ڢَارَوَ 8
8
بَبَّرْ أَمْبَلِيَرْ ضُوَ تَا ڢَرَ جَنْيٜىٰوَ
1 اللَّهْ كُوَ يَا تُنَ دَ نُوحُ دَ دُكَنْ دَبُّواْبِنْ دَاجِ دَ نَغِدَا دَسُكٜىٰ عَثِكِنْ جِضْغٍ تَرٜىٰ دَشِ؞ سَيْ يَعَيْكَدَ إِسْكَ تَهُورَ بِسَ دُونِيَا، ضُوَيٜىٰ كُوَ سُكَ جَنْيٜىٰ؞ 2عَكَ تُواْشٜىٰ مَٻُٻُّغَرْ ظُرْڢَڢَّنْ تٜىٰكُنَ دَ تَغُواْغِنْ سَمَ، عَكَ ڟَيَرْدَ ضُوً سَمَ، 3ضُوَيٜىٰ كُوَ أَ حَنْكَلِ سُنْيِ تَجَنْيٜىٰوَ دَغَ ڧَسَا؞ بَايَنْ ݣُونَ طَرِے دَ حَمْسِنْ سَيْ ضُوَيٜىٰنْ سُكَ رَغُ؞ 4أَ رَانَ تَشَا بَݣَويْ غَ وَتَ نَبَݣَويْ، سَيْ ضُوَ يَسَوْكَرْ دَ جِضْغٍ عَكَنْ وَنِ بَبَّنْ تُدُ عَيَنْكِنْ مَنْيَنْ تُدَّنْ أَرَرَاتْ؞ 5ضُوَيٜىٰنْ كُوَ سُكَ ثِيغَبَدَ جَنْيٜىٰوَ حَرْ وَتَ نَغُواْمَ؞ أَ رَانَ تَڢَرْكُواْ غَ وَتَ نَغُواْمَ نٜىٰ كَوُنَنْ مَنْيَنْ تُدَّيْ سُكَ بَيَّنَ؞
6بَايَنْ ݣُونَ أَرْبَعِنْ، سَيْ نُوحُ يَبُوطٜىٰ طَنْ رَامِ أَجِضْغٍ دَ يَيِ، 7سَيْ يَسَكِ حَنْكَكَ؞ حَنْكَكَ كُوَ يَيِ تَكَيْوَ دَ كَٰوُاْوَ حَرْ لُواْكَثِنْ دَ ضُوَيٜىٰنْ سُكَ بُوشٜىٰ عَڧَسَا؞ 8سَيْ يَكُمَ عَيْكِ كُرْثِيَ يَغَنِ كُواْ ضُوَيٜىٰنْ سُنْ جَنْيٜىٰ دَغَ ڧَسَا؞ 9عَمَّا كُرْثِيَرْ بَتَسَامِ وُرِنْ سَا ڧَڢَا بَ، غَمَا أَݣَويْ ضُوَ كُواْعِنَ عَدُونِيَا، دُواْمِنْ حَكَ تَا كُواْمَ وُرِنْسَ؞ سَيْ نُوحُ يَمِيڧَ حَنُّنْسَ يَطَوْكٜىٰتَ، يَشِغَرْدَ عِتَ ثِكِنْ جِضْغٍ؞ 10بَايَنْدَ يَجِرَا ݣُونَ بَݣَويْ كُمَ، سَيْ نُوحُ يَا سَاكٜىٰ سَكِنْ كُرْثِيَرْ تَڢِتَ دَغَ جِضْغٍ؞ 11سَعَدَّ كُرْثِيَرْ تَكُواْمَ دَ يَمَّ، سَيْغَا طَنْيٜىٰنْ غَنْيٜىٰنْ ظَيْتُنْ عَبَاكِنْتَ وَنْدَ تَڟِنْكَ؞ تَهَكَنٜىٰ نُوحُ يَسَنِ ثٜىٰوَ ضُوَيٜىٰ سُنْ جَنْيٜىٰ دَغَ ڧَسَا؞ 12بَايَنْدَ يَجِرَا ݣُونَ بَݣَويْ، سَيْ يَسَاكٜىٰ سَكِنْ كُرْثِيَرْ، عَمَّا بَتَڧَارَ دَاوُاْوَبَ؞
13أَ رَانَ تَڢَرْكُواْ، غَ وَتَ نَڢَرْكُواْ أَ شٜىٰكَرَا تَطَرِے شِدَ دَ طَيَ بَايَنْ حَيْڢُوَرْ نُوحُ، ضُوً يَا بُوشٜىٰ دَغَ ڧَسَا؞ نُوحُ يَا بُوطٜىٰ مُرْڢِنْ جِضْغٍ، سَيْ يَغَ ڢُسْكَرْ ڧَسَا تَنَ كَنْ بُوشٜىٰوَ؞ 14كَاڢِنْ رَانَ تَعَشِرِنْ دَ بَݣَويْ غَ وَتَ نَبِيُ، دُكَنْ ڧَسَا تَا بُوشٜىٰ كَڢْ!
ڢِتُواْوَ دَغَ جِضْغٍ
15سَيْ اللَّهْ يَثٜىٰ وَ نُوحُ، 16«دُكَنْكُ كُڢِتَ دَغَ جِضْغٍ، كَيْ دَ مَاتَرْكَ دَ یَیَنْكَ مَظَا دَ مَاتَنْسُ تَرٜىٰدَكَيْ؞ 17كَڢِتَرْدَ كُواْوَثٜىٰ حَلِتَّ مَيْ رَيْ دَتَكٜىٰ تَرٜىٰدَكَيْ؞ كُواْوَنٜىٰ أَبُ مَيْ رَيْ، ڟُنْڟَيٜىٰ دَ دَبُّواْبِے دَ كُواْوَنٜىٰ أَبُ مَيْ رَرَّڢٜىٰ عَڧَسَا، أَ ڢِتَرْدَسُو، دُواْمِنْ سُثِثِّكَ دُونِيَا، سُيِ تَحَيْڢُوَ سُواْسَيْ، سُيَلْوَتَ عَدُونِيَا؞» 18نُوحُ يَا ڢِتَ دَغَ جِضْغٍ تَرٜىٰدَ مَاتَرْسَ دَ یَیَنْسَ مَظَا دَ مَاتَنْسُ؞ 19كُواْوَنٜىٰ أَبُ مَيْ رَيْ دَ كُواْوَنٜىٰ أَبُ مَيْ رَرَّڢٜىٰ عَڧَسَا دَ كُواْوَنٜىٰ إِرِنْ ڟُنْڟُ دَ كُواْوَنٜىٰ أَبُ مَيْ مُواْڟِ عَڧَسَا، كُواْوَنٜىٰ أَبُ بِسَغَ إِرِنْسَ سُكَ ڢِتَ دَغَ جِضْغٍ دَنْغِ دَنْغِ؞
يَهْوٜىٰهْ يَايِ وَ نُوحُ أَلْڧَوَرِ
20سَيْ نُوحُ يَغِنَ بَغَدٜىٰنْ هَدَايَ غَ يَهْوٜىٰهْ؞ يَا طَوْكَ دَغَ كُواْوَثٜىٰ إِرِنْ دَبَّ مَرَرْ ڧَظَنْتَادَ كُمَ دَغَ كُواْوَنٜىٰ إِرِنْ ڟُنْڟُ مَرَرْ ڧَظَنْتَا يَمِيڧَسُ هَدَايَ تَڧُواْنَاوَا عَكَنْ بَغَدٜىٰنْ؞
21سَعَدَّ يَهْوٜىٰهْ يَا جِ ڧَنْشِنْ هَدَايَرْ سَيْيَثٜىٰ أَ رَنْسَ «كُواْ كَطَنْ بَذَنْ سَاكٜىٰ لَعَنْتَ ڧَسَا سَبُواْدَ طَنْ أَدَمْ بَ، كُواْدَيَكٜىٰ تُنَانِنْ ذُوثِيَارْسَ يَنَ ثِكٜىٰ دَ مُغُنْتَا تُنْ يَنَ ڧَرَمِ؞ بَذَنْ كُمَ سَاكٜىٰ هَلَّكَ كُواْوَنٜىٰ أَبُ مَيْ رَيْ كَمَرْ يَدَّ نَيِبَ؞
22«حَرْ إِيَاكَرْ ݣُونَكِنْ دُونِيَا،
لُواْكَثِنْ شُوكَ إِرِ دَ نَغِرْبِے،
دَ نَسَنْيِ دَ نَذَاڢِ،
دَ نَدَمِنَ دَ نَرَانِ،
دَ رَانَ دَ دَرٜىٰ،
بَذَاسُ دَيْنَبَ؞»
Currently Selected:
ڢَارَوَ 8: hauAS
Highlight
Share
Copy
Want to have your highlights saved across all your devices? Sign up or sign in
Hausa Common Language Ajami Bible © The Bible Society of Nigeria, 2020
