Mateo 8
8
Yeshu ukunyongomanisha mulume wa bimakwa
(Mako 1:40-45; Luka 5:12-16)
1Oho Yeshu akunkulukilenga kufuma ha lipili, makunge amanene a bantu bamukonkele. 2Pe mukabimakwa wezile kukwendi, washinkamine kumbili yendi wambile ngayi, “Mwene, ndi ukushinga, ukutwesha kunyongomanisha.”
3Yeshu wolwele liboko lyendi wamukwatile, pe wakumbwile ngayi, “Nikushinga, nyongomana.” Oho ambile noho, mukabimakwa wanyongomanine. 4#Bal 14:1-32. Yeshu wambile kukwendi ngayi, “Hinga ushimikila ebye hinge ku umo. Ngoboni yanga kuli mukankombela* akakumone, pe ukatupule ntupu ngo mwayila Ndayano za Moshesha, akakumoneshe ku muntu nimwendi ngayi unanyongomana.”
Kukulupila kwa mukulwane wa bakanzita
(Luka 7:1-10)
5Oho Yeshu enginine mu Kapenauma, mukulwane wa bakanzita wezile kukwendi ngayi amuyavwe. 6Wambile ngayi, “Mwene, mukamulimo wami ulinakukola ku munzi, kutwesha kwenda wufwako, pe ulinakuyanda shikuma.”
7Yeshu wamutongwezele ngayi, “Nikeza mukumunyongomanisha.” 8Ngoboni mukulwane wa bakanzita wamukumbwile ngayi, “Mwene, kaliha shinafwanini ngayi obe wingine mu litala lyami. Ngoboni amba tuhu na lizu, pe mukamulimo wami ukanyongomana. 9Ndaba nami nili munceto ya baya banampitakana, kami nami nili na banzita munceto yami. Nambanga ku umo ngayi, ‘Yanga,’ pe ukuya. Nambanga kuwamina ngayi, ‘Yeka,’ pe ukwiza. Nambanga ku ndungo yami ngayi, ‘Tenda eshe’, pe ukushitenda.”
10Oho Yeshu ayuvwile noho wakomokele, pe wambile ku baya bamukonkele ngayi, “Mwashikuma nikumitongweza ngayi, hinge mu Ishalela shilolo niwane kukulupila kwakunene kwanehe. 11Nikumitongweza ngayi, babengi bakafuminina ku mushamuko na ku mponci, bakekala hamo ku shimbo na Abulahama na Ishake na Yakobo mu Wene wa muyilu. 12Ngoboni bana ba Wene bakayumbiwa hamunkanda mu mincimpwe, kuyo kukekala kulila na kulikekenya ku mayewe.”
13Niho Yeshu ambile ku mukulwane wa bakanzita ngayi, “Yanga ku litala lyobe, shitendiwe ngo kukulupila kwobe.” Pe mukamulimo wendi wanyongomanine ha shikati bene shiyo.
Yeshu ukunyongomanisha bantu babengi
(Mako 1:29-34; Luka 4:38-41)
14Oho Yeshu enginine mu litala lya Pita, wamonene mukowendi Pita wa mbeleki nalangana ndaba yakukola mashikashika. 15Wamukwatile ku liboko, pe mashikashika amumanine. Wapindukile, pe wamutendelele byakulya.
16Ku mazolo bantu baletele kuli Yeshu bakamayimbwe babengi, pe wafumishile mayimbwe na lizu na kunyongomanisha bakakukola nimwabo. 17#Isha 53:4. Nohobene shatendiwile eshe ambile muluwe Ishaya ngayi, “Watambwile makando wetu, washimbile malweli wetu.”
Kukonka Yeshu
(Luka 9:57-62)
18Oho Yeshu amonene likunge lya bantu banamuzinguluku, watongwezele bandongesha bendi ngayi bamwombweshele munciza ya liziba. 19Niho mukakulongesha ndayano ezile kukwendi, pe wambile ngayi, “Mulongeshi, nikakukonka oku nimwako ukaya.”
20Yeshu wamukumbwile ngayi, “Bamimbwe bali na mawina na batuyoni ba muyilu bali na mahwa. Ngoboni Mwana muntu ukubula hakuhamina mutwe wendi.”
21Mulume ou wengile ndongesha wambile ngayi, “Mwene, nyintabile ngayi nikafunde taha batate.”
22Ngoboni Yeshu wamukumbwile ngayi, “Nkonkenu, leha bafu bafunde bafubabo.”
Yeshu ukumwenesha nkuli
(Mako 4:35-41; Luka 8:22-25)
23Niho Yeshu enginine mu wato, pe bandongesha bendi benginine nendi. 24Hohobene kwezile nkuli yayinene mu liziba, pe wato wekalile mu wukalu wa kutewa. Ngoboni Yeshu walanganine mu tulo. 25Bandongesha bendi bahenyenene kukwendi, pe bamutoneshele. Bambile ngayi, “Mwene, tulamwine! Tuli na kufwa.”
26Wakumbwile kukwabo ngayi, “Ndaba ngani mukutina, enu bakakukulupila kwakushe? Niho emanine wambilile mankanyi, pe kwamwenene hulutu.
27Ngoboni nimwabo bakomokele, bambile ngayi, “Kati ou muntu wanahiti? Ndaba mpepo na mankanyi bikumwombatala!”
Yeshu ukunyongomanisha balume babili ba mayimbwe
(Mako 5:1-20; Luka 8:26-39)
28Oho Yeshu akumine munciza ya liziba ku litunga lya Ngandalena, balume babili ba mayimbwe bafumine ha binzimbi, baliwanine nendi. Bengile bakutinisha, kowa muntu watweshele kupita nzila yiyo. 29Babilikizile ngayi, “Kati ukushinga kutenda bishini nanetu, obe Mwana Nyambi? Kati unezi kuno mukutushushula oho shikati shetu shilolo shikume ndi?”
30Hahatali shashishe nabo, hekalile litanga lya bangulube balilenga. 31Mayimbwe anyepele Yeshu ngayi, “Ndi ukututanda, twitabilishe tukengine mu litanga lya bangulube.”
32Wakumbwile kukwabo ngayi, “Yenunga.” Pe mayimbwe afumine muli baya balume, ayile nakwingina mu bangulube. Niho litanga nimwalyo lya bangulube lyetukile, lya kunkulukile na kuliyumbila mu liziba, pe bafwile mu mema.
33Niho balishani ba bangulube batinine, bayile ku munzi, ba batongwezele byuma nimwabyo byatendiwile, na bya baya bekalile na mayimbwe. 34Niho bantu ba mu munzi nimwabo bafumine kuya mukulihangana na Yeshu, oho bamumonene, bamunyepele ngayi afume mu litunga lyabo.
Currently Selected:
Mateo 8: KK2008
Highlight
Share
Copy
Want to have your highlights saved across all your devices? Sign up or sign in
New Testament in Nkoya © The Bible Society of Zambia, 2008.
