Yowano 2
2
Shinawenga mu Kana
1Oho kwapitile matena abili, kwekalile shinawenga mu munzi wa Kana mu Ngalileya. Mandiyendi Yeshu wekalileko. 2Yeshu na bandongesha bendi nanibo babehanine ku shinawenga. 3Oho waine yamanine, mandiyendi Yeshu wambile kukwendi ngayi, “Waine yabamanini.”
4Yeshu wakumbwile ngayi, “Mawa, hinga muntongweza byakutenda, shikati shami shilolo shikume.”
5Mandiyendi Yeshu watongwezele bakamilimo ngayi, “Eshe nimwasho akumitongweza shitendenu.”
6Kwekalile zintesho za limanya za mutanu na imo, zakutwesha kwinzala mema akukuma ku malita a mwanda, baziyakileko ngonehe ku shiheka sha Bayunda sha kuyowela. 7Yeshu wambile ku bakamilimo ngayi, “Inzalishenu zintesho na mema.” Benzalishile zintesho na ha mivumbo. 8Niho abatongwezele ngayi, “Pindenumo, pe mutwale ku mukakwendesha shimbo.” Bamutwalilile mema, 9mukakwendesha shimbo wayelele aya mema afutukile waine. Kaliha walimukile ngayi iya waine yinafumu kuti. (Ngoboni bakamilimo baya batekwile mema balimukile), niho mukakwendesha shimbo ehanine mukakuyeka, 10wambile kukwendi ngayi, “Muntu nimwendi watatikanga kupana waine yayiwahe, oho bantu banwakale shikuma, ku mamanino niho apane waine yayihamu. Ngoboni obe unaholeke waine yayiwahe kukuma na kushikati shino!”
11Eshe nisho shikomokesho sha kutatika shiya atendele Yeshu ku Kana mu Ngalileya. Nohobene waholwele wuwahe wendi, kami bandongesha bendi bamukulupilile.
12 #
Mat 4:13. Kunyima yanebye, Yeshu wayile ku Kapenauma hamo na mandiyendi na bakonzobendi na bandongesha bendi, pe bekalileko kuyo matena amashe.
Yeshu ukutanda bakakulandishila mu Litala lya Nyambi
(Mateo 21:12-13; Mako 11:15-17; Luka 19:45-46)
13 # Kut 12:1-27. Oho Shimbo sha Kupitilila sha Bayunda shekalile hahepi, Yeshu wayile ku Yelushalema. 14Kuyo wakenginine mu Litala lya Nyambi, wawanine bantu balinakulandisha zingombe na bambelele na bankilimba na bakakutambashana mali hinga bekala ku zitebulu zabo. 15Yeshu watendele lunyanzi lwa lunyimbwa lwa kupohela, watatikile kutanda nimwabo mu Litala lya Nyambi, bambelele hamo na zingombe. Wawishilile zitebulu hanci za bakutambashana mali, pe wapanzanishile mali wabo. 16Watongwezele bakakulandisha bankilimba ngayi, “Fumishenu ebye muno! Hinga mufutula Litala lya Tate ngayi linge litala lyakulandishila!” 17#Nyi 69:9. Bandongesha bendi banukile ebye byatikitiwa ngayi, “Obe Nyambi, shitima sha Litala lyobe, shilinakubanga mukati ngo mundilo.”
18Niho Bayunda bambile kukwendi ngayi, “Ukutenda shikomokesho ngani, shakumonesha ngayi uli na ngovu hanebye unatende?”
19 #
Mat 26:61, 27:40; Mak 14:58, 15:29. Yeshu wabakumbwile ngayi, “Shiwulenu elye Litala lya Nyambi, pe nikalipindula mu matena ahatu.”
20Bayunda bambile ngayi, “Elye Litala lya Nyambi balitendele mu myaka makumi anaa na mutanu na umo, kati obe ukutwesha kulipindula mu matena ahatu ndi?”
21Ngoboni Litala lya Nyambi atoyelenga Yeshu lwengile lutu lwendi. 22Munyima ya kushanguka ku bafu, bandongesha bendi banukile ebye ambile, niho bakulupilile ebye byatikitiwile na mazu ayo ambile Yeshu.
Yeshu walimuka bya mu mutima wa muntu
23Oho Yeshu ekalile mu Yelushalema ku Shimbo sha Kupitilila, bantu babengi bakulupilile mumwendi, oho bamonene bilimukisho ebye atendele. 24Ngoboni Yeshu kaliha wabakulupilile ndaba wabalimukile nimwabo. 25Kaliha washingile ngayi muntu wamina apake bya minendi, ndaba niye mwine walimukile ebye byekalile mu mitima yabo.
Currently Selected:
Yowano 2: KK2008
Highlight
Share
Copy
Want to have your highlights saved across all your devices? Sign up or sign in
New Testament in Nkoya © The Bible Society of Zambia, 2008.
