Yowano 21
21
Yeshu ukulimonekesha ku bandongesha mutanu na babili
1Munyima ya byuma ebye, Yeshu walimonekeshele kami ku bandongesha bendi ku Liziba lya Timbeliyashi. Walimonekeshele niye mwine mu nzila eye, 2Shimoni Pita na Tomashi (ou watumbiwile ngayi Mbuyu) na Natanele wa ku Kana mu Ngalileya na bana ba Zebende na bandongesha bamina babili nimwabo bekalile hamo. 3#Luk 5:5. Shimoni Pita wambile kukwabo ngayi, “Nilinakuya na kushashila zinci.”
Bambile kukwendi ngayi, “Nanetu kami tukuya nobe hamo.” Pe benginine mu wato bayile, ngoboni uya wushiku, kaliha bazihile hinge umo. 4Ku lumenemene shikuma, Yeshu wemanine ha shibumbo, ngoboni bandongesha kaliha balimukile ngayi niye Yeshu. 5Niho Yeshu abepwile ngayi, “Bahoni, muli na zinci ndi?”
Bamukumbwile ngayi, “Kowa hinge umo.”
6 #
Luk 5:6. Yeshu wambile kukwabo ngayi, “Vwiminenu kanyanzi kenu ku shilyo sha wato, pe mukuwana.” Nohobene bavwimine, pe kaliha batweshele kukoka kanyanzi, ndaba hafwile zinci zazingi.
7Uya ndongesha ahakile Yeshu wambile kuli Pita ngayi, “Niye Mwene!” Oho Shimoni Pita ayuvwile ngayi niye Mwene, walimangile shivwalo shendi sha hayilu ndaba washivulile, pe watuwamine ha liziba. 8Ngoboni bandongesha bamina bezile mu wato hibakoka kanyanzi kenzalile na zinci. Kaliha bekalile kwakutali na shibumbo, kampe zengile zintambo za kushinga kukuma ku mwanda umo. 9Oho bakumine ha shibumbo, bamonene mashanga a mundilo, hekalile zinci na linkende. 10Yeshu wambile kukwabo ngayi, “Letenuko zinci zimo eze munazihi shawuluno.”
11Niho Shimoni Pita ayile mu wato, pe wakokelele kanyanzi ha shibumbo hinga kenzala na zinci zazinene za mwanda na makumi mutanu na zihatu. Ngoboni hinge ndi zengile zazingi, kanyanzi kaliha katabukile. 12Yeshu wambile kukwabo ngayi, “Yekenu mulikankahe.” Kowa ndongesha wakancile na kumwipula ngayi, “Obe yani?” Ndaba balimukile ngayi niye Mwene. 13Niho Yeshu ezile, washimbile linkende wabapanine, watendele nahiyo na zinci.
14Eshe nisho shikati sha wuhatu Yeshu alimonekeshele ku bandongesha bendi munyima ya kushanguka kwendi ku bafu.
Yeshu na Pita
15Oho bamanishile kulikankaha, Yeshu wambile kuli Shimoni Pita ngayi, “Shimoni mwana Yowano, unahaka kupitakana aba baminobe ndi?”
Pita wakumbwile ngayi, “Ingoi Mwene, ukulimuka ngayi nakuhaka.”
Yeshu wambile kukwendi ngayi, “Lisha bana ba bambelele bami.” 16Yeshu wambile kukwendi kami ka wubili ngayi, “Shimoni mwana Yowano, unahaka ndi?”
Pita wakumbwile ngayi, “Ingoi Mwene, ukulimuka ngayi nakuhaka.”
Yeshu wambile kukwendi ngayi, “Lama bambelele bami.” 17Yeshu wambile kukwendi ka wuhatu ngayi, “Shimoni mwana Yowano, unahaka ndi?”
Pita wayenene ndaba Yeshu wamwipwile ka wuhatu ngayi, “Unahaka ndi?” Niho ambile kukwendi ngayi, “Mwene ukulimuka byuma nimwabyo, ukulimuka ngayi nakuhaka!”
Yeshu wambile kukwendi ngayi, “Lisha bambelele bami. 18Mwashikuma nikwamba kukwobe ngayi, oho wekalile ndumbana, walivwalikilenga obe mwine, pe wayilenga oku washingilenga kuya. Ngoboni oho ukakulumpala, ukatandubula maboko obe, pe muntu washenge ukakuvwalika, ukakutwala oku ukabula kushinga kuya.” 19(Yeshu wambile eshe kutontolola lufu akafwa nalwo Pita, luya lukaleta wuwahe kuli Nyambi.) Pe Yeshu niho ambile kukwendi ngayi, “Nkonke!”
Yeshu na ndongesha wamina
20 #
Yowa 13:25. Niho Pita ashetukile, pe wamonene uya ndongesha ou Yeshu ahakile habakonka. Uya ndongesha niye wayendaminine ha kapumpo ka Yeshu ha shikati sha mulalilo kami niye wepwile ngayi, “Mwene, kati yani ukakubeba?” 21Oho Pita amumonene, wepwile Yeshu ngayi, “Mwene kati nahiti bya nou muntu?”
22Yeshu wakumbwile ngayi, “Ndi nikushinga ngayi ayoye hantu ninezi, pe shikenga bishini kukwobe? Obe nkonke tuhu!”
23Niho mbuzi yapanzanine mukati ka bawushinda ngayi uyo ndongesha kukafwa wufwako. Ngoboni Yeshu kaliha wambile ngayi kukafwa wufwako, niye wambile ngayi, “Ndi nikushinga ngayi ayoye hantu ninezi, pe shikenga bishini kukwobe?”
24Ou niye ndongesha napaka ebye byuma, kami niye watikitile ebye byuma. Tukulimuka ngayi wupaki wendi wakupwisha.
Mamanishililo
25Haya niko bili byuma byabingi byamina ebye atendele Yeshu. Shinga ngayi nimwabyo byatikitiwile, shinga kaye nimwako kutwesha kuholeka mabuka nimwawo atikitiwa kafwako.
Currently Selected:
Yowano 21: KK2008
Highlight
Share
Copy
Want to have your highlights saved across all your devices? Sign up or sign in
New Testament in Nkoya © The Bible Society of Zambia, 2008.
