Milimo 6
6
Bakakuyavwa mutanu na babili
1Ha matena ayo, oho bandongesha bavulilenga, kwekalile nkani mukati ka Bayunda baya bambilenga Shingiliki na Bayunda baya bambilenga Shihebelu. Ndaba bamfwile ba Bayunda baya bambilenga Shingiliki babakendele bafulankaniwileha ha kutapila byakuyavwiwa kwa ha mutena ha mutena. 2Niho bantumwana balikumi na babili behanine kazunga ka bakakukulupila, pe bambile kukwabo ngayi, “Kufwanina shifwako etu tushiye kushimikila lizu lya Nyambi ngayi tubalike kutapishila bantu byakulya. 3Nohobene bawushinda, hatenu balume mutanu na babili hakatikenu baya bampupo yayiwahe, banenzala na Moyo Wakuyela bali na ngana, tubapanike ou mulimo. 4Haya etu tukalipana ku malombelo na kushimikila lizu lya Nyambi.”
5Shambo eshe shawahilishile likunge lya bantu, pe bahatile Shetefwano, mulume wenzalile na kukulupila na Moyo Wakuyela na Fwilipu na Polokolashi na Nikanola na Timoni na Pamenashi na Nikolashi ou wengile mukamatunga wa ku Antiyoke* wakulupilile mu biheka bya Shiyunda. 6Babemanikile kumbili ya bantumwana, balombelele na kubakambika maboko.
7Pe lizu lya Nyambi lyahanyine. Bandongesha bavulile shikuma mu Yelushalema. Kami wingi wa bakankombela babengi bombatalile ku kukulupila.
Kukwatiwa kwa Shetefwano
8Shitefwano wengile muntu ou Nyambi atandalishile shikuma kami wamwinzalishile na ngovu, pe watendele bimonekesho na bikomokesho byabinene ku bantu. 9Ngoboni kwezile bantu bamulwishile bafumine ku Shinangonge shatumbiwile ngayi, “Bantu Bakushoboloka.” Muyo mwekalile Bayunda ba ku Shilene na ku Alekizandiliya na baya ba ku litunga lya Shilisha na Esha, pe batatikile kulikanangana na Shetefwano. 10Ngoboni kaliha bamutweshele ndaba Shetefwano wambile na ngana zakufuma ku Moyo Wakuyela. 11Niho bahongele bantu bamo kwamba ngayi, “Tunamuyuvwu hamba mazu akuhandula Moshesha na Nyambi!” 12Nohobene bashonkomwene mitima ya bantu na bakulwane ba Bayunda na bakakulongesha ndayano. Bakwatile Shetefwano, pe bamutwalile ku nkuta. 13Niho baletele bapaki ba mahalo, bambile ngayi, “Ou muntu ulinakulwisha Litala lya Nyambi lyakuyela na Ndayano za Moshesha. 14Ndaba tunamuyuvwu hamba ngayi Yeshu wa ku Nazaleta ukashiwula Litala lya Nyambi ukafutula biheka nimwabyo biya atupanine Moshesha!” 15Nimwabo bekalile mu nkuta bamunconcomekele, bamonene lupala lwendi ngo lupala lwa lingeloyi.
Currently Selected:
Milimo 6: KK2008
Highlight
Share
Copy
Want to have your highlights saved across all your devices? Sign up or sign in
New Testament in Nkoya © The Bible Society of Zambia, 2008.
