Lukas 7
7
Tà ba soyé Kapernaum
(Mat. 8.5-13; 15.21-28)
1Yésu lo be miagte ntshob mi mbwe benntùn bo ke nju' i là, ntsho mà Kapernaum. 2Mo' tà ba soyé lo ghù mo' mônke' i z'a ke ngon, ntù' nekwù là. Mén nà lo tanjoṅ yi neshu. 3A lo be ju' mba bo tshob nu mfà num Yésu là, ntum tsemo' ghakwé mbwe ba Yuda ndù bo nèn nde't'é a se' ngù mônke' i yôge. 4Bo zin nkum mbaṅ i, mbu' mbu yi neshu, ntshob ndù: A ku'ni mèn ze b'o ghù yen nu là num i là. 5Nummbe a num nkô ngô be, a bèn nkut sinagogue be.
6Yésu nèn bo à bo. Là mba bo be ke bèn mb'a ngùanesà ntshundà là, tà ba soyé tum shun tse mbaṅ Yésu, bo tshob yi ndù: Tshùaben, kà neghùtni wul o, nummbe me ke' ku'ni mèn ze b'o tsho tun ngàmndà màm nà. 7A b'a ndùlala me ke' yen ndù tu wul àm ku'ni nese' mbwe o yàm tu. Là tshob ta' ntshob ntshù' mônke' àm nsi yate. 8Nummbe mba yàm tu, me b'a mènntùn njam ben ndùb, ndù mba me bèn ngù ba soyé njam àm. Me num ntshob mo' ndù nène, a nèn, ntshob mo' ndù se'e, a se', ntshob ngafa' àm ndù ghù yen ju li, a ghù. 9Yésu be ju' men ntshob là, nyàmte tà ba soyé, nkaṅ wul i njam, ndôte bwoṅ benntùn bo ke mbwe i là, ntshob ndù: Me tshob bin ndù: Mba ntùm ngô Israél, me ke' yoṅ mfon bamntù ndùb mba yen ni là. 10Benntùn tse tà ba soyé tum yub là be bèn njam ndà ntèt mônke' là ndù a yate.
11A be mbatte lé'njù, Yésu nèn ntùm mo' ngô, lén se Naïn; ghazi'te nu i mba bwoṅ benntùn yàm zin, nèn bo à bo. 12Ngelaṅ z'a ke ngebte ntshu ngô là, be num yen ngelaṅ nà, bo nke ntum mo' fe mén, z'a na' mb'a nkwi mén ntshù', màab be mfôg mènnzwi là. Benntùn yàm ntùm ngô nke nzin njam i. 13Tshùaben Yésu be yen i, ndèn mi ko i, a tshob yi ndù: Kà nelàne; 14nkù'te nèn mbaṅ koṅ fe mèn, nkwage; ben tse bo ket là tsin. A tshob ndù: Ménnshum, me tshob wù, lo tù. 15Fe mèn bù' wul i, ntswe ntùm koṅ netswe, nto' netshobe, Yésu fà i màab. 16Bwôg tshùb njoṅ yub fa, bo nke ngamte Nsi ntshob ndù: Mo' ngatshob ntshob Nsi ze ndùb se' netèt bag; Nsi se' ndôte ben tse. 17Men ntshob Yésu là tsho ntùm njoṅ ngô Yudéa fa, mba ntùm bon dù' ts'a ghebte bwe là.
Ghantum Yohané mbaṅ Yésu
(Mat. 11.2-19)
18Ghazi'te nu Yohané soṅ i njoṅ tshen nu là fa, Yohané tsiaṅ tsemo' ghazi'te nu i bàa, 19ntum yub ndù bo nèn ntshob Yésu ndù: O b'a mèn z'a se' là ké? Ke bag bèn mbéb mo' mènghua à? 20Tshen bandum nà zin nkum mbaṅ Yésu ntshob ndù: Yohané nganyu' benntùn ntse bèn ntum yag ndù bag tshob wù ndù: O b'a mèn z'a se' là ké? Ke bag bèn mbéb mo' mènghua à? 21Be num yen ngelaṅ nà, Yésu yate benntùn yàm tse bo na' ngù ngokèt, nkeko' mba ywètkebwô là, nga' miag ba mfùmiag yàme, bo yen nze. 22A #Es. 35.5-6; 61.1bùnte ntshob ghantum ndù: Bin nèn nsoṅ Yohané ju ze bin yen mbèn nju' là: Ba mfùmiag tshwèt njene, ba kekat nke nzine, wut ghankin làn, ba mbu'ntoṅ nke nju'u, fe ben nke ndo num vù, bo tshwèt nke ntshob nkùn mebwô bwoṅbwoṅ. 23Mènfen b'a mèn z'a ke nsi fa't'a num àm kà vù nsi là.
24Ngelaṅ ghantum Yohané nèn nà, Yésu to' netshob nu benntùn mfà num Yohané ntshob ndù: Bin na' nèn lôt'a ke num kônkwa à? Nka'nesoṅ ze fetmbaṅ tshwèt nyi't'é là ké? 25Là bin na' nèn yen à ke? Mo' mèn z'a ket mo' kuni nzwe là ké? Tshù, ben tse bo num nket nzwe mebwô mbèn nke njôg ntùm tsiaṅte là, tshen ben nà b'a ntùm ndà fenfen. 26Bin na' nèn yen à ke? Mo' ngatshob ntshob Nsi ké? Ṅ, me tshob bin ndù a tshùa ngatshob ntshob Nsi. 27A #Mal. 3.1b'a mèn ze bo kite num i ndù: Tshù, me tum ngantum àm mbwe o, z'a nsi nabte manze o mbwe o là. 28Me tshob bin ndù: Netèt benntùn tse bènnzwi bèn mbwe yub là, sàm mèn ke bwe z'a tshùa Yohané là. Là nda' metsit mén ntùm nufen Nsi tshùa i.
29Njoṅ #Mat. 21.32; Luk. 3.12benntùn fa tse bo na' nju' Yohané mba ghakwéfé' là, lo bam nunetsin Nsi, ngù Yohané nyu' yub ntse. 30Là ba Férésia mba ghalèn ntshù' bagte ju ze Nsi kô là num miag mube, nga neghù Yohané nyu' yub ntse. 31Be me fà mfi' yen zwiaṅ benntùn ni à num we? Bo fut'a we? 32Bo fut'a bônke' tse bo tswe num nsém, nke nkua' bo bo ntshob ndù:
Bag bu' loṅ bin ke nyiaṅ,
ntôte vù bin ke bam, ke làn nà.
33Nummbe Yohané nganyu' benntùn ntse lo se' ke be jù bàn, ke bèn nu ndu'; bin tshob ndù a ghù ywètkebwô. 34Mén mèn se' ze, nke njù mbèn nu; bin tshob ndù: Tshù kua' njù ju bo nu ndu', nshun ghakwéfé' mba ben kebwô li. 35Là bon Nsi lo la'te ndù zenu Nsi b'a netsine.
Mènnzwi ngaghù nukebwô
(Mat. 26.1-13; Yoha. 12.1-8)
36Mo' mén Férésia tsiaṅ Yésu ndà i nejù jujù bo yi, a tsho ndà yen mén Férésia là, ntswe num téblé. 37Tshù, #Mat. 26.7; Mark. 14.3; Yoha. 12.3mo' mènnzwi lo be ntùm ngô, mbe ngaghù nukebwô. A be ju' ndù Yésu se' kà ntswe téblé ndà mén Férésia, ndo' mo' ntshaṅ labinda tanjoṅ ndù a dun, nse' yi, 38ntsin njam Yésu, mbaṅ nku mi, nke nkua'a, ntsenyà mi nke nsôg nku Yésu; a lo' nyiaṅtu tse ntshwitte yi, nsam nku mi, nke njo' labinda.
39Là mén Férésia z'a na' ntsiaṅ Yésu là yen ndùlala, ntshob ntùm ntù i ndù: Yen mèn ni lo mb'a ngatshob ntshob Nsi, mb'a lèn lén mèn ze mènnzwi z'a tshwèt nkwag i be yi là, mb'a lèn ndù a b'a mènnzwi kebwô. 40Là Yésu bùnte yi ndù: Simon, me ghù nu netshob wù: A bùnte ndù: Ngatswite, tshobe! 41Yésu tshob yi ndù: Mo' mèn lo ghù ghanjo tse bàa, njo be bam mbwe i denario nkù tàn, mbe bam mbatte bàa ṅam ntàn. 42Mba bo na' mbe ke ku'ni netô yen njo là là, a faṅ yen nkàb là bo njoṅ yub bàa fa. A zit mèn netèt ben bàa bèn kô i neshu à? 43Simon bùnte ntshob ndù: Me kwate ndù a b'a mèn ze bo faṅ nkàb yi là, Yésu tshob yi ndù: O keb ntsha mebwô.
44Nkaṅ wul i njam mbaṅ mènnzwi, ntshob Simon ndù: O yen mènnzwi li ké? Me tsho ntùm ndà o, o ke fà ntse ndù me sôg nku màn yi, là, a lo' ntsenyà mi, nsôg nku màm yi, mbèn ntshwitte nyiaṅtu tse. 45O ke' nyô nge' màm, là fe ngelaṅ me tsho ndà li là, a ke' tsin nesam nku màm. 46O ke' se' tu àm mfèt, là tu wul i lo' labinda, njo' nku màm yi. 47A ndùlala, me tshob wù ndù nukebwô tse ts'a yàm nà mi, nummbe a kô neshu. Là mèn ze bo num ndagte yi metsili là num nkô metsili. 48Yésu tshob mènnzwi ndù: Nukebwô tsho mi.
49Ben tse bo à bo be téblé là to' netshob ntùm ntù tshob ndù: Yen mèn ni b'a we kà nke ndagte nukebwô à? 50Là Yésu tshob mènnzwi ndù: Bamntù o yôg o, nèn tsho fite.
Currently Selected:
Lukas 7: BMa
Highlight
Share
Copy
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
