Lukas 20

Dù' ze ngù' Yésu fe là

(Mat. 21.23-27; Mark. 11.27-33)

1A lo be num mo' lé' netèt tshen lé'njù là, mba Yésu ke ntswite benntùn ntùm Ndà Nsi, mbèn nke ntshob nkùn mebwô là, ghale'te Nsi tse ndùbndùb mba ghalèn ṅwa'ni Nsi se' boa ghakwé mbwe. 2Ntshob yi ndù: Soṅ yag ngù' z'o be ngù tshen nu li yi là; we bèn mfà yen ngù' là wù à? 3A bùnte ntshob bo ndù: Mba m'a' bètte zin yàm nu, bin tshob me. 4Kwéntse Yohané fe à kamànyam k'a fe à benntùn à? 5Là bo kwate ntshob netèt bo ndù: A be ze be tshob ndù a fe à kamànyam nà, mb'a' tshob ndù: Bin na' mbe ke bam i numke? 6Là, a be ze be bèn netshob ndù: A fe à benntùn nà, mba njoṅ benntùn fa nsi tamte ben ndoṅ, nummbe bo yen kua' ndù Yohané na' mb'a ngatshob ntshob Nsi. 7Bo bùnte ntshob ndù bo ke' lèn dù' z'a fe là. 8Yésu tshob bo ndù: Mba mba me yàm ke nsi tshob ngù' ze me be ngù tshen nu là yi là bin.

Tànkùt ghadiaṅ nkùa

(Mat. 21.33-46; Mark. 12.1-12)

9Yésu #Es. 5.1to' netshob yen tànkùt li benntùn ndù: Mo' mèn lo bwe nkùa njab ghadiaṅ nkùa ntùm bwe, nèn katte, ntsho ntswe ngelaṅ yàme. 10Ngelaṅ ku', a tum mo' tshe' i ghadiaṅ nkùa ndù bo fà mo' bag tshu nkùa yi. Là ghadiaṅ nkùa lab i, nta' i, a nèn mbu mbu. 11A bèn ntum mo' tshe' i, bo lab mba yen nà, ntshabt'é, nta' i, a nèn mbu mbu. 12A bèn ntum mo' tshe' i mbatte tat, mba yen nà ze, bo be't'é, ma' i njù. 13Ngankùa tshob tu wul i ndù: M'a' ghù à ndùke? M'a' tum mén àm ze me num nkô i là; mo' ndù bo nsi bwôg i. 14Là ngelaṅ ghadiaṅ nkùa yen i là, bo tshob bo bo ndù: Yen ni b'a njùndà, be zwi i ndù ntsi' tù' mi be. 15Bo tèn i, ntum ntùm nkùa, nzwi i. Ngankùa nsi ghù à ndùke? 16A nsi se' ghù bo zwite tshen ghadiaṅ nkùa là, a bèn mfà nkùa tsemo' tse ghua.

Bo be ju' yen nu là, ntshob ndù: Kà Nsi bam yen nu là! 17Là #Yobk. 118.22Yésu te miag num njoṅ yub fa, ntshob bo ndù: Men ntshob li mi bo na' nkite là bagt'a ndùke? Loṅ se ghabomndà na' ngua' là, kaṅ ntù' loṅ ntôgndà. 18Mèn z'a nsi vù num sen loṅ nà be'te wul i bwe; a be ze sen loṅ nà bèn ngwù num mèn nà, mb'a' nywi't'é. 19Ghalèn ṅwa'ni Nsi mba ghale'te Nsi tse ndùbndùb lo ke ndiag netshùb Yésu be ngelaṅ mbile, là nke mbwôg benntùn. Bo lèn kua' ndù Yésu ke ntshob yen tànkùt là mfà à num bo.

Nsi mba Kàsà

(Mat. 22.15-22; Mark. 12.13-17)

20Bo to' netom Yésu, mbèn ntum ba ntom yi. Tshen ben ni nke ngù mba bo b'a ben netsin nà, nke ndiag netshùa num ta' ntshob Yésu kà ntshùb i, mfà ghatô ngô, mba bu ngomna. 21Bo bètt'é ntshob ndù: Ngatswite, bag lèn ndù ntshob mu mba yu netswite b'a netsine; o ke' be lôte tsho mèn, là o num ntswite manze Nsi ntùm nenùne. 22Ntshù' bam bag ndù bag fà ntshub Kàsà ké, ke nga à? 23Yésu lèn nkùnkù yub ntshob bo ndù: Bin lo' denario ntswite me. 24A bètte yub ndù: A tu we li num bwe mba lén we? Bo bùnte ndù: Kàsà. 25Yésu tshob bo ndù: Tshu Kàsà, bin fà Kàsà; tshu Nsi, bin fà Nsi. 26Bo ke ku'ni nelo' ntshob mi mbùn i yi mbwe benntùn; njoṅ yub fa tshàm num ze nebùnte, mi ntswe.

Nu nebam num vù

(Mat. 22.23-33; Mark. 12.18-27)

27Tsemo' #Mfa' Gha. 23.8ba Sadukaï tse bo ke nga ndù nelo num vù ke' be là bèn nse' mbètt'é yen nu li ndù: 28Ngatswite, #Neb. 25.5Mosé lo kite bag ntùm ntshù' ndù: A be ze mfèt mèn ghù mènnzwi, nkwù ke faṅ mén nà, mb'a bwô ndù mfèl i so mfôge, mbwe bon ngù nzwit mfèl i yi. 29Tshù, tsemo' fèt sammbàa lo be bwe, mbwe i z'a ghù mènnzwi là kwù ke ghù bon. 30Mbatte bàa, 31mba mbatte tat so yen mfôg mènnzwi là, mba njoṅ yub sammbàa fa. Njoṅ yub sammbàa fa kwù ke faṅ bon. 32Mba mènnzwi bèn nkwù ze. 33Ndùlala, ngelaṅ ze nelo num vù nsi ku' là, yen mènnzwi là nsi b'a nzwi we netèt bo, mba njoṅ yub sammbàa fa so i l'à? 34Yésu tshob bo ndù: Bon ntùm yen njù li num nso bènnzwi, mbèn mfà ngonngon tshob ntùm nandà. 35Là ben tse Tshùaben yen ndù bo ku'ni neghù yub bag i ntùm njù z'a nsi se' là, mba ntùm nelo num vù là, ke nsi so bènnzwi, ke bèn mfà ngonngon tshob ntùm nandà. 36Nummbe bo ke nsi bèn kwù, bo tù' à mba ba Angél là; bo bèn mb'a bon Nsi, ndù bo bam num vù. 37Là #Netu. 3.6fe ben num mbam num vù mba Mosé na' nda'te ntùm dù' z'a be ntùm dù' z'a num ntshob tsho tswe'fiaṅe, ngelaṅ z'a num ntsiaṅ Tshùaben Nsi Abraham, Nsi Isak mba Nsi Yakob là. 38Nsi ke' b'a Nsi fe ben, là, a b'a Nsi ben bo be ntùn nà; nummbe njoṅ benntùn fa b'a ntùn num ze tu. 39Tsemo' ghalèn ṅwa'ni Nsi bùnte, ntshob yi ndù: Ngatswite, o tshob kua' mebwô. 40Bo ke bèn mfèn ntù nebètt'é sàm nu.

Kristô mén David

(Mat. 22.41-46; Mark. 12.35-37)

41Yésu tshob bo ndù: Bo ke ntshob ndù Kristô b'a mén David à ndùke? 42Tu #Yobk. 110.1wut David lo tshob ntùm ṅwa'ni Yobkwi ndù: Tshùaben tshob Tshùaben àm ndù: Tswe num bag bu àm ze zwim, 43tà nkum ngelaṅ me nsi ma' ghakeban tsho nsi, bo tù' nko' nku mu là. 44Mba David tsiaṅ i Tshùaben nà, be a bèn mbe mén i à ndùke?

Mba Yésu tshobte ghalèn ṅwa'ni Nsi là

(Mat. 23.1-33; Mark. 12.38-40)

45Ngelaṅ njoṅ benntùn fa ke nju' i là, a tshob ghazi'te nu i ndù: 46Bin bam nà num ghalèn ṅwa'ni Nsi, tse bo num nkô neket ngale, nkatte, nkô ndù benntùn ke ntsha'te yub num manze, nkô netswe mbwe ndiaṅ ntùm ba sinagogue, mba mbwe dù' ntùm dù' jujù là. 47Bo num nke nkwé jujù fôg bènnzwi, mbe tatte benntùn, nke nde'te Nsi a sag. Bo a' se' ngwù ntsha z'a tshùate là.

Currently Selected:

Lukas 20: BMa

Highlight

Copy