Lukə 2

Vra' Zezu

(Mat 1.18-25)

1Kəri rum, jwə mə mbri mə nya Romə mə ɗe kə Ogustə ne dan dlay məni na: «Say sôwâ nya Romə daŋ' wây' semɗe nday də wə ɗerwa.» 2Mum nə dan wây' tu mə vun kofo məni gi kəri məni Kiriniyus suk toŋ wa nya Siri. 3Sôwâ daŋ' ta wây' semɗe nday, sasu daŋ' wə ri vra' umu.

4Zozef car mbə so Nazaret nya Galile kədan mum də so mə ɗe kə Betlehem nya Zude, wə ri məni jwə David vra' wə han, zə mum vay rawti David na. 5Mum ta han kədan mum wây' semɗe rum kə nja um Mari məni ne ur si. 6Kəri məni handay wə han ɓo, ri vra' sə mbə daya. 7Ta vra' vay mə nji vun kofo, ta ku' num kə zim ɓay ge num wə ri njay vok nda', zə ri bar cu zə nday wə so dam rəkway mi.

Daw ji cime kə sum sin Ifray mə wafraya

8Wə nya rum daw ji cime kəta' gay' rəka wə ji kul cime nday kə dukri. 9Vay sin Bârî mə wafray dam mbə hay' nday ɓay mbra' Bârî ɗeri mbə wa ndaya. Kwa rum gi wəlok ne nday juku. 10Ama vay sin Ifray mə wafray nə la' ne ndaya: «I ne wəlok mi, zə na mbə ni kə dan mə kəɗam məni də gi sôwâ daŋ' tuk kəɗama. 11Kə dukri mə tam nə, Bə Siɗ vra' zə ri wə so David. Mum nə Kris, Bârî na. 12Ɓay kwa məni wə də ta' kwa rum mi ne nə ni na: Hi də za' vay gule ku' kə zim ɓay ge wə ri kwa njay vok nda'a.»

13Kəkor sar, sum sin Ifray mə wafray raw car mbə wafray mbə ɓa nji kə vay sin Ifray mə wafray na. Handay təŋ kə bur Ifray kə ini:

14«Mbra' hay' Ifray mə wafray,

ɓay heɓ du sôwâ məni mum wə bə wa nya!»

15Kəri məni sum sin Ifray mə wafray kuni 'ya faŋ ta wafray, daw ji cime in dan kə nji mbok nji: «Mə də so Betlehem kədan mə də kar kwa məni gi wə han, kwa məni Bârî ta' ne mba.» 16Handay 'ya kə ɗəma ta han, ɓay handay ta za' Mari kə Zozef ɓay vay gule məni ge wə ri kwa njay vok nda'a. 17Kəri məni handay we vay nə, handay təŋ kə pla' dan məni vay sin Ifray in ne nday wa vay nə ne kə sôwâ. 18Dan rum jin' wa ne kə sôwâ daŋ' məni mun dan məni daw ji cime in ne ndaya. 19Ama Mari kaw dan rum daŋ' wə wa sə, kə ɗik dan wa rum wə vunduk sa. 20Kəki rum, daw ji cime faŋ 'ya, handay təŋ kə gi mbra' ne kə Ifray ɓay um bur zə dan kwa daŋ' məni handay mun ɓay we, zə kwa rum daŋ' gi ce' ndə məni vay sin Ifray nə in ne ndaya.

Sôwâ cin sem vay rumu

21Kəki bəka coho' gi, kəri məni handay tagura vay nə, handay cin sem rum ɗe kə Zezu. Mum nə sem məni vay sin Ifray mə wafray ta' ne kə ya um cop ka ta cu ɓaɓo ɗum ur məto'o#Lev 12.3; Luk 1.31.

Sôwâ mbə kə Zezu wə rawti so po' fur sôwâ Zuwif

22Kəri məni bəka no' sem mbi məni Moyizə ne dan dlay wa rum mbə day, Zozef kə Mari mbə kə vay nday wə so Jeruzalem kədan handay ta' ne kə Bârî, 23zə dan dlay Bârî wə ini: Daw njiwkwa daŋ' məni vra' vun kofo də ke mə Bârî#Psi 12.2,12. 24Handay wə po' fur kə kuruk mə so hoɓ ko daw kuruk mə gop hoɓ ce' ndə məni dan dlay Bârî ini.

25Swə məsin kəta' wə so Jeruzalem ɗe kə Simeyoŋ. Mum swə mə njeŋe. Mum wə ô Ifray, ɓay wə ji swə məni wə də mbə kədan mum siɗ sôwâ Israyel. Simbeɗ kəleŋ kəta' kə Simeyoŋ. 26Mum ta' ne num kə Simbeɗ mə Kəleŋ i mum cu də mar cop dan we Kris məni Bârî də sin nə mi. 27Simbeɗ Ifray ta' num kədan mum də so po' fur sôwâ Zuwif. Kəri məni ba Zezu kə ya um mbə kə vay nday kədan handay də gi kə rum ce' ndə məni dan dlay in, 28Simeyoŋ tle num wə ɓa ɓay gi soko ne kə Ifray kə ini:

29«Bârî, dan ge wû nə gi si,

ɓay mgbaŋ ni nə ha gak ar bə sin wû də heɓe.

30Zə i rin we siɗ wû si,

31siɗ məni ha gi wə kor sôwâ daŋ'ŋ.

32Mum nə ri mə ɓu məni wə də ta' vari wû ne kə sôwâ məni

cu zə saŋ sôwâ Zuwif mi,

ɓay də ne mbra' ne kə sôwâ wû, Israyel#Esa 42.6; 49.6; 52.10.»

33Dan məni Simeyoŋ in wa vay nə jin' wa ne kə ba Zezu kə ya umu. 34Simeyoŋ kuswa' nday ɓay la' ne kə Mari, ya Zezu: «Əŋ kar, Ifray par vay məni nə kədan sôwâ Israyel juk də vi' ɓay sôwâ Israyel məsin də siɗi. Mum də ke ce' ndə kwata' Ifray məni sôwâ də vaɗ 35ɓay ndəna' dan ɗik vunduk sôwâ juk də wur də rəka. Ɓay dan ɗik də kap vunduk riŋ ce' ndə ciwi.»

36I ka' dan kəta' wə han sə ɗe kə Hana, vay swə mə ɗe kə Fanuyel məni wə du bray Aser. Ta kətok si. Kəri məni ta ke way, ta cin nji ɓay suk kə rum kim seɗa' sar, 37kəki mar nji sə, ta suk rənda hâ kim sə day gucoho' wa fəɗi'i. Ta cu ar so po' fur sôwâ Zuwif kpe mi. Ta wə gi sin zə Ifray wə han fəta kə dukri daŋ'ŋ. Ta wə saŋ kwa ɓay in dan kə Ifray ta'a. 38Kəri rum, ta mbə day hay' nday ɓay təŋ kə gi soko ne kə Ifraya. Ɓay ta təŋ kə in dan wa vay nə ne kə sôwâ daŋ' məni wə ji i Ifray də tumwa sôwâ so Jeruzalem.

Sôwâ Zezu faŋ ta so Nazaret

39Kəri məni ba Zezu kə ya um gi kwa məni dan dlay Bârî in nə ndo' si, handay faŋ ta wə so Nazaret nya Galile kə vay ndaya. 40Vay nə mbuɗ ɓay vunduk um jeŋ kə ɗik dan mə ɓay ta'a. Mum kə gwet, ɓay kuswa' Ifray kəta' kə rumu.

Zezu mbə so po' fur kə kim guɓ wa hoɓo

41Kə kim daŋ', ba Zezu kə ya um wə də so Jeruzalem kədan handay gi cer sôwâ Zuwif mə ɗe kə Pakə wə hana#Psi 12.1-27. 42Kəri məni Zezu gi kim guɓ wa hoɓ, handay ta gi cer ce' ndə məni handay wə gi ɓa'a. 43Kəri məni cer gi ndo' si, handay faŋ 'ya vari so nday, ama vay nday, Zezu, gwa' suk wə so Jeruzalem. Ba um kə ya um cu we dan rum mi. 44Handay ɗik i Zezu kəta' wə du sôwâ məni wə ta vari kə ndaya. Zə rum, handay ta hâ gi bəka ɗawa. Handay faŋ təŋ kə um keɓ du bray nday kə bây ndaya. 45Ama handay cu za' num mi, zə rum, handay faŋ ta so Jeruzalem kədan handay um keɓ wə hana. 46Kə bəka hinji' rum, handay za' num wə rawti so po' fur sôwâ Zuwif, mum suk wə du sum ta' kwa Zuwif. Mum wə mun dan ta' nday ɓay wə ci vun nday ta'a. 47Gwet um kə dan ɗam um jin' wa ne kə sôwâ daŋ' məni mun dan umu. 48Kəri məni ba um kə ya um we ndəna', kwa rum jin' wa ne nday ɓay ya um la' ne numu: «Vay man, zə mi ha gi mba ndəna' su? Ba wû kə na, namba ke ɗik dan juk kə wû keɓe.» 49Mum ɗam vun ndaya: «Zə mi hi man keɓ su? Hi cu we i say a suk rawti so Ba man nə mi su?» 50Ama handay cu mun zu dan məni mum wə nday in ne nə mi.

51Zezu faŋ ta so Nazaret kə ndaya. Mum mun vun ndaya. Ya um kaw dan kwa məni gi kuni daŋ' wə vunduk sa. 52Ɓay Zezu wə mbuɗ kə tu ɓay wə jeŋ də kofo kə gwet, ɓay mum wə gi kwa məni kəɗam tu Ifray kə sumra'a#1Sa 2.26; Vmi 3.4.

Currently Selected:

Lukə 2: KMN

Highlight

Copy