Yowanu 6
6
Yesu hakudiisha makombakaji atanu
(Mat 14:13-21; Mak 6:30-44; Luk 9:10-17)
1Kulondela hayumiyi Yesu hakufumaku, hakuya kwishinadi dikwawu dejiya daŊaliliya dodaTiberasi.
2Hikukumulondela izaza deneni dawantu muloŋa anamoni dehi yinjikijilu yelililiyi ákata.
3Yesu hakukanduka hampidi, hakushakama kwenoku nawatumbanji twindi.
4Henohu Chipandakenu, chawija chawaYudeya, chashika dehi kwakwihi.
5Dichi Yesu hakufumbula mesu, hakumona antu amavulu adi nakwinza kudi yena, hakumwila #1:43Fwilipu nindi, Kudya tukulanda kudihi kulonda antu awa adyi?
6Chenochu wachihosheli nindi amweseki nachu; muloŋa yomweni neluki chakukeŋa kwilayi.
7Fwilipu hakumwakula nindi, Yakudya yakulanda namali nkulakaji jiyedi (200) kulonda antu ejima atambuli kanti kanti, hiyikuwaninaku.
8Kambanji kindi wumu, #1:40Anderi manakwaShimona Petulu,
9hakumwila nindi, Kunu kudi kakansi kakweti mankendi abali atanu, ninshi janyanya jiyedi; indi yeniyi antu amavulu chishikahichi akuyiwanina?
10Yesu hakwila nindi, Yishakamishenu antu. Henohu hadiŋi matahu amavulu. Amayala ashakamini; kuyichinda ashikili neyi kwiji makombakaji atanu (5,000).
11Yesu hakutambula owu mankendi; chanasakililiyi, hakuyanjaŋena antu anashakami; ninshi nawa mwomumu, mwonsu mwakeŋeleluwu.
12Chanekutuwu, hakuyileja atumbanji twindi nindi, Nonenu yibalu yinashaluhu kulonda tubuli kuyikisaŋana.
13Ayinona nikuyinona, hiyakwinzesha mahebi ikumi nayedi (12) nayibalu yamankendi abali atanu yashiyiluwu antu heliluwu anadyi dehi.
14Dichi antu chanamonuwu chinjikijilu cheliliyi, hiyakwila nawu, Chalala yeniwu diyi kaprofwetu elaŋawu nawu wakenza mumpata yamunu mwishina.
15Yesu chanamoniyi antu hiyakukeŋa kwinza nakumukwata naŋovu amukanjikiji kudya wanta, hakuwombolokela kumpidi kwakankawindi.
Yesu hakwenda hamenji
(Mat 14:22-27; Mak 6:45-52)
16Chikuneli dehi melela atumbanji twindi hiyakukunkumukila kwijiya, eŋila nimuwatu.
17Hiyakuzambuka hejiya, nawu ayi kuKaperinamu. Henohu kuneli dehi wufuku, Yesu niyena wuchidi kanda enzi kudi wena.
18Ijiya hidikutachika kwila mankanda amaneni, muloŋa wampepela yeneni yadiŋi nakukunka.
19Cheliluwu wena anavuwi dehi 4 km indi kwiji 5 km, hiyakumona Yesu wudi nakwenda hamenji, wudi nakuswila kwakwihi nawatu. Afwa nimutentu.
20Yena hakuyila nindi, Yami aweni, bayi mutiya womaku.
21Atiya nikuwaha kumwiŋija muwatu; hohenohu watu wushika nikuchikumu kwadiŋi nakuyawu.
22Chikunachi, izaza dasheli kwishinadi dejiya amona nawu kwadiŋi watu wumu hohu, nawu Yesu heŋila muwatu owu hamu nawatumbanji twinduku, afumaku kankawawu.
23Ilaŋa kuTiberasi hikukufuma tumaatu twacheŋi, hitukushika kwakwihi nakwadiilawu mankendi, helili Mwanta nasakilili dehi.
24Dichi izaza dawantu chabulili kumonawu Yesu, hela atumbanji twindi, wena hiyakwiŋila mutumaatu otu, hiyakuya nakumukeŋakeŋa Yesu kuKaperinamu.
Yesu hidinkendi dawumi
25Chanamuwanuwu kwishinadi dejiya hiyakumwila nawu, Eyi Rabi, wenza kunu ifukwinyi?
26Yesu hakuyakula nindi, Chalala chalala, nukuyileja nami, chimunankeŋakeŋi hichinafumi hakumona yinjikijiluku, chinafumi hakwikuta mankendi mwadya.
27Bayi mukalakelaŋa yakudya yanoŋaŋaku, chiŋa yakudya yashikaŋa nikuwumi wahayanyaka yakuyinkayi Mwana kaMuntu, diyi anafunduwu mufunda kudi Tata Nzambi.
28Hiyakumwihula nawu, Chiŋa twili ŋahi kulonda tukalakalaŋa nyidimu yaNzambi?
29Yesu hakwakula nindi, Mudimu wakumukalakela Nzambi yowu kukuhwelela yena átemesheliyi.
30Dichi wena hiyakumwihula nawu, Wukwila #Mat 12:38; Mak 8:11chinjikijilwinyi tuchimoni, tukukuhweleli? Wukukoŋadi?
31Ankakulula jetu adiilaŋa #Kuch 11:7-9; Neh 9:15; Mas 78:24manina muchinkalampata, mwomwanasonekuwu munyikanda yajila nawu, Wayinkeli dinkendi dakufuma mwiwulu, adyi.
32Kuchinka Yesu nindi, Chalala chalala, nukuyileja nami, Mosi hidiyi wayinkeli dinkendi dakufuma mwiwuluku. Tata yami diyi wayinkaŋa dinkendi dalala dakufuma mwiwulu.
33Muloŋa dinkendi daNzambi diyi owu wasulukili mwiwulu, wenkaŋa akwampata yamunu mwishina wumi.
34Hiyakumwila nawu, Mwanta, atwinki dinkendi odu mafuku ejima.
35Yesu hakuyila nindi, Ami yami dinkendi dawumi; muntu wukwinza kudami hakutiya cheŋi nzalaku, muntu wukunkuhwelela hamba katiya cheŋi mpwilaku.
36Ilaŋa ami nayileji dehi nami, munanmoni dehi, enu kukuhwelela nehi.
37Ejima #17:2, 24akunyinkayi Tata diwu akwinza kudami; muntu wukwinza kudami, ami hinakamuumbaku.
38Ichi chinasuluki mwiwulu hinalondi kwila muchima wamami awenuku, nalondi kwila muchima wayena #4:34wantemesheli.
39Muchima wayena wantemesheli, nakeŋi yuma yejima yananyinkiyi nibuli #17:12; 18:9kujimbeshahu hela chimu, chiŋa nakachisaŋula hefuku dakukuminina.
40Muloŋa weniwu diwu muchima waTata yami, nakeŋi nindi antu ejima áshinshikaŋa Mwana nakumukuhwelela, muntu himuntu, amoni wumi wahayanyaka, ninami nakamusaŋula hefuku dakukuminina.
41AYudeya hiyakumutobela nanochu cheliliyi nindi, Yami dinkendi dasulukili mwiwulu.
42Hiyakwila nawu, Yeniwu hidiyi Yesu, mwana #Luk 4:22kaYosefuku? Tata yindi namama yindi twayiluka. Indi yena welaŋa ŋahi nindi, Ami nasulukili mwiwulu?
43Yesu hakuyakula nindi, Bayi mutobaŋaku.
44Kwosi muntu natweshi kwinza kudami chakadi #12:32; Yer 31:3; Hos 11:4kumukoka kudi Tata wantemesheluku, ninami nakamusaŋula hefuku dakukuminina.
45Anasoneki munyikanda yawatuprofwetu nawu, Antu ejima #Isa 54:13; 1 Tes 4:9akayitaŋisha kudi Nzambi. Antu ejima anatiyilili Tata, anashinshikumu, diwu akwinza kudami.
46Hikwekala muntu wamonahu dehi Tataku, chiŋa iwu wafumini kudi Nzambi, diyi namoni Tata.
47Chalala chalala, nukuyileja nami, muntu wukunkuhwelela wukweti wumi wahayanyaka.
48Ami yami dinkendi dawumi.
49Ankakulula jenu adiili manina muchinkalampata; afwili dehi.
50Dinkendi dakudyayi muntu abuli kufwa, didu dinasuluki mwiwulu.
51Ami yami dinkendi dikweti wumi dasulukili mwiwulu. Neyi muntu wukudya kudinkendidi wakahandaŋa #3:14-15hayanyaka. Eŋa, dinkendi dinakayinka antu ampata yamunu mwishina kulonda ahandi, diwu musunyi wami.
52AYudeya #3:4; 4:9hiyakutadika ntadi mukachi kawu, nawu, Muntu iwu wukutwesha kutwinka musunyi windi ŋahi, mwaka tuwidyi?
53Dichi Yesu hakuyila nindi, Chalala chalala, nukuyileja nami, neyi mukubula kudya musunyi waMwana kaMuntu, mubula kunwa nimashi indi, himukwikala nawumi mudenu awenuku.
54Muntu wadyaŋa musunyi wami, wanwaŋa nimashi ami, diyi wukweti wumi wahayanyaka; ami nakamusaŋula hefuku dakukuminina.
55Muloŋa musunyi wami hikudya kwalala, mashi ami hikunwa kwalala.
56Muntu wadyaŋa musunyi wami, wanwaŋa nimashi ami, diyi #15:4; 1 Yow 2:24; 3:24; 4:15-16washakamaŋa mudami, ninami mudi yena.
57Chantemesheliyi Tata #5:26; Mat 16:16wamumi, ninami chinahandilaŋa kudi Tata, dichi chakahandaŋayi nimuntu waŋudyaŋa.
58Denidi didu dinkendi dasulukili mwiwulu; hididi neyi dadiili ankakululaku, niwena afwa dehi; muntu wukudya dinkendidi wakahanda hayanyaka.
59Mazu awa wayihosheli mushikola chadiŋi nakutaŋishayi kuKaperinamu.
Atumbanji amavulu hiyakumushiya Yesu
60Chachitiyiluwu atumbanji twindi amavulu hiyakwila nawu, Mazu awa akala, wukutwesha kutiyamu hinyi?
61Yesu welukili mumuchima windi chadiŋi nakutobawu atumbanji hachumichi; hakuyila nindi, Munamoni chumichi kukala, tahindi?
62Indi neyi mwakamona Mwana kaMuntu hakukandama kwadiŋilaŋayi?
63Spiritu diyi wahandishaŋa, kumusunyi hiwukumwenaku chumaku. Mazu awa inahoshi nanenu, diwu #2 Kor 3:6spiritu, diwu wumi.
64Ilaŋa hadenu hadi amu abula kukuhwelela. Muloŋa Yesu #2:25welukili kufumisha kutachi, ninawa abulili kukuhwelela, niwamba kamufukeja.
65Yena nindi, Dichi nayileji nami, kwosi muntu wukutwesha kwinza kudamuku, chiŋa amwinkachu kudi Tata.
66Henohu atumbanji twindi amakwawu hiyakufuntamu, kwenda nawa cheŋi nindi nehi.
67Dichi Yesu hakwihula ikumi nayedi (12) nindi, Ninenu nawa keŋa muyi kwenu, tahindi?
68Kuchinka Shimona Petulu nindi, Tukuya kudinyi? Eyi yeyi wukweti mazu awumi wahayanyaka.
69Tunakuhweleli, tuneluki netu eyi yeyi Wajila waNzambi.
70Yesu hakuyakula nindi, Ami #15:16, 19hinayitondeli enu ikumi nayeduku? Ilaŋa mwinenu wumu hidiyabolu.
71Komana hakutena Yudasi, mwana kaShimona Isakaroti, muloŋa diyi wamba kamufukeja, diyi wahekumi nayedi (12).
Currently Selected:
Yowanu 6: MWW04
Highlight
Share
Copy
Want to have your highlights saved across all your devices? Sign up or sign in
The Holy Bible in Lunda Ndembu © United Bible Societies, 2003.
