Yowano 3
3
Yeshu na Nikondema
1Kwekalile mulume umo wa bakulwane ba Bayunda, lizina lyendi Nikondema, ou wengile wa kazunga ka Bafwalishi. 2Wayile kuli Yeshu wushiku, pe wakambile ngayi, “Labi, tukulimuka ngayi uli mulongeshi wakufuma kuli Nyambi, ndaba kowa muntu ukutwesha kutenda bilimukisho ebye ukutenda ndele Nyambi ekale nendi hamo.”
3Yeshu wamukumbwile ngayi, “Mwashikuma nikwamba kukwobe ngayi, kowa muntu ukutwesha kumona Wene wa Nyambi ndele ahemuwe kaubili.”
4Nikondema wamwipwile ngayi, “Kati muntu ukutwesha nahiti kuhemuwa kabili ndi niye wakulakale? Kati ukutwesha kwingina ka wubili mu livumo lya mandiyendi ngayi ahemuwe kami ndi?”
5Yeshu wakumbwile ngayi, “Mwashikuma nikwamba kukwobe ngayi, ndele muntu ahemuwe ku mema na Moyo, kutwesha kwingina mu Wene wa Nyambi wufwako. 6Eshe shikuhemuwa ku wuntu shenga wuntu, kami eshe shikuhemuwa ku Moyo shenga Moyo. 7Hinga ukomoka oho namba kukwobe ngayi, ‘Mukufwanina kuhemuwa kabili.’ 8Mpepo yikupepokela oku yikushinga, kami ukuyuvwa mungunina wayo, ngoboni kutwesha kulimuka oku yikufuma noku yikuya wufwako. Pe nisho shili ku muntu nimwendi ukuhemuwa ku Moyo.”
9Nikondema wamwipwile ngayi, “Kati eshe shikenga nahiti?”
10Yeshu wamukumbwile ngayi, “Nka obe uli mulongeshi wamunene wa Ishalela, kati kami kulimuka eshe wufwako ndi? 11Mwashikuma nikwamba kukwobe ngayi, tukwamba ebye tukulimuka na kupaka ebye tunamono, ngoboni enu kutambula wupaki wetu mufwako. 12Ndi kukulupila oho nikukutongweza byuma bya hano hanci wufwako, pe ukakulupila nahiti oho nikakutongweza byuma bya muyilu? 13Kowa muntu waya kuyilu, ndele niye wafumine kuyilu, niye Mwana Muntu. 14#Kul 21:9. Nehi Moshesha apatikile liyoka lya kutendiwa ha lubemba mu libelelengwa, nahiyo Mwana Muntu ukufwanina kupatikiwa, 15ngayi muntu nimwendi ukukulupila mumwendi ekale na wumi wa mwayile myaka.” 16Ndaba Nyambi wahakile bakakaye shikuma niho apanikile Mwanendi umo pele ngayi nimwendi ou ukukulupila mumwendi kukanonga wufwako, ngoboni ekale na wumi wa mwayile myaka. 17Ndaba Nyambi watumine mwanendi mu kaye kaliha mukuyata bakakaye, ngoboni ngayi abapulwishe mumwendi.
18Nimwendi ukukulupila muli Mwana, kuyatiwa wufwako, ngoboni ou ukubula kukulupila, wayatiwakale, ndaba unabulu kukulupila mu lizina lya Mwana Nyambi umo pele. 19Oku nikwo kuyata, ngayi lumuni lunezi mu kaye, ngoboni bantu bahakile mincimpwe kupitakana lumuni, ndaba milimo yabo yengile yayibi. 20Nimwendi mukakutenda wubi wazimba lumuni, kami kwiza ku lumuni wufwako, kutina milimo yendi yikumoneka. 21Ngoboni nimwendi ukutenda byakupwisha ukwiza ku lumuni, ngayi milimo yendi ya kwombatala Nyambi yimoneke.
Yeshu na Yowano
22Munyima yanebye, Yeshu na bandongesha bendi bayile ku litunga lya Yundeya, wekalile hamo nabo kuyo na kuzubilisha. 23Na Yowano kami wazubilishilenga mu Anoni hahepi na Shalimi, ndaba kwekalile mema amengi. Bantu bezilenga na kuzubilishiwa. 24#Mat 14:3; Mak 6:17; Luk 3:19, 20. Eshe shatendiwile oho Yowano shilolo ayakiwe mu tolongo.
25Niho kwekalile nkani mukati ka bandongesha ba Yowano na Kayunda ha biheka bya kuyowela. 26Bezile kuli Yowano, pe bambile kukwendi ngayi, “Mulongeshi, uya muntu wekalile nendi munciza ya Yondana, ou obe wapakile, ulinakuzubilisha, kami bantu nimwabo balinakuya kukwendi!”
27Yowano wakumbwile ngayi, “Kowa muntu ukutwesha kutambula shuma ndele apanikiwesho kuyilu. 28#Yowa 1:20. Enu muli bapaki bami ngonehe nambile ngayi, ‘Ami kaliha nili Kilishitu, ngoboni ami natumiwile kumbili yendi.’ 29Mukakuyeka niye mwine mwenga. Ngoboni muhoni wa mukakuyeka ukwimana na kuyuvwilila, ukuwahilila shikuma oho akuyuvwa lizu lya mukakuyeka. Nohobene oku nikwo kuwahilila kwami kwakunene. 30Nohobene niye nafwanini kutumbalala, ngoboni ami nikufwanina kushepa.”
Ou ukufuma kuyilu
31Ou ukufuma kuyilu, unapitakana nimwabo. Ou ukufuma hanci, wenga wa hanci, kami ukwamba bya hanci. Ngoboni ou ukufumu kuyilu uli hayilu ya nimwabo. 32Ukupaka ebye anamono na kuyuvwa, ngoboni kowa muntu ukutambula wupaki wendi. 33Muntu ukutambula wupaki wendi ukupaka ngayi Nyambi wakupwisha. 34Ou anatumu Nyambi ukwamba mazu a Nyambi, ndaba Nyambi ukumupanika Moyo wendi wakwinzala. 35#Mat 11:27; Luk 10:22. Tate ukuhaka Mwanendi, kami unapana byuma nimwabyo mu maboko wendi. 36Nimwendi ukukulupila muli Mwana uli na wumi wa mwayile myaka, ngoboni nimwendi ukubula kukulupila muli Mwana, kukamona wumi wufwako, ndaba wukali wa Nyambi uli hahendi.”
Currently Selected:
Yowano 3: KK2008
Highlight
Share
Copy
Want to have your highlights saved across all your devices? Sign up or sign in
New Testament in Nkoya © The Bible Society of Zambia, 2008.
