Marko 10

Yesu ƒe nufiafia le srɔ̃gbegbe ŋuti

(Mat 19.1-12; Luk 16.18)

1Yesu dzo le afi ma yi Yudea-nutowo me kple Yordan godo. Ameha gaƒo ƒu ɖe eŋu, eye wògafia nu wo abe ale si wòwɔna la ene.

2Farisitɔ aɖewo va le etem kpɔ hebiae be: “Woɖe mɔ be ŋutsu nagbe srɔ̃a?” 3Yesu bia wo be: “Se kae Mose de na mi?” 4#Mos V, 24.1-4; Mat 5.31. Wogblɔ be: “Mose ɖe mɔ be ŋutsu naŋlɔ srɔ̃gbegbalẽ, ekema wòaɖe asi le srɔ̃a ŋu.” 5Yesu gblɔ na wo be: “Miaƒe tosesẽ tae Mose ŋlɔ se sia na mi ɖo. 6#Mos I, 1.27; 5.2. Tso xexeme ƒe gɔmedzedze me ke la, atsu kple asi Mawu wɔ. 7#Mos I, 2.24. Eya ta ame agblẽ tɔ́a kple nɔa ɖi, alé ɖe srɔ̃a ŋu. 8Wo kple eve la woazu ame ɖeka, elabe tso esia dzi yina la, womeganye ame eve o, ke boŋ wozu ɖeka. 9Eya ta nu si Mawu bla ɖekae la, migana ame nama eme o.”

10Esi wotrɔ va aƒeme la, eƒe nusrɔ̃lawo gabia nu le nya sia ŋuti. 11#Mat 5.32; Kor I, 7.10, 11. Yesu gblɔ na wo be: “Ne ame aɖe agbe srɔ̃a nyɔnu, eye wòaɖe bubu la, ewɔ ahasi ɖe eyama ŋuti. 12Nenema ke ne nyɔnu gbe srɔ̃a, eye wòɖe ŋutsu bubu la, eya hã wɔ ahasi.”

Yesu yra ɖevi suewo

(Mat 19.13-15; Luk 18.15-17)

13Ame aɖewo kplɔ ɖeviwo gbɔna Yesu gbɔ, be wòada asi ɖe wo dzi, ke eƒe nusrɔ̃lawo he nya ɖe ameawo ŋu. 14Esi Yesu kpɔe la, edo dziku, eye wògblɔ na eƒe nusrɔ̃lawo be: “Mina ɖeviawo nava gbɔnye; migaxe mɔ na wo o, elabe ame siawo ƒomevi tɔe nye mawufiaɖuƒe la. 15#Mat 18.3. Mele egblɔm na mi le nyateƒe me be ame si ke mexɔ Mawu ƒe fiaɖuɖu, abe ɖevi ene o la, mage ɖe Mawu ƒe fiaɖuƒe la me o.” 16Tete wòxɔ ɖeviawo ɖe eƒe akɔnu, da asi ɖe wo dzi heyra wo.

Ɖekakpui kesinɔtɔ la

(Mat 19.16-30; Luk 18.18-30)

17Esi Yesu dze mɔ yina la, ame aɖe ƒu du va dze klo nɛ hebiae be: “Nufiala nyui, nu ka mawɔ akpɔ agbe mavɔ?” 18Yesu gblɔ nɛ be: “Ale ke wɔ nèyɔm be ame nyui? Ame nyui aɖeke meli o, negbe Mawu ɖeka ko. 19#Mos II, 20.13; Mos V, 5.17; Mos II, 20.14; Mos V, 5.18; Mos II, 20.15; Mos V, 5.19; Mos II, 20.16; Mos V, 5.20; Mos II, 20.12; Mos V, 5.16. Ènya seawo be: ‘Mègawu ame o; mègawɔ ahasi o; mègafi fi o; mègaɖi aʋatsoɖase o; mègaba ame o; bu tɔ́wò kple nɔwò.’ ” 20Amea gblɔ na Yesu be: “Nufiala, mewɔ esiawo katã dzi tso nye ɖevime ke.” 21Yesu fɔ mo dzi kpɔe, hegblɔ nɛ be: “Nu ɖeka susɔ na wò; heyi nàdzra nu si le asiwò, eye nàtsɔ ga la na ame dahewo, ekema kesinɔnu anɔ dziƒo na wò, ne nàva nɔ yonyeme.” 22Esi ŋutsua se nya siawo la, eƒe mo da tu, eye wòdzo kple nuxaxa, elabe nu geɖe le esi.

23Yesu tsa ŋku godoo hegblɔ na eƒe nusrɔ̃lawo be: “Esesẽ ŋutɔ vavã na ame siwo nye kesinɔtɔwo la be woage ɖe Mawu ƒe fiaɖuɖu te!” 24Esi nusrɔ̃laawo se nya siawo la, wotsi yaa; ke Yesu yi edzi gblɔ na wo be: “Vinyewo, asesẽ ŋutɔ na ame siwo ɖoa dzi ɖe kesinɔnuwo ŋu la, be woage ɖe Mawu ƒe fiaɖuɖu la me! 25Ele bɔbɔe na kposɔ be wòato abui ƒe vo me wu, be kesinɔtɔ nage ɖe Mawu ƒe fiaɖuɖu la me.” 26Nya siawo wɔ nuku na eƒe nusrɔ̃lawo ŋutɔŋutɔ, eye wobia wo nɔewo be: “Ekema ame ka gɔ̃e woate ŋu axɔ ɖe agbe?” 27Yesu kpɔ wo dũu, eye wògblɔ be: “Amegbetɔwo gbɔ la, esia mate ŋu ava eme o, ke mele nenema le Mawu ya gbɔ o, elabe Mawu ya te ŋu wɔa nu sia nu.” 28Tete Petro de asi gbɔgblɔ me nɛ be: “Kpɔ ɖa, míawo ya míegblẽ nuwo katã ɖi hedze yowòme.” 29Yesu gblɔ be: “Nyateƒe tututu tom mele na mi, be ame sia ame si gblẽ eƒe aƒe alo nɔvia ŋutsuwo, alo eƒe agblewo ɖi le nye kple Nyanyui la ta la, 30axɔ teƒeɖoɖo geɖe wu le ɣeyiɣi sia me. Woaɖo xɔ, nɔviŋutsu, nɔvinyɔnu, nɔ, vi kple anyigba siwo katã wògblẽ ɖi la teƒe nɛ zi alafa, hekpe ɖe yometiti ŋu, eye le ɣeyiɣi si le vava ge la me la, akpɔ agbe mavɔ. 31#Mat 20.16; Luk 13.30. Ke ame geɖe siwo nye gbãtɔwo la lava zu mlɔetɔwo, eye mlɔetɔwo lava zu gbãtɔwo.”

Yesu ƒo nu zi etɔ̃lia le eƒe ku ŋuti

(Mat 20.17-19; Luk 18.31-34)

32Yesu kple eƒe nusrɔ̃lawo dze mɔ yina Yerusalem azɔ. Yesu dze wo ŋgɔ, eye esia wɔ mo yaa na wo; ame siwo dze wo yome la le vɔvɔ̃m. Egayɔ nusrɔ̃la wui eveawo va eɖokui gbɔ, eye wògade asi nu siwo le dzɔdzɔ ge ɖe edzi la gbɔgblɔ me na wo be: 33“Miɖo to ne miasee ɖa! Míeyina Yerusalem; woatsɔ Amegbetɔ Vi la ade asi na nunɔlagãwo kple agbalẽfialawo; woatso kufia nɛ, eye woadee asi na ame siwo menye Yudatɔwo o la. 34Woaɖu fewu le eŋu, aɖe ta ɖe eŋu, woaƒoe kple atam, eye woawui; ke le ŋkeke etɔ̃a gbe la afɔ ɖe tsitre.”

Yakobo kple Yohanes ƒe nubiabia

(Mat 20.20-28)

35Yakobo kple Yohanes, Zebedeo viawo, te ɖe Yesu ŋu gblɔ nɛ be: “Nufiala, míedi be nàwɔ nu si ke míabia wò la na mí.” 36Ebia wo be: “Nu ka dim miele be mawɔ na mi?” 37Wogblɔ nɛ be: “Ne èɖo wò ŋutikɔkɔe me la, nàna be mía dometɔ ɖeka nabɔbɔ nɔ wò ɖusime, eye evelia nanɔ wò miame.” 38#Luk 12.50. Yesu gblɔ na wo be: “Mienya nu si biam miele la o. Ɖe miate ŋu ano nu le veve ƒe kplu si nu mele nu no ge le la, alo axɔ mawutsilele si woale nam la?” 39Woɖo eŋu nɛ be: “Míate ŋui.” Yesu gblɔ na wo be: “Miano nu le kplu si nu mele nu no ge le; mawutsi, si woale nam la, woalee na miawo hã ya. 40Gake be mianɔ anyi ɖe nye ɖusime alo miame la, eya menye nyee aɖe mɔ le eŋuti o. Ame siwo wodzrae ɖo ɖi na la tɔ wònye.” 41Esi ame ewoawo se Yakobo kple Yohanes ƒe biabia la la, wodo dziku ɖe wo ŋu. 42#Luk 22.25, 26. Yesu yɔ wo va eɖokui gbɔ gblɔ na wo be: “Mienyae be ame siwo wobuna be wonye tatɔwo na trɔ̃subɔlawo la ɖua amegã ɖe wo dzi, eye woƒe kplɔlawo kpɔa ŋusẽ blibo ɖe wo dzi. 43#Mat 23.11; Mar 9.35; Luk 22.26. Ke meganɔ nenema le miawo ya mia dome o. Ame si di be yeanye amegã le mia dome la, nanye miaƒe subɔla, 44eye ame si ke di be yeanye gbãtɔ le mia dome la, nanye amewo katã subɔla. 45Elabe Amegbetɔ Vi la gɔ̃ hã meva be woasubɔ ye o, ke boŋ be yeasubɔ amewo, eye yeatsɔ yeƒe agbe ana, bene woaxɔ ame geɖe.”

Yesu ʋu ŋku na Bartimeo, ŋkuagbãtɔ la

(Mat 20.29-34; Luk 18.35-43)

46Wova ɖo Yerixo. Esi Yesu kple eƒe nusrɔ̃lawo kpakple ameha gã aɖe dzo le Yerixo-dua me yina la, Bartimeo, Timeo vi, si nye nubiala ŋkuagbãtɔ la, nɔ anyi ɖe mɔ to. 47Esi wòse be Yesu Nazaretetɔ lae va yina la, ede asi ɣlidodo me be: “Yesu, David Vi, kpɔ nublanui nam!” 48Ame geɖewo nyra ɖee be nezi ɖoɖoe. Ke eya do ɣli sesĩe ɖe edzi wu be: “David Vi lee, kpɔ nublanui nam dzro!” 49Yesu tɔ hegblɔ be: “Miyɔe ɖa.” Woyɔ ŋkuagbãtɔ la, gblɔ nɛ be: “Wò dzi nedze eme. Tso va; ele yɔwòm.” 50Eɖe asi le dziwui si le eŋu la ŋu ƒu gbe, eye wòti kpo va Yesu gbɔ. 51Yesu biae be: “Nu ka nèdi be mawɔ na ye?” Ŋkuagbãtɔ la gblɔ nɛ be: “Nufiala, na makpɔ nu.” 52Yesu gblɔ nɛ be: “Heyi; wò xɔse da gbe le ŋuwò.” Enumake ŋkuagbãtɔ la ƒe ŋku ʋu, eye wòdze Yesu yome le mɔa dzi.

Currently Selected:

Marko 10: EB14

Highlight

Copy