Milimo 7

Mazu a Shetefwano

1Niho Mukulwane wa Bakankombela Nimwabo wepwile Shetefwano ngayi, “Kati ebye binengi byakupwisha ndi?”

2Shetefwano wakumbwile ngayi, “Bawushinda na batatizami, nyuvwililenu! Nyambi wamuwahe walimonekeshele kuli tatiyetu Abulahama, oho ushili mu Meshopotamiya, shilolo aye mu Halani, 3pe wambile kukwendi ngayi, ‘Fuma mu litunga lyobe, ushiye bawushinda wobe, uye mu litunga elye nikakumonesha.’ 4#Shi 11:31, 12:1, 4. Niho afumine mu litunga lya bantu ba Kalandeya, wakazikile mu Halani. Tatiyendi Abulahama oho afwile, Nyambi wamufumishilemo, pe wamuletele mu litunga lino, omu munaziki wuluno. 5#Shi 12:7, 13:15, 15:18, 17:8. Nyambi kaliha wapanine Abulahama likona, hinge mbalila yayishe kuno ngayi binge byendi. Ngoboni wamukulupishile ngayi ukamupanika liya litunga ngayi linge lyendi na lya bazukulyendi, hinge ndi Abulahama ha shikati shiyo kaliha wekalile na mwana. 6#Shi 15:13-14. Nyambi wambile kukwendi ngayi, ‘Bazukulyobe bakekala mu litunga lyashenge, kami muya bakekala mu wulungo, kami bakabatenda shibi mu myaka ya myanda inaa. 7#Shi 3:12. Ngoboni nikashushula litunga liya likabenga bandungo, munyima yanebye, bakafuma mu litunga liyo, pe bakeza na kundemesha ku mwanya uno.’ 8#Shi 17:10-14, 21:2-4, 25:26, 29:31–35:18. Niho Nyambi apanine Abulahama, shiheka sha mukanda ngayi shinge shilimukisho sha kulimama. Nohobene Abulahama watwalile mwanendi Ishake ku mukanda oho ekalile na matena mutanu na ahatu kufuma ha kuhemuwa. Ishake watwalile Yakobo ku mukanda, kami Yakobo watwalile ku mukanda bana bendi ba likumi na babili, bankaka zetu ba mpupo ba mukoka wetu.

9 # Shi 37:11, 28, 39:2, 21. “Aba bankaka zetu bayuvwilile mwili kawushinda wabo Yoshefwa, pe bamulandishile ngayi enge ndungo mu Engipita. Ngoboni Nyambi wekalile nendi, 10#Shi 41:39-41. wamulamwinine ku makalikiza endi nimwawo. Wamupanikile ngana na kukeya ku meho a Mwene wa Engipita, niho amwingile kalela wa Engipita na wa litala lyendi nimwalyo. 11#Shi 42:1-2. Niho kwekalile nzala mu litunga lya Engipita nimwalyo na mu Kanana na makalikiza amanene, pe bankaka zetu bakwangile kuwana byakulya. 12Oho Yakobo ayuvwile ngayi kuli byakulya mu Engipita, watumineko bankaka zetu. Olu lwengile lwendo lwa kutatika. 13#Shi 45:1, 16. Ha lwendo lwa wubili Yoshefwa waliholwele ku bawushinda wendi, pe Mwene wa Engipita walimukile bawushinda wa Yoshefwa. 14#Shi 45:9-10, 17-18, 46:27. Niho Yoshefwa atumine mazu kuli tatiyendi Yakobo ngayi beze ku Engipita hamo na bawushinda wendi nimwabo. Bengile bantu makumi mutanu na abili na bantu mutanu. 15#Shi 46:1-7, 49:33. Nohobene Yakobo wayile ku Engipita, niko akafwililile niye na bankaka zetu. 16#Shi 23:3-16, 33:19, 50:7-13; Yosh 24:32. Mituntu yabo bayibweshele ku Shekema oku bayilangikile mu shinzimbi shiya Abulahama alandile na mali ku bana ba Hamole ku Shekema.

17 # Shi 1:7-8. “Oho shikati shakumine hahepi ngayi Nyambi atende ebye akulupishile Abulahama, bawushinda wetu bavulile shikuma na kuhanya mu Engipita. 18Niho kwashwanine mwene wamina mu Engipita uya wabulile kulimuka Yoshefwa. 19#Shi 1:10-11, 22. Ou Mwene wongezele bantu betu, kami wayandishile batatizetu, wabakandamikile ngayi batutwishe bambututu babo hamunkanda wa matala ngayi bafwe. 20#Shi 2:2. Moshesha wahemuwile ha shikati shiyo, wengile mwana wamuwahe shikuma. Bamuholekele mu litala lya tatiyendi zingonda zihatu. 21#Shi 2:3-10. Ngoboni oho Moshesha bamututwishile hamunkanda wa litala lya tatiyendi, mwana Mwene wa Engipita wa mushimbi wamutolele, niho amulelelenga ngo mwanendi wakulibelekela. 22Niho Moshesha alilongeshele ngana nimwazo za Bakaengipita, pe wekalile na ngovu mu mazu na munebye atendelenga.

23 # Kut 2:11-15. “Moshesha oho ekalile na myaka makumi anaa, wekalile na bihanganiko byakuya na kuzingula bawushinda wendi Baishalela. 24Wawanine umo wa Baishalela balinakumutenda shibi kuli Kaengipita, wamulamwinine, pe wamulwililile niho azihile Kaengipita. 25Moshesha wahanganikile ngayi bawushinda wendi bakayuvwishisha ngayi Nyambi ukabalamwina na liboko lyendi, ngoboni kaliha bayuvwishishile. 26Ha mutena wakulundaminako, Moshesha wawanine Baishalela babili balwilenga, pe washingile kubalamwina, niho ambile ngayi, ‘Enu balume, nimwenu muli Baishalela, ndabangani mulinakulilwisha?’ 27Ngoboni uya watendelenga minendi shibi wanyakwile Moshesha ku nkumo, pe wambile ngayi, ‘Yani nakwingi kalela na mukakuyata hakati ketu? 28Kampe ukushinga kunziha ngonehe waziha uya Kaengipita nzona ndi?’ 29#Kut 18:3-4. Oho Moshesha ayuvwile ebye, watinine wafumine mu Engipita, wakekalile mu litunga lya Mindiani kuyo akabelekele bana babili ba balume.

30 # Shi 3:1-10. “Oho kwapitile myaka makumi anaa, lingeloyi lyaliholwele kukwendi mu libelelengwa hahepi na Lipili lya Shinai mu mulangi wa mundilo wabangilenga mu lipukumuna. 31Oho Moshesha amonene ebye wakomokele, pe wahenyenene hahepi na lipukumuna ngayi amonesheshe. Niho ayuvwile lizu lya Mwene ngayi, 32‘Ami Nyambi wa bankaka zobe, Nyambi wa Abulahama na Ishake na Yakobo.’ Moshesha wakankile na bowa, kami kaliha watilaminineko. 33Mwene wambile kukwendi ngayi, ‘Fumisha makatulo obe, ndaba mwanya unemana wakuyela. 34Namono kuyanda kwa bantu bami mu Engipita. Nayuvwu kushunga kwabo, pe ninezi na kubapulwisha. Haya yeka nikakutume ku Engipita.’

35 # Kut 2:14. “Moshesha bamukanine bantu ba Ishalele. Bambile ngayi, ‘Yani nakwingi kalela na mukakuyata hakati ketu?’ Niye Nyambi atumine kwinga kalela na mukakulamwina na liboko lya lingeloyi olyo lyalimonekeshele kukwendi mu lipukumuna lya bangilenga. 36#Kut 7:5, 14:21; Kul 14.33. Moshesha watwaminine Baishalela kubafumisha mu Engipita. Watendele bimonekesho na bikomokesho mu Engipita na ku Liwate lya Kufubila na mu libelelengwa mu myaka ya makumi anaa. 37#Nday 18:15, 18. Moshesha niye wambile ku bana ba Ishalela ngayi, ‘Nyambi ukatuma muluwe wakufweka ngo ami wakufumu ku bawushinda wenu.’ 38#Kut 19:1–20:17; Nday 5:1-33. Moshesha niye wekalile na Baishalela oho bakungulukile mu libelelengwa. Wekalile kuyo na bankaka zetu hamo na lingeloyi lyambile kukwendi ha Lipili lya Shinai. Watambwile mazu akuyoya a Nyambi mukutupanikawo.

39“Ngoboni bankaka zetu bakanine kumwombatala, bamunyancile, pe bashingile kuboka ku Engipita. 40#Kut 32:1. Pe batongwezele Aloni ngayi, ‘Tutendele banyambi bakututwaminina, ndaba kulimuka tufwako eshe shinezilili Moshesha, ou watufumishile mu litunga lya Engipita.’ 41#Kut 32:2-6. Niho batendele kanankishi ka namani, pe bapehelele nkombela, kami bawahililile na milimo ya maboko abo. 42#Amos 5:25-27. Niho Nyambi abapenzeshele mongo, wabapanikile ku kulemesha nyenye, ngonehe kwatikitiwile mu libuka lya bamiluwe ngayi,

‘Enu bakalitala lya Ishalela!

Kati mwapanine kukwami tuyamana mwazihilenga,

kwinga zinkombela mu myaka ya makumi anaa mu libelelengwa ndi?

43Mwashimbile shihanda sha Moleki

na lunyenye lwa nyambi yenu Lemfani,

tunankishi mwatendele twakulemesha.

Pe nikamifumisha na kumiyumbila kwakutali

munciza ya Mbambiloni.’

44 # Kut 25:9, 40. “Bankaka zetu bekalile na litente lya moneshele ngayi Nyambi bali nendi mulibelelengwa. Balitendele ngonehe Nyambi atongwezele Moshesha kami Moshesha watendele nehi shakufwanikiza eshe amonene. 45#Yosh 3:14-17. Eye Ntanda ya ku Meho a Nyambi batambwile bankaka zetu, bayiletele hamo na Yoshuwa oho batambwile litunga lya Bakamatunga aba Nyambi atandile. Yekalile kukwabo kukuma na ku mitena ya Ndavita. 46#2 Sam 7:1-16; 1 Bya 17:1-14. Ndavita wayamiziwile kuli Nyambi, pe wanyepele ngayi amutendele mwanya wakwikala Nyambi wa Yakobo. 47#1 Bya 6:1-38; 2 Bya 1-17. Ngoboni Sholomoni niye wamutendelele litala.

48“Hinge shekalile noho, Nyambi Wakukangana kwikala mu matala akutendiwa na maboko wufwako, nehi muluwe ambile ngayi,

49 # Isha 66:1-2. Mwene wambile ngayi,

‘Liyilu lyenga shuba shami,

kami hanci anengi malyatilo a mawulu wami.

Kati litala elye mukantendela lyanahiti?

Hinga mwanya wa kukatalila kwami wanahiti?

50Kati liboko lyami kaliha linatende byuma nimwabyo ebye ndi?’

51 # Isha 63:10. Shetefwano watwalilileho kwamba ngayi, “Enu bantu babakalu, ba mitima yakubula kuya ku mukanda, enu bizikamatu ku lizu lya Nyambi! Munafweke nehe batendelenga batatizenu, nanenu kami mwakananga Moyo Wakuyela. 52Kati kuli muluwe ou babulile kuyandisha batatizenu? Kami bazihile aba bashimikile bya kwiza kwa uya mukakwoloka. Pe enu munamubebe na kumuziha. 53Enu mwatambwile ndayano za Nyambi kupitila ku mangeloyi, ngoboni kwombatala mufwako!”

Shetefwano bakumupuha mamanya

54Oho bakankuta bayuvwile mazu a Shetefwano, bapilamine shikuma, na kulikekenya ku mayewe. 55Ngoboni Shetefwano, hinga enzala na Moyo Wakuyela, watilaminine kuyilu, wamonene wuwahe wa Nyambi na Yeshu kami hinga emana ku liboko lya shilyo lya Nyambi. 56Niho ambile ngayi, “Monenu! Nikumona liyilu linashinkuluku na Mwana Muntu unemana ku liboko lya shilyo lya Nyambi!”

57Ngoboni babilikizile na lizu lyalinene, balizikile mu matu, bamushindumukilile nimwabo hamo, 58bamukokelele hamunkanda wa munzi, pe bamupuhile mamanya. Bapaki bayakile bivwalo byabo ku mawulu a ndumbana, lizina lyendi Shaulu.* 59Oho bamupuhilenga mamanya, Shetefwano walombelele ngayi, “Mwene Yeshu, tambula moyo wami!” 60Niho ashinkamine, pe wabilikizile shikuma ngayi, “Mwene, hinga ubalabila ou wubi!” Oho amanine kwamba noho, wafwile.

Currently Selected:

Milimo 7: KK2008

Highlight

Copy