Lukə 1
1
1Sôwâ juk tuk wây' dan kwa məni gi wə du mba. 2Handay wây' dan kwa məni namba mun wə hay' sôwâ məni we kwa rum kə i nday daka təŋ zu rumu. Ifray da' nday kədan handay faŋ sum sin umu. 3Ɓay mgbaŋ ni nə, na ta', na keɓ zu dan rum njeŋ daka təŋ zu rum, ɓay na kar ɓay kədan na wû wây' dan rum ne kə vari rum, Teyofil, swə mə ɓaya. 4Na gi ndəna' kədan ha gak we njeŋ dan kwa məni sôwâ məsin ta' ne nu na.
Vay sin Ifray mbə ka' dan vra' Zaŋ-Baptistə
5Kəri məni Herodə suk jwə nya Zude, bə po' fur məsin kəta' ɗe kə Zakariya, mum wə du kul sum po' fur mə Abiya. Ma rum ɗe kə Elizabet, ta zu tlor bə po' fur mə ɗe kə Aron#1Izd 24.10. 6Handay hoɓ jak njeŋ kor Ifray, ɓay handay wə mun vun dan dlay Bârî daŋ' kə ta zə rum njeŋ ta'a. 7Ama handay cu kə vay mi, zə Elizabet ca lər si, ɓay handay hoɓ jak kəsa' si.
8Fəta məsin, Zakariya wə po' fur kor Ifray, zə ri sin mə kul mə mum mbə day si. 9Ce' ndə məni vun fur sum po' fur wə gi, handay par num kə vari parwa kədan mum ze də rawti so po' fur Bârî ɓay ge ku kwa mə sî ndə urdi wə hana. 10Kəri məni mum wə ge ku kwa mə sî ndə urdi, sôwâ Ifray daŋ' gay' rəka wə in dan kə Ifraya. 11Kəri rum, vay sin Bârî mə wafray mbə hay' Zakariya. Mum mbə car ga' ɓa fun ri po' fur məni handay wə ge ku kwa mə sî ndə urdi. 12Kəri məni Zakariya we num, vunduk par num, ɓay wəlok gi num juku. 13Ama vay sin Ifray mə wafray nə la' ne numu: «A ne wəlok mi, Zakariya, zə Ifray mun kwa o wû si. Ma ru, Elizabet də vra' vay mə nji wû ne ɓay a də ɗe num kə Zaŋ. 14Ha də tuk kəɗam juk, ɓay sôwâ juk də tuk kəɗam kə vra' umu. 15Zə mum də ke swə mə toŋ kor Bârî. Mum cu də ce sum viŋə ko kwace məsin məni wə gi tu gi mi. Mum də nyen kə Simbeɗ mə Kəleŋ daka rawti ya umu#Irs 6.3. 16Mum də gi sôwâ Israyel juk faŋ mbə hay' Bârî Ifray ndaya. 17Mum kə tu rum də ta kofo Ifray kə Simbeɗ kə gbəgboŋ wanji ɗaw kə bə ka' dan mə ɗe kə Eliya. Mum də cin heɓ mbok ba daw kə daw ndaya. Mum də gi sôwâ mə faŋ sôwâ məni wə gi wa ɓokrok ɗik dan ce' ndə sôwâ mə njeŋ wə ɗiki. Mum də gila' vunduk sôwâ zə mbə Bârî.»
18Ama Zakariya ci vun vay sin Ifray mə wafray na: «Na də we i dan məni nə dan mə kəzin' ma su? Na kəsa' si, ɓay ma rin gi kim raw si ta'a.» 19Ɓay vay sin Ifray mə wafray nə ɗam vun rumu: «Na Gabriyel. Na wə car kor Ifray kə gi sin umu. Mum sin nan kədan na ge dan kə ru ɓay wû ne dan mə kəɗam məni na#Dan 8.6; 9.21. 20Ama zə ha cu ve dan man məni wə də gi kəzin' kəri rum nə mi, ha də faŋ ndum, ɓay ha cu gak də ge dan mi, hâ bəka kwa məni na in ne nu də gi.»
21Kəri rum, sôwâ məni gay' rəka wə in dan kə Ifray wə ji Zakariya, ɓay handay təŋ kə ɗik dana: «Zə mi mum suk hâ wə rawti so po' fur su?» 22Ama kəri məni mum pâ mbə rəka, mum cu gak ge dan kə nday mi, ɓay handay ɗik i mum we kwa wə rawti so po' furu. Mum in dan ne nday kə ɓa, zə mum cu gak dan mi.
23Kəri məni sin um ndo' si, mum 'ya vari so umu. 24Kəki rum kî, ma rum, Elizabet, ɗum ur, ɓay ta pe' dan rum hâ cer vatla. Ta ini: 25«Bârî gi kwa məni nə zə rini. Mum gi ndəna' kəri məni mum tle i kar nan kədan mum man ulay' mbə du dan mə zur man məni wə kor sôwâ.»
Vay sin Ifray mə wafray mbə ka' dan vra' Zezu
26Du cer kanki' rum, Ifray sin vay sin um mə wafray mə ɗe kə Gabriyel wə so Nazaret nya Galile, 27hay' way mə ɗe kə Mari. Ta nja swə mə ɗe kə Zozef, vay rawti David. 28Vay sin Ifray mə wafray nə ze ta hay' sə ɓay la' ne sa: «Na kaw jeɓ riŋ, həŋ məti Ifray ne naŋ ɓay umu. Bârî kəta' kə riŋi.» 29Kwa rum jin' wa ne kə Mari, ɓay ta ci vun wə vunduk sa: «Dan kaw jeɓ məni nə wa' ta' mi su?» 30Vay sin Ifray mə wafray nə la' ne sa: «Əŋ ne wəlok mi, Mari, zə Ifray gi ɓay um hay' riŋi. 31Həŋ də ɗum ur ɓay də vra' vay mə nji, ɓay əŋ də ɗe num kə Zezu. 32Mum də ke toŋ, ɓay sôwâ də um ɗe kə Vay Swə mə Wafraya. Bârî Ifray də um ne jwə ba mbri um David#2Sa 7.12,16; Esa 9.7, 33ɓay mum də suk jwə wa sôwâ Israyel də hâ, jwə um cu də ndo' vun kpe mi.»
34Mari la' ne kə vay sin Ifray mə wafray na: «Kwa rum gak də gi ndəna' ma su zə na cu we səmanji ta' mi?»
35Vay sin Ifray mə wafray nə ɗam vun sa: «Simbeɗ mə Kəleŋ də mbə wa riŋ, ɓay gbəgboŋ Swə mə Wafray də maŋ kəmbo' ce' ndə njəɓo. Zə rum, sôwâ də ɗe vay məni həŋ wə də vra' nə ke vay mə Kəleŋ, ɓay handay də um ɗe kə Vay Ifraya. 36Ibray maŋ, Elizabet, məti gi kim raw si, ta ɗum ur vay mə nji. Sôwâ wə in i ta cu gak vra' vay za' mi, ama mgbaŋ ni nə ta kə ur cer kanki'i. 37Zə Ifray gak gi kwa daŋ'ŋ#Tzk 18.14.»
38Zə rum Mari ini: «Na nə bek Bârî na. Na wa' i kwa rum mbə gi wa rin ce' ndə məni ha ini.» Ɓay vay sin Ifray mə wafray nə 'ya ar sa.
Mari ta kar Elizabet
39Kəki rum kî, Mari 'ya tle vari mə də so məni wə du gway' nya Zude kə ɗəma. 40Ta ze ta so Zakariya ɓay kaw jeɓ Elizabet. 41Kəri məni Elizabet mun wor kaw jeɓ Mari, vay məni wə rawti sə nyen tu, ɓay Simbeɗ mə Kəleŋ dam mbə wa sa. 42Elizabet tle wor ta fray ini: «Ifray kuswa' naŋ pâ rawkwa daŋ', ɓay kuswa' um suk wa vay məni həŋ wə də vra'a! 43Na nə sa, kədan ya Bârî mbə so man nə su? 44Əŋ kar ri'i! Kəri məni na mun wor kaw jeɓ maŋ, vay məni wə rawti rin nyen tu kə tuk kəɗama! 45Dan rum kəɗam hay' riŋ, zə həŋ ve dan məni Bârî in ne naŋ wə də gi ndə na'a!»
Nyem Mari
46Mari faŋ ini:
«Vunduk rin wə mbâ Bârî,
47ɓay jeke tu rin tuk kəɗam
zə Ifray, Bə Siɗ mana.
48Zə mum we ca məni i bek um wə ta' na.
Daka mgbaŋ ni nə sôwâ daŋ' wə də man ɗe kə
ma mə tuk kəɗam,
49zə Ifray mə kə gbəgboŋ daŋ' nə gi
kwa mə toŋ hay' rini:
Semɗe rum kəleŋe.
50Mum we ca wa sôwâ məni wə ne wəlok um
daka zə bây buwa kə buwa də hâ.
51Mum gi sin mə toŋ kə gbəgboŋ ɓa rum,
ɓay mum pla' wa sôwâ məni wə mbra' tu wə vunduk nday ta rəka.
52Mum pla' sum jwə wa kwasuk nday njay ta nya,
ɓay mum faŋ mbra' sum ca.
53Mum ndak sôwâ məni kə mê' kə kwa mə ɓay,
ɓay mum 'way sum ndak pik kə ɓa uraya.
54Mum mbə jin sôwâ Israyel, sum sin umu.
Mum ɗik dan we ca um
55hay' Abraham kə daw rawti rum də hâ nə mi#1Sa 2.1-10.
Mum gi ndəna' zə mum kawvun wa rum kə ba mbri ramba.»
56Mari suk kə Elizabet gi kwa mə cer hinji', ɓay ta faŋ ta so sa.
Vra' Zaŋ-Baptistə
57Ri vra' Elizabet mbə day, ɓay ta vra' vay mə nji. 58Jik Elizabet kə bray sə mun kuni i Bârî ta' we ca um mə mbri hay' sə, ɓay handay tuk kəɗam kə sa. 59Kəri məni vay nə gi bəka coho', handay mbə kədan handay tagura rumu. Handay wa' kədan handay cin sem rum ɗe kə sem ba um, Zakariya#Lev 12.3. 60Ama ya um ɗam vun ndaya: «Cu ndəna' mi, namba ɗe num kə Zaŋ.» 61Handay faŋ la' ne sa: «Ama swə ɗaw du bray maŋ mə kə semɗe məni nə cu mi.»
62Handay faŋ ci vun ba vay kə ɓa kədan handay we mum wa' kədan mum ɗe sem vay nə ma su? 63Zakariya o kwa wây' kwa, ɓay mum wây'i: «Sem rum ɗe kə Zaŋ.» Kwa rum jin' wa ne nday daŋ'ŋ. 64Kəkor sar, Zakariya təŋ kə dan kəreme. Mum tle wor ta fray kə bur Ifraya. 65Zə rum, wəlok gi jik um daŋ' juk, ɓay sôwâ pla' dan kwa rum wə so mə du gway' nya Zude daŋ'ŋ. 66Sôwâ daŋ' məni mun dan rum təŋ kə ɗik dan wə vunduk nday, ɓay handay ci vunu: «Vay məni nə wə də ke mə ma su?» Zə gbəgboŋ Bârî kəta' kə rumu.
Nyem ka' dan Zakariya
67Simbeɗ mə Kəleŋ dam mbə wa Zakariya, ba vay nə, ɓay mum təŋ kə ka' dan kə ini:
68«Mə də bur Bârî, Ifray sôwâ Israyel,
zə mum mbə du sôwâ um ɓay tumwa ndaya.
69Mum ne Bə Siɗ mə gbəgboŋ ne mba.
Mum nə vay rawti jwə David, bə sin umu.
70Mum ka' dan wa rum ɓa' si
kə vun sum ka' dan mə kəleŋ umu.
71Mum kawvun i mum də mba ulay' ɓa sôwâ məni
wə zi kə mba,
ɓay du gbəgboŋ sôwâ məni wə mba sî.
72Mum ta' we ca um wa bambi ramba,
ɓay mum dla' wa dan kawvun um mə kəleŋe.
73Zə Ifray sur vun ne kə bambi ramba, Abraham,
74kədan mum mba ulay' du gbəgboŋ sôwâ məni wə mba sî,
ɓay mba ne vari kədan namba gi sin zə rum dan wəloko.
75Kədan namba ke kəleŋ
ɓay njeŋ kor rum bəka daŋ'
məni namba də ke kə i wa nya.
76Ɓay ha, vay man, sôwâ də wû ɗe kə
bə ka' dan Ifray mə wafraya.
Zə ha də ta kofo Bârî kədan ha gila' vari um#Mal 3.1,
77ɓay kədan ha ta' ne kə sôwâ um i Ifray
də nday siɗ kə vrum kwa mə bro' ndaya.
78Zə vunduk Ifray mba nyen peɗ kə we ca.
Mum də gi ri mə ɓu daka wafray ɗeri mbə wa mba
ce' ndə məni fəta wə dam zu,
79kədan ri mə ɓu rum ɗeri wa sôwâ məni
gay' wə ri mə ura' ɓay wə zə njəɓo mara,
kədan mum də ta' vari mə də ri heɓ mba ne#Esa 9.1.»
80Vay nə mbuɗ, ɓay vunduk um jeŋ kə ɗik dan mə ɓay ta'a. Mum suk wə gop hâ day bəka məni mum ta' tu rum kor sôwâ Israyel.
Currently Selected:
Lukə 1: KMN
Highlight
Share
Copy
Want to have your highlights saved across all your devices? Sign up or sign in
Le Nouveau Testament et Psaumes en Peve © Alliance Biblique du Tchad, 2014.
