Mateo 7

Kuyata baminenu

(Luka 6:37-38, 41-42)

1“Hinga muyata baminenu, pe nanenu bakamiyata. 2#Mak 4:24.Ndaba nyatilo eye mu kuyata nayo baminenu, mukayatiwa nayo. Kami osho mukutenda kubaminenu kami bakamitendasho.

3Shumangani ukutilamina kahoni kali mu liho lya kawushinda wobe, ngoboni ukubula kutosha shitondo shili mu liho lyobe? 4Pe ukwamba nahiti ku kawushinda wobe ngayi, ‘Leha nikufumishe kahoni kali mu liho lyobe,’ oho obe hinga wekala na shitondo mu liho lyobe? 5Obe mukashishweka, tatika taha kufumisha shitondo shili mu liho lyobe, niho umone shiwahe ngayi ufumishe kahoni kali mu liho lya kawushinda wobe.

6“Hinga mupanika batuwa byuma byakuyela, kutina bamifutukile na kumilwisha. Hinga muyumbila mapela wenu hambili ya bangulube, ndaba bakuwalyatangila na mawulu wabo.

Nyepenu, shingenu, ngongomwezenu

(Luka 11:9-13)

7“Nyepenu, pe mukapanikiwa, shingenu, pe mukawana, ngongomwezenu, pe bakamishinkulwila. 8Ndaba ou nimwendi ukunyepa ukutambula. Nimwendi ukushinga, ukuwana. Kami ou ukungongomweza, bakumushinkwilila. 9Kati yani hakati kenu ndi mwanendi unalombo linkende, hakumupana limanya? 10Hinga ndi unalombo yinci, hakumupana liyoka? 11Tambako enu bababi mukulimuka kupanika bana benu byuma byabiwahe, pe Tatiyenu wa muyilu ukakwanga nahiti kupanika byuma byabiwahe kuli baya bakulomba kukwendi?

12 # Luk 6:31. “Nohobene mu byuma nimwabyo tendelenu baminenu ngonehe mukushinga ngayi nanibo bamitendele. Ndaba nizo Ndayano za Moshesha na bilongesha bya bamiluwe.

Shipana shakushinana

(Luka 13:24)

13“Inginenu mu shipana shakushinana. Ndaba shipana shakuya ku Ngehena shakuyahamina, kami nzila yikuyako yayinene, pe bakwinginamo babengi. 14Ngoboni shipana shakuya ku wumi shakushinana na nzila yikuyako yakushotala, pe bakuyiwana babashe.

Mutondo na mikabo yawo

(Luka 6:43-44)

15“Keyenu na bamiluwe ba mahalo. Bakwiza kukwenu banalifwiki shitembe sha mbelele, ngoboni mukati banengi bambinzi babakali. 16Mukabalimukila ku mikabo yabo. Kati mikabo ya shinyanca bayibuyanga ku muwungawunga, hinge nkuyu bazibuyanga ku mukona ndi? 17Nohobene mutondo wawuwahe nimwawo wukuyima mikabo yayiwahe, ngoboni mutondo wawubi wukuyima mikabo yayibi. 18Mutondo wawuwahe kutwesha kuyima mikabo yayibi wufwako, kami mutondo wawubi kuyima mikabo yayiwahe wufwako. 19Mutondo nimwawo wakubula kuyima mikabo yayiwahe ukatemiwa, nakuuyumbila mu mundilo. 20#Mat 12:33. Nohobene mukabalimuka na mikabo yabo.

Hinga natanga kumilimuka

(Luka 13:25-27)

21“Kaliha ou nimwendi ukwamba kukwami ngayi, ‘Mwene, Mwene’ ukengina mu Wene wa muyilu, ngoboni kukengina ou ukutenda shifungo sha Tate uli muyilu. 22Ha mutena uyo babengi bakamba kukwami ngayi, ‘Mwene, Mwene, kati kaliha twashimikilenga mu lizina lyobe ndi? Kati kaliha twafumishilenga mayimbwe mu lizina lyobe ndi? Kami kaliha twatendelenga bikomokesho byabingi mu lizina lyobe ndi?’ 23#Nyi 6:8. Pe nikabatongweza ngayi, ‘Hinga natanga kumilimuka. Fumenu kukwami enu bakakutenda wubi.’

Bakakuzika matala babili

(Luka 6:47-49)

24“Nohobene ou nimwendi ukuyuvwa mazu wami, pe hakuwombatala, ukufweka ngo mulume wa ngana wazikile litala lyendi ha limanya. 25Mvula wanokele na libazi lyezile, kami mpepo yapepokelele ha litala liyo. Ngoboni kaliha lyawile, ndaba lyatendiwile ha limanya.

26“Ngoboni ou nimwendi ukuyuvwa awa mazu wami, pe hakubula kuwombatala, ukufweka ngo mulume wakuyeba wazikile litala lyendi ha lihekelela. 27Mvula wanokele na libazi lyezile, kami mpepo yapepokelele ha litala liyo, pe lyawile. Kuwa kwalyo kwabipile shikuma.”

Ngovu za Yeshu

28 # Mak 1:22; Luk 4:32. Oho Yeshu amanishile kwamba byuma ebye, makunge a bantu bakomokele kulongesha kwendi. 29Ndaba wabalongeshele na ngovu kupitakana bakakulongesha ndayano.

Currently Selected:

Mateo 7: KK2008

Highlight

Copy