Lukas 19

Sakiô

1Yésu tsho Yériko, ntshùa netèt ngô. 2Tshù, mo' mèn lo be bwe, lén se Sakiô, tà ghakwéfé', mbèn mbe ngankàb. 3A lo ke ndiag neyen Yésu lèn mèn z'a be yi là, là ke ku'ni num bwoṅ benntùn, nummbe a na' mb'a mekam mèn. 4A kù nde nèn mbwe, nko' num mo' tù fènngab num neyen Yésu, nummbe a nsi tshùa bwe. 5Yésu kum num yen dù' là, mbù' miag mi tù, ntshob yi ndù: Sakiô, swe' nsi ndende, nummbe sènni a bwô ndù me zi à ndà o. 6Sakiô swe' nsi ndende, ndo' Yésu ntùm tsiaṅte. 7Njoṅ yub fa be yen yen nu là, ntshobte tun tô, ntshob ndù: A nèn ntsho ndà ngaghù nukebwô nzi bwe. 8Sakiô tsin tù, ntshob mbwe Tshùaben ndù: Tà, tshù, me nsi fà mo' bag tshu tshàm bwoṅbwoṅ; a be ze me na' nkubte mèn nkwé ju yi là, mba m'a' ba' yi nze tse kuà. 9Yésu tshob yi ndù: Sènni yôg tsho ntùm yen ndà li, nummbe mba yen mèn ni be z'a mo' mén Abraham. 10Nummbe #Mat. 18.11Mén mèn se' à nediage, bèn yôg z'a na' mbi là.

Tànkùt minà

(Mat. 25.14-30)

11Yésu #Mat. 25.14-30bèn ntshob mo' tànkùt ben tse bo lo neju' tshen nu li là, nummbe a lo ke ngebte Yérusalém mba nummbe bo lo ke nkwate ndù nufen Nsi tù' nese'e. 12A tshob ndù: Mo' mèn ndùb lo ke nèn ntùm mo' ngô z'a sag là, ndù bo yo' i fen k'a bèn njam. 13A ghù bo tsiaṅ tshe' tse gham, a fà minà bo gham, ntshob bo ndù: Bin nèn nta, njù bin tà nkum ngelaṅ me nsi bèn njam nà. 14Là ba la' lo ke mbàn i; ngelaṅ a nèn nà, bo tum bo nèn ntshob ndù: Bag ke' kô ndù yen mèn nà tô yage.

15Ngelaṅ z'a bèn njam ndù bo yo' i fen nà, a ghù bo tsiaṅ tshe' tse ts'a fà nkàb bo là neyen njoṅ bin ze mba we lo ta njù là. 16Mbwe i tsin mbwe i, ntshob ndù: Tshùaben, minà o tsho nta njù tse gham. 17A tshob yi ndù: A bwô me ngafa' ze mebwô, mb'o be mèn nenùn num metsit nu là, o nsi ke tô ngô gham. 18Mbatte bàa se' ntshob ndù: Tshùaben, minà o tsho nta njù tse tàn. 19A tshob yen ni be ndaṅndaṅ ndù: O nsi tô yu à ngô tàn. 20Mo' se' ntshob ndù: Tshù minà ze me na' nkutte ntùm kam nzwe ndé' li. 21Nummbe me lo ke mbwôg o, nummbe o b'a tshùagkèt mèn; o num ndo' ju z'o ke' yab là, nke ntsho' tshu ts'o be ke ywit là.

22A bùnte yi ndù: Ngafa' ze kebwô, me nsi lo' à be kua' ntshob mu kà tsho't'o yi. O lo lèn ndù me b'a tshùagkèt mèn, nke ndo' ju ze me ke' bèn njab là, nke ntsho' tshu tse me ke' bèn njwit là. 23Numk'o na' mbe ke yab nkàb àm dù' ze bo num ndé' nkàb l'à? Mba me be bèn njam nsô bin i. 24A tshob ben tse bo be bwe là ndù: Bin kwé yen minà là yi, mfà mèn z'a ghù minà gham nà. 25Bo tshob yi ndù: Tà, a ghù minà gham. 26A #Mat. 13.12; Mark. 4.25; Luk. 8.18bùnte bo ndù: Me tshob bin ndù: Bo nsi fà mèn z'a ghù là; là mèn z'a ke' ghù là, bo a' kwé mba z'a ghù là; 27mbe se' mba ghakeban tshàm tse bo na' mbe ke kô ndù me be mfen nà, bin lo' yub nse' yi nsen ni mbwe àm, nkebte ntô mube. 28Yésu tshob ndùlala, ntshùa mbwe num neko' nèn Yérusalém.

Mba Yésu tsho Yérusalém nà

(Mat. 21.1-11; Mark. 11.1-11; Yoha. 12.12-19)

29Yésu be ghebte Bètfagé mba Bètania mbaṅ mbat ntene, ntum tsemo' ghazi'te nu i bàa, 30ntshob ndù: Bin nèn ntùm yen ngô là z'a be mbwe là, bin a' be tsho bwe, njen mén kekwèn ndù bo taṅ i, ze mèn ke' yoṅ nto' ko' num i là. Bin ké' i ndo' i nse' yi. 31A be ze mèn bètte zin ndù: Numke bin nké' i à? Bin bùnte ndù: Nummbe Tshùaben tshwèt ndiag i.

32Ben tse Yésu tum yub là nèn njen be ndaṅndaṅ mba Yésu tshob bo là. 33Mba bo ke nké' yen mén kekwèn nà, ben tse bo ghù i là tshob ndù: Numke bin nke nké' yen mén kekwèn n'à? 34Bo bùnte ndù: Nummbe Tshùaben tshwèt ndiag i.

35Bo nèn yi mfà Yésu, ma' nzwe tshob num mén kekwèn ngù Yésu ko' num i. 36Mb'a ke nèn nà, bo nke nsate nzwe tshob num manze. 37Mb'a ke ngebte mbaṅ Yérusalém dù' swe'swe' num mbat nten nà, njoṅ bwoṅ ghazi'te nu i fa dun tsiaṅte, nto' neke nyàmte Nsi kua' neta num njoṅ nsà tse bo na' njen nà. 38Ntshob #Yobk. 118.26ndù:

Mbotni be mfen z'a tshwèt nse' num lén Tshùaben nà.

Fite be kamànyam, mba ghamte be tà mfe tù.

39Tsemo' ba Férésia tse bo be netèt bwoṅ benntùn nà tshob Yésu ndù: Ngatswite, tshobte ghazi'te nu o. 40A bùnte ntshob ndù: Me tshob bin ndù: A be ze bo mi' là, mba ndoṅ nsi kua'a.

41Ngelaṅ z'a ke ngebte là, a yen ngô, nkua' num i, ntshob ndù: 42A lo mbe ndù mba wù yu ntùm sen lé'njù li, lèn ju z'a be a ghù o tswe fite là! Là yen nu là lem num miag mu. 43Tsemo' lé'njù nsi se' num o, ghakeban tsho nsi diaṅ o mba nsam nà, fél o, bèn tshètt'o bag bag. 44Bo nsi bagt'o, wù bin à bon tsho ts'o ghù là, ke bèn mfaṅ mo' loṅ num mo'o, nummbe o ke' lèn ngelaṅ yen nà ze Nsi se' nelôt'o là.

Nelànte Ndà Nsi

(Mat. 21.12-17; Mark. 11.15-19; Yoha. 2.13-22)

45Yésu tsho ntùm Ndà Nsi, nto' neta' ghatantàne; 46nke #Es. 56.7; Yer. 7.11ntshob bo ndù: Bo lo kite ndù: Ndà àm nsi b'a ndà nele'te Nsi; là bin ghù a kaṅ ntù' ngab ba fimntshu. 47Yésu #Luk. 21.37lo ke ntswite njoṅ lé'njù fa ntùm Ndà Nsi, ghale'te Nsi tse ndùbndùb, ghalèn ṅwa'ni Nsi mba ba mbwe benntùn ntùm ngô nke ndiag nezwi i. 48Là bo ke lèn mb'a bwô ndù bo ghù là, nummbe njoṅ benntùn fa tse bo ju' i là lo lat num i.

Currently Selected:

Lukas 19: BMa

Highlight

Copy