Yowano 20
20
Yeshu ukushanguka ku bafu
(Mateo 28:1-8; Mako 16:1-8; Luka 24:1-12)
1Ku lumenemene shikuma, ha mutena wa Shunda, Maliya wa ku Mangandalena wayile ku shinzimbi, pe wamonene ngayi limanya banalifumishi ku shinzimbi. 2Maliya wetukile kuya kuli Shimoni Pita na ku ndongesha wamina ou Yeshu ahakile, wambile kukwabo ngayi, “Banafumishi Mwene mu shinzimbi, kulimuka oku banamuyaka tufwako!”
3Niho Pita na ndongesha wamina, bayile ku shinzimbi. 4Wubili wabo betukile, ngoboni uya ndongesha wamina wetukile shikuma kupitakana Pita, pe walimenekele kukuma ku shinzimbi. 5Wanyongamine, pe wamonene makwiza ekalilemo, ngoboni kaliha wengininemo. 6Shimoni Pita wamukonkelenga munyima, oho akumine wenginine mu shinzimbi. Wawanine makwiza ekalilemo, 7na likwiza lyekalile ku mutwe wa Yeshu. Liyo likwiza kaliha lyekalile hamo na makwiza amina, ngoboni lyekalile haninkayalyo hinga lyalivungavunga. 8Niho ndongesha wamina ou walimenekele ku shinzimbi enginine mu shinzimbi, wamonene, pe wakulupilile. 9(Hinge noho, kaliha bayuvwishishile ebye byatikitiwile ngayi ukufwanina kushanguka ku bafu.) 10Niho bandongesha babokele ku munzi.
Yeshu ukulimonekesha kuli Maliya wa ku Mangandalena
(Mateo 28:9-10; Mako 16:9-11)
11Maliya wemanine hamunkanda wa shinzimbi halila. Oho alililenga wanyongamine, pe watilaminine mu shinzimbi. 12Wamonene mangeloyi abili hinga avwala bya kutuba, ekalile mu shinzimbi haya bayakile mutuntu wa Yeshu, limo ku mutwe, lyamina ku mawulu. 13Ambile kukwendi ngayi, “Mbuyama, ndabangani ukulila?”
Wakumbwile ngayi, “Ndaba banafumishi Mwene yami, kami kulimuka oku banamuyaka nifwako!”
14Oho ambile noho, washetukile kunyima, pe wamonene Yeshu hinga emana, ngoboni kaliha wamulimukile ngayi niye Yeshu. 15Yeshu wambile kukwendi ngayi, “Mbuyama, ndabangani ulinakulila? Kati yani ou ulinakushinga?”
Maliya wahanganikile ngayi niye ndimi, wambile kukwendi ngayi, “Hekulu, ndi obe unamufumishi kuno, ntongweze oku unamuyaka, mwanga nikamufumisheko.”
16Yeshu wambile kukwendi ngayi, “Maliya!” Pe Maliya watengulukile, wambile kukwendi mu Shihebelu ngayi, “Laboni!” (Kutontolola ngayi, “Mulongeshi.”)
17Yeshu wambile kukwendi ngayi, “Hinga unkwata ndaba shilolo niye kuli Tate. Ngoboni yanga ku bawushinda wami, ukabatongweze ngayi nilinakuboka kuli Tate, niye kami Tatiyenu, kuli Nyambi yami, niye kami Nyambi yenu.”
18Maliya wa ku Mangandalena wayile, pe watongwezele bandongesha ngayi, “Ninamono Mwene.” Kami wabatongwezele ebye Yeshu ambile kukwendi.
Yeshu ukulimonekesha ku bandongesha bendi
(Mateo 28:16-20; Mako 16:14-18; Luka 24:36-49)
19Ha mutena wa kutatika wa Shunda mazolo, bandongesha bakungulukile hamo hinga bashinka bihala ndaba ya kutina Bayunda. Niho Yeshu ezile na kwimana mukati kabo, wambile kukwabo ngayi, “Kumwena kwikale kukwenu.” 20Oho ambile noho wabamoneshele maboko endi na ku lupati lwendi. Niho bandongesha bawahililile oho bamonene Mwene. 21Yeshu wambile kukwabo kami ngayi, “Kumwena kwikale kukwenu. Ngonehe Tate antumine nanami nilinakumituma nahiyo.” 22Oho ambile noho, niho oyelele hahabo, pe wambile kukwabo ngayi, “Tambulenu Moyo Wakuyela. 23#Mat 16:19, 18:18. Ndi mukayatila wubi wa bantu, pe bakayatiwila. Ndi mukabula kuyatila wubi wabo, pe kukayatiwila bafwako.”
Yeshu na Tomashi
24Ngoboni Tomashi (watumbiwile Mbuyu), umo wa balikumi na babili, kaliha wekalile nabo oho Yeshu ezile. 25Nohobene bandongesha bamina bamutongwezele ngayi, “Tunamono Mwene!”
Tomashi wambile kukwabo ngayi, “Ndele nimone mu maboko wendi mabenga a zindonda na kukwata na minwe yami mu mabenga na kukwata na liboko lyami ku lupati lwendi, kukakulupila nifwako.”
26Munyima ya matena mutanu na ahatu, bandongesha kami bekalile mu litala, na Tomashi wekalile nabo. Niho Yeshu ezile, bihala hinga byashinkiwa, wemanine mukati kabo, wambile ngayi, “Kumwena kwikale kukwenu.” 27Niho ambile kuli Tomashi ngayi, “Kwata na minwe yobe omwe, kami mona mu maboko ami. Tandubula liboko lyobe ukwate ku lupati lwami. Shiya nkani, pe ukulupile!”
28Tomashi wamukumbwile ngayi, “Mwene yami na Nyambi yami!”
29Yeshu wambile kukwendi ngayi, “Tomashi, ukukulupila ndaba unamono. Bali na mfuywezi aba banakulupili kwakubula kumona!”
Bihanganiko bya libuka elye
30Nohobene Yeshu watendele bikomokesho byamina byabingi ku meho a bandongesha bendi, ebye binabulu kutikitiwa mu libuka elye. 31Ngoboni ebye binatikitiwi mwanga mukulupile ngayi Yeshu niye Kilishitu, Mwana Nyambi, kami ngayi na kukulupila mumwendi mwikale na wumi mu lizina lyendi.
Currently Selected:
Yowano 20: KK2008
Highlight
Share
Copy
Want to have your highlights saved across all your devices? Sign up or sign in
New Testament in Nkoya © The Bible Society of Zambia, 2008.
