ وَنَّنْ شِينٜىٰ نُڢِنْ عُبَانَ ثٜىٰوَ دُكْ وَنْدَ يَكٜىٰ دُوبَنْ طَنْ، يَكٜىٰ كُمَ غَسْكَتَاوَا دَشِ يَنَدَ رَيْ نَهَرْ أَبَدَا، نِے كُمَ ذَنْ تَاشٜىٰشِ أَ رَانَرْ ڧَرْشٜىٰ؞»
41سَيْ يَهُودَاوَا سُكَيِ غُنَغُنِ غَمٜىٰدَ عِيسَىٰ دُواْمِنْ يَثٜىٰ «نِنٜىٰ عَبِنْثِنْدَ يَسَوْكُواْ دَغَ سَمَ؞» 42يَهُودَاوَنْ سُكَثٜىٰ «أَشٜىٰ، وَنَّنْ بَ عِيسَىٰ نٜىٰ بَ، طَنْ يُوسُڢَ، وَنْدَ مُنْ سَنْ دُكْ بَابَنْسَ دَ مَامَرْسَ؟ تُواْ، يَيَ يَنْذُ ذَيْثٜىٰ، ‹نَسَوْكُواْ نٜىٰ دَغَ سَمَ›؟»
43 عِيسَىٰ يَأَمْسَ مُسُ يَثٜىٰ «كُبَرْ يِنْ غُنَغُنِ أَڟَكَانِنْكُ؞ 44بَا مَيْ عِيَ ذُوَا وُرِينَ، سَيْدَيْ إِنْ عُبَا وَنْدَ يَعَيْكُواْ نِنٜىٰ يَجَٰوُاْشِ، نِے كُوَ ذَنْتَادَ وَنَّنْ مُتُمْ أَ رَانَرْ ڧَرْشٜىٰ؞ 45أَنْ رُبُوتَ عَثِكِنْ لِتَّتَّڢَنْ أَنَّبَاوَا ثٜىٰوَ ‹دُكَنْسُ اللَّهْ نٜىٰ ذَيْ كُواْيَ مُسُ؞› تُواْ، دُكْ وَنْدَ يَجِ، يَكُمَ كُواْيَ أَوُرِنْ عُبَنْ، يَكَنْ ذُواْ وُرِينَ؞ #عِشـ 54.13 46بَاوَنْدَ يَتَٻَ غَنِنْ عُبَنْ سَيْدَيْ وَنْدَ يَڢِتُواْ دَغَ وُرِنْ اللَّهْ، شِينٜىٰ كَطَيْ يَتَٻَ غَنِنْ عُبَنْ؞ 47حَڧِيڧَ، إِنَ غَيَ مُكُ، دُكْ وَنْدَ يَبَادَ غَسْكِيَ يَنَدَ رَيْ نَهَرْ أَبَدَا؞ 48نِنٜىٰ عَبِنْثِ مَيْ بَادَ رَيْ؞ 49كَاكَنِّنْ كَاكَنِّنْكُ سُنْثِ مَنَّ أَدَاجِ، عَمَّا دُكْدَهَكَ سُكَ مُتُ؞ 50عَمَّا غَ عَبِنْثِ مَيْ سَوْكُواْوَ دَغَ سَمَ، دُواْمِنْ دُكْ وَنْدَ يَثِ وَنَّنْ عَبِنْثِ، بَذَيْ مُتُبَ؞ 51نِنٜىٰ عَبِنْثِنْ رَيْ دَ يَسَوْكُواْ دَغَ سَمَ؞ دُكْ وَنْدَ يَثِ وَنَّنْ عَبِنْثِ، ذَيْ رَايُ حَرْ أَبَدَا؞ وَنَّنْ عَبِنْثِ نَامَنْ جِكِينَ نٜىٰ، وَنْدَ ذَنْ بَايَرْ دُواْمِنْ دُونِيَا تَسَامِ رَيْ؞»
52سَيْ يَهُودَاوَا سُكَ شِغَ غَرْدَمَ مَيْ ذَاڢِ أَڟَكَانِنْسُ، سُنَ ثٜىٰوَ «يَيَ مُتُمِنَّنْ ذَيْبَامُ نَامَنْ جِكِنْسَ مُثِ؟»
53سَيْ عِيسَىٰ يَثٜىٰ مُسُ «حَڧِيڧَ، إِنَغَيَ مُكُ، إِنْ بَكُنْثِ نَامَنْ جِكِنْ طَنْ مُتُمْ كُنْ كُمَشَا جِنِنْسَبَ، بَاكُ دَرَيْ عَثِكِنْكُ كٜىٰنَنْ؞ 54دُكْ وَنْدَ يَكٜىٰثِنْ نَامَنْ جِكِينَ، يَكٜىٰشَنْ جِنِنَ كُمَ، يَنَدَ رَيْ نَهَرْ أَبَدَا، ذَنْ كُوَ تَاشٜىٰشِ أَ رَانَرْ ڧَرْشٜىٰ؞ 55دُواْمِنْ نَامَنْ جِكِينَ عَبِنْثِ نٜىٰ نَغَسْكِيَ، جِنِنَ كُمَ، أَبِنْ شَا نٜىٰ نَغَسْكِيَ؞ 56دُكْ وَنْدَ يَكٜىٰ ثِنْ نَامَنْ جِكِينَ، يَكٜىٰ كُمَ شَنْ جِنِنَ، يَنَ رَايُوَا عَثِكِنَ، نِے كُوَ عَثِكِنْسَ؞ 57كَمَرْ يَدَّ عُبَا مَيْ رَيْ يَعَيْكُواْنِ، سَبُواْدَ شِينٜىٰ كُمَ نَكٜىٰ رَايُوَا، حَكَنٜىٰ كُمَ وَنْدَ يَمَيْدَنِ عَبِنْثِنْسَ ذَيْ رَايُ سَبُواْدَنِ؞ 58نِنٜىٰ عَبِنْثِنْ دَ يَسَوْكُواْ دَغَ سَمَ؞ كَاكَنِّنْ كَاكَنِّنْكُ سُنْثِ مَنَّ، عَمَّا دُكْدَهَكَ سُكَ مُتُ، عَمَّا دُكْ مُتُمِنْدَ يَثِ وَنَّنْ عَبِنْثِ ذَيْ رَايُ حَرْ أَبَدَا؞»
59 عِيسَىٰ يَڢَطِ دُكَنْ وَطَنَّنْ أَبُبُوَ نٜىٰ أَ لُواْكَثِنْ دَيَكٜىٰ كُواْيَرْوَا عَثِكِنْ مَجَمِعَ#6.59 مَجَمِعَ: دُوبِے مَعَنَرْ وَطَنْسُ كَلْمُواْمِ؞ أَ كَڢَرْنَهُمْ؞
كَلْمُواْمِنْ رَيْ نَهَرْ أَبَدَا
60دَجِنْ حَكَ، سَيْ دَيَوَ دَغَ ثِكِنْ أَلْمَجِرَنْسَ سُكَثٜىٰ «وَنَّنْ مَغَنَ مَيْ وُيَ ثٜىٰ، وَ ذَيْ عِيَ يَكَرْٻٜىٰتَ؟»
61 عِيسَىٰ كُوَ دَيَكٜىٰ يَسَنِ ثٜىٰوَ أَلْمَجِرَنْسَ سُنَ غُنَغُنِ عَكَنْ وَنَّنْ كُواْيَرْوَا، سَيْيَثٜىٰ مُسُ «وَنَّنْ كُواْيَرْوَا تَا ٻَاتَ مُكُ رَيْ نٜىٰ؟ 62تُواْ، يَيَ رَنْكُ ذَيْ ذَمَ كٜىٰنَنْ إِنْ كُكَغَ طَنْ مُتُمْ يَنَ هَوَ ذُوَا عِنْدَ يَڢِتُواْ؟ 63رُوحُ نٜىٰ يَكٜىٰ بَادَ رَيْ؞ جِكِے بَاشِ دَ إِيكُوانْ يِنْ كُواْمٜىٰ؞ كَلْمُواْمِنْدَ نَڢَطَا مُكُ رُوحُ نٜىٰ دَ كُمَ رَيْ؞ 64عَمَّا أَݣَويْ وَطَنْسُنْكُ دَ بَسُ بَادَ غَسْكِيَابَ؞» غَمَا تُنْ ڢَرْكُواْ عِيسَىٰ يَسَنْ وَطَنْدَ بَسُ بَادَ غَسْكِيَابَ دَ كُمَ وَنْدَ ذَيْ بَاشٜىٰشِ؞ 65سَيْ عِيسَىٰ يَڧَارَ دَ ثٜىٰوَ «شِيَسَا نَغَيَ مُكُ ثٜىٰوَ ‹بَابُوَنْدَ ذَيْ عِيَ ذُوَا وُرِينَ، سَيْدَيْ عُبَنْ يَبَاشِ إِيكُواْ؞› »
66بَايَنْ وَنَّنْ مَغَنَرْ دَ عِيسَىٰ يَيِ، سَيْ دَيَوَ دَغَ ثِكِنْ مُتَنٜىٰنْ دَسُكٜىٰ بِنْسَ سُكَ بَرْشِ، سُكَ كُمَ دَيْنَ بِنْسَ؞
67سَيْ عِيسَىٰ يَتَمْبَيِ شَا بِيُنَّنْ يَثٜىٰ «كُو مَا كُنَسُواْ كُتَڢِنٜىٰ؟»
68سِيمَنْ بِتْرُسْ يَأَمْسَ مَسَ يَثٜىٰ «عُبَنْغِجِ، وُرِنْ وَنٜىٰنٜىٰ ذَامُجٜىٰ؟ أَيْ، كَيْنٜىٰ كَكٜىٰ دَ مَغَنَ مَيْ بَادَ رَيْ نَهَرْ أَبَدَا؞ 69مُو كُوَ مُنْ بَادَ غَسْكِيَ، مُنْ كُمَ سَنِ ثٜىٰوَ كَيْنٜىٰ مَيْ ڟَرْكِنَّنْ نَ اللَّهْ؞» #مَتْ 16.16؛ مَرْ 8.29؛ لُكْ 9.20
70سَيْ عِيسَىٰ يَأَمْسَ يَثٜىٰ «نَذَاٻِ دُكَنْكُ غُواْمَشَا بِيُ، عَمَّا طَيَنْكُ شَيْطَنْ نٜىٰ؞» 71وَتُواْ، يَنَ نُڢِنْ يَهُودَ، طَنْ سِيمَنْ إِسْكَرِيُواْتِ، دُوانْ شِينٜىٰ ذَيْ بَاشٜىٰشِ، كُواْدَيَكٜىٰ شِے طَيَ دَغَ ثِكِنْ شَا بِيُنَّنْ نٜىٰ؞
Currently Selected:
يَحْيَى 6: hauAS
Highlight
Share
Copy
Want to have your highlights saved across all your devices? Sign up or sign in
Hausa Common Language Ajami Bible © The Bible Society of Nigeria, 2020
