Lukas 6

Nefag nsa lé' Sabbat

(Mat. 12.1-8; Mark. 2.23-28 )

1A #Neb. 23.26lo be num mo' lé'njù Sabbat, Yésu tshùa ntùm nà nsa, ghazi'te nu i be zine, nke mfag nsa mfèle. 2Là tsemo' ba Férésia tshob bo ndù: Bin ke ngù ju ze ntshù' ke' bam neghù lé'njù Sabbat là numke? 3Yésu #1 Sam. 21.1-6bùnte bo, ntshob ndù: Bin ke' siaṅ ju ze David na' ngù ngelaṅ nziku' ya i boa ben tse bo à bo na' mbe là, 4mb'a #Lev. 24.9na' ntsho Ndà Nsi, ndo' bàn le'te Nsi, njù mbèn mfà mba ze ben tse bo à bo be là, bàn ze ntshù' be ke bam nejù, k'a ke nda' ghale'te Nsi tù' bo là ké? 5A nke ntshob bo ndù: Mén mèn num ntô mba Sabbat.

Mèn ze bu i jum nà

(Mat. 12.9-14; Mark. 3.1-6)

6A bèn mbe num mo' lé'njù Sabbat, Yésu tsho sinagogue, nke ntswite bwe; mo' mèn lo be bwe ndù bu i ze zwim jum. 7Ghalèn ṅwa'ni Nsi mba ba Férésia te miag num Yésu, num neyen a be z'a yate mèn lé'njù Sabbat là, bo tshùa bwe, mbot'é. 8Là, a lèn nkwatenu mub ntshob mèn ze bu i jum nà ndù: Lo nsi, tsin tù netèt benntùn, a lo, ntsin tù. 9Yésu tshob bo ndù: M'a' bètte zin nu: Ntshù' bam neghù numebwô ke nukebwô lo lé'njù Sabbat ké? Neyôg mèn ke nezwi i à? 10A lôte njoṅ yub fa ndiaṅ mbume, ntshob yi ndù: Nyit bu o. A ghù bu i yate. 11Là bo dun yantù ntamte ngù ntse'te neyen mba bo ghù Yésu là.

Netsho' ghantum ntshob bàa gham

(Mat. 10.1-4; Mark. 3.13-19)

12A be num tshen lé'njù là, a nèn num mbat num nele'te Nsi, nzi bwe nele'te Nsi. 13Ngelaṅ njù làn nà, a tsiaṅ ghazi'te nu i, ntsho' tse ntshob bàa gham netèt bo, ntsiaṅ mba bo yub ghantum; 14ntsiaṅ Simon ndù Pétro bo Andréa mfèl i. Yakobo mba Yohané, Filibo mba Bartélémi. 15Matio, Tomas, Yakob mén Alféo, Simon ze bo ke ntsiaṅ i Zélôte là; 16Yuda mén Yakobo mba Yuda Iskariot z'a swèn Yésu là.

Ntag nzenze

(Mat. 4.23-25)

17A be swe' bo à bo, ntsin num mo' me kônga, bwoṅ ghazi'te nu i lo yàm bwe neshu mba bwoṅ benntùn yàm tse bo fe Yudéa, Yérusalém mba ngô kaṅ ntse Tiro mba Sidon, 18nse' ju' i mba ndù a yate yub num ngokèt tshob là; ben tse ywètkebwô ke ngùtni yub là nke njate. 19Njoṅ bwoṅ benntùn fa nke ndiag nekwag i, nummbe mo' neta lo ke ntum num i, njate yub fa.

20A bù' miag mi nte num ghazi'te nu i,

ntshob ndù:

Ghafen b'a bin bwoṅbwoṅ,

nummbe nufen Nsi b'a zine;

21ghafen b'a bin tse nziku' tshwèt nja zin ndonni là,

nummbe bin a' se' njwèle.

Ghafen b'a bin tse bin tshwèt ndàn ndonni là,

nummbe bin a' se' ntsiaṅte.

22Ghafen #1 Pét. 4.14b'a bin ngelaṅ benntùn nsi ke bàn zine,

ta' zine, bagte lén sin num Mén mèn nà.

23Bin #2 Kron. 36.16; Mfa' Gha. 7.52tsiaṅte num sen lé'njù là,

ndun tsiaṅte, nummbe ntsho'fa' min b'a mi ndùb mfe kamànyam;

ba tà tshob lo ke ngù be ndaṅndaṅ num ghatshob ntshob Nsi.

24Là nge' num bin ghankàb,

nummbe bin à ghù zin fite ntù.

25Nge' num bin tse bin ywèt ndonni là,

nummbe bin a' se' mb'a ntùm vù

mba ntùm ntsenyà.

26Nge' num bin ngelaṅ njoṅ benntùn fa

nsi ke tshob be mebwô num bin nà,

nummbe ba tà tshob lo ke ngù be ndaṅndaṅ

num ghatshob ntshob Nsi tse tatte.

27Là me tshob bin tse bin tshwèt nju' àm nà ndù: Bin ke nkô ghakeban tsine, ngù mebwô ben tse bo num mbàn zin nà. 28Naṅ mbotni num ben tse bo num nso ndon tu bin nà; bin ke nde'te Nsi num tu ben tse bo num ngùtni zin nà.

29A be ze mèn lab toṅ o là, o la'te mba mo' bag i yi. A be ze mèn fin nzwe o ze num tù là, kà gha yi ndù a lo' mba ze ntùm bwe. 30Fà ju mèn z'a lon wù là; mèn z'a lo' ju z'a b'a yu là, kà bèn mbètte. 31Ju #Mat. 7.12ze bin kô ndù benntùn ke ngù bin nà, mba bin bèn nke ngù zin be ndaṅndaṅ num bo.

32A be ze bin num nke nkô be ben tse bo num nkô zin nà, mba we z'a labte zin à? Mba ben kebwô num nkô yub ben tse bo num nkô yub là. 33A be ze bin num ngù mebwô ben tse bo num ngù mebwô bin nà, mb'a nsi ywimte zin ke? Mba ben kebwô num ngù be ndaṅndaṅ. 34A be ze bin num mfo ju ben tse bin nywinte nebèn nkwé bo là, mb'a nsi ywimte zin ke? Mba ben kebwô num mfo ben kebwô, mbèn nkwé be njoṅ i. 35Mba bin nà, bin kô ghakeban tsine, ngù numebwô, mbèn mfo ke nywinte nekwé sàm ju, ndùlala ndù ntsho'fa' min se' mbe mi ndùb, bin bèn mbe bon Nsi mfe tù; nummbe a num nkô ghakelèn numebwô mba ghatshùag.

36Bin be ghakondèn mba Tà zin be ngakondèn nà. 37Kà bin tsho'te ntsha mèn, ndù kà bo ghù ntsho'te zine. Kà bin naṅ ntsha tu mèn, ndù kà bo ghù naṅ ntsha tu bin. Bin lagte, bo nsi ghù se' lagte bin. 38Bin fà, bo nsi se' fà bin. Bo nsi so ju ntùm mbàm min féle, tshame, a dun mfètte. Bo nsi lo' à be zin mfi' fi' zin yi.

39A #Mat. 15.14tshob mba mo' tànkùt bo ndù: Be mfùmiag tshagte mo' a ndùke? Mba ntu tshob bàa fa ke vù ntùm tàm ké? 40Ngazi'te #Mat. 10.24-25; Yoha. 13.16; 15.20ke' be tshùa ngatswite, mba zit ngazi'te lo num miagte kà mbe mba ngatswit'é là.

41Numk'o nke ndôte nyi'nga z'a be lag mfèl o là, ke yen kam ntshwèn z'a be lag o l'à? 42A be o bèn ntshob mfèl o à ndùke ndù: Mfèl àm, bam ndù me sô nyi'nga ntùm lag su, wù z'o ke' yen kam ntshwèn z'a be lag o l'à? Mèn mfùm, bwôgmbwe nsô kam ntshwèn lag o, kà njen nze, njôg nsô nyi'nga lag mfèl o.

43Nummbe tù mebwô ke bwe s'a num njam ntàm kebwô là, tù kebwô ke bèn mbe bwe s'a num njam ntàm mebwô là. 44Nummbe #Mat. 12.33bo ke ndèn mba sit tù lo à tàm se; bo ke' be kàb tshom num tù njô, ke bèn nkàb mbù num tù nga'lone. 45Mèn #Mat. 12.35mebwô num nsô tshu mebwô ts'a tse'te ntù i là; mèn kebwô sô ju kebwô ntùm tshu tse tse kebwô. Nummbe ju z'a dun ntùm ntù mèn nà, ntshu i ke ntshob à be yi.

46Numke bin nke ntsiaṅ àm ndù: Tshùaben, Tshùaben, ke ghù ju ze me num ntshob à?

47Mba we lo z'a num nse' me, nju' ntshob màm nke nze là, m'a' tswite zin mèn z'a fut'é là.

48A fut'a mo' mèn z'a be kut ba', ntswe' tse i a nèn nsi kua' mebwô, a te tun ba' num gholoṅ nà. Mbaṅ lo, ntse dun, ntsitmbaṅ tshùa, ngwù num yen ba' là, ke ku' nenyi't'é, nummbe bo lo kul i mebwô.

49Là mèn z'a ju' ntshob ke ze là fut'a mo' mèn z'a na' nkut ba' i num tsha'a, ke tswe' tse i, ntsitmbaṅ tshùa, ngwù num i, be ndùse, a vù, ze nevù yen ba' là bag neshu.

Currently Selected:

Lukas 6: BMa

Highlight

Copy