Lukas 18

Tànkùt ngatsho'te ntsha

1Yésu tshob bo tànkùt, ndo' nda'te mb'a bwô ndù mèn ke nde'te Nsi ke bot njoṅ ngelaṅ fa là. 2Mo' ngatsho'te ntsha lo be ntùm mo' ngô ke be bwôg Nsi, nke ngwag njoṅ benntùn fa. 3Mo' mfôg mènnzwi bèn mbe ze ntùm yen ngô là, nke nse' ntèl i, ntshob ndù: Ghù nunetsin me, nkwé àm bu ngakeban àm. 4Num ngelaṅ yàme, a ke kô, là, a tshob tu wul i mo' lé'njù ndù: Me ke' be bwôg Nsi, mbèn nke ngwag njoṅ benntùn fa. 5Là ndonni, mba yen mfôg mènnzwi li num ngùtni àm nà, m'a' keb ntsha i, mbwôg ndù k'a bèn nse' ntshu' tu àm.

6Tshùaben tshob ndù: Bin ju' mba yen ngatsho'te ntsha ketsin li tshob là ké? 7Nsi ke' ku'ni neghù nunetsin ben ts'a tsho' yube, tse bo num nkua' yi tèttswe' mba mbwôgtshù là ké? A ke nsi fènte yub ké? 8Me tshob bin ndù mb'a' ghù nunetsin bo be kua' ndende. Là ngelaṅ ze Mén mèn nsi se' là, a nsi fon bamntù num nsitsha' ké?

Tànkùt mén Férésia mba ngakwéfé'

9A tshob mba mo' tànkùt mfà num ben tse bo num nke ndo' wut tshob mba ben netsine, nke ngwag tsemo' benntùn nà. 10Ben bàa lo ko' nèn ndà Nsi num nele'te Nsi, mo' na' mb'a mén Férésia, mo' be ngakwéfé'. 11Mén Férésia tsin tù, nde'te Nsi num tu wul i, ntshob ndù: Nsi àm, me labt'o mba me ke' be tshàm à mba tsemo' benntùn, tse bo b'a ba fimntshu, ben nu tshob ke' tsin nà, ghaghù màndà, ke bèn mbe tshàm à mba yen ngakwéfé li là. 12Me num nzi nziku' yoṅ bàa ntùm ta' ngabnjù; me num nga ngabte tshu tshàm fa nze gham, mfà bag i ntshù' num lén so. 13Là ngakwéfé' tsin ze tà ngùanesà, ke ku'ni nebù' miag mi ndôte mfe kamànyam. A tù' lab be ntù i ntshob ndù: Nsi àm, ko ndèn màm ze me be mèn kebwô là. 14Me #Mat. 23.12; Luk. 14.11tshob bin ndù: Yen mèn ni lo be bèn njam ndà i ndù nu i tsin, ze mo' ke tsin. Nummbe mèn z'a num ndo' wul i nèn yi tù là, bo nsi tèn i fà nsi; mèn z'a num ndo' wul i nèn yi nsi là, bo nsi bù' i fà tù.

Yésu boa bonfi

(Mat. 19.13-15; Mark. 10.13-16)

15Bo lo' mba bonfi nse' yi ndù Yésu kwag yube. Ghazi'te nu Yésu be yen ndùlala, ntshobte yube. 16Là Yésu tsiaṅ yub mbaṅ i, ntshob ndù: Bin faṅ bontsit bônke' bo se' ntèl àm, kà bin tshèt yube, nummbe nufen Nsi b'a ze ben tse bo be ndaṅndaṅ mba bo là. 17Kua' nenùne, me tshob bin ndù: Mèn z'a ke nsi kwé nufen Nsi à mba metsit mén nà, ke nsi tsho bwe.

Ménnshum ngankàb

(Mat. 19.16-30; Mark. 10.17-31)

18Mo' nkam bètte Yésu ndù: Ngatswite ze mebwô, m'a' ghù à ke kà ngù yàm bag i ntùm yôg matmat là? 19Là Yésu tshob yi ndù: Numk'o ntsiaṅ àm mèn mebwô à? Sàm mèn ke mèn mebwô k'a ke nda' Nsi tù' i. 20O #Netu. 20.12-16; Neb. 5.16-20lèn ntshù' Nsi: Kà ghù màndà, kà zwi mèn, kà yi tshô, kà kwé nta tatte, ke nku'ni tàan mba màan. 21Yen mèn nà bùnte ndù: Me lo à ze men ntshù' Nsi là fe ngelaṅ me be mônke' là. 22Yésu be ju' mb'a tshob là, ntshob yi ndù: Ta' ju bèn mbwoṅ wù ntshù'. Swèn njoṅ tshu fa ts'o ghù là, mfà nkàb bwoṅbwoṅ, o nsi se' ghù junkàb tanjoṅ mfe kamànyam; mbèn nse' ntam njam àm. 23Là, a be ju' ndùlala nyamte se i, nummbe a lo ghù tshunkàb yàme.

24Yésu lôt'é, ntshob ndù: Mi' a ta neshu ben tse bo ghù tshu yàm nà netsho ntùm nufen Nsi. 25A fùag kamél netôg tô nto ntshùa mb'a be ngankàb tsho ntùm nufen Nsi là. 26Ben tse bo ke nju' i là tshob ndù: Kà we z'a ku'ni neyôg à? 27A bùnte ndù: Ju z'a num ntshùa benntùn nà ke' be tshùa Nsi.

28Là Pétro tshob yi ndù: Tshù, bag lo faṅ tshu tse bag ghù là, ntam njam o. 29Yésu tshob bo ndù: Kua' nenùne, me tshob bin ndù: Mèn ke bwe z'a na' mfaṅ ndà i, nzwi i, fèt tse, tàab mba màab, ke bon tse lo num nufen Nsi là, 30z'a ke nsi kwé tshen tshu là kua' yàm fe ndonni ntùm yen njù li, bèn kwé yôg matmat ntùm njù z'a nsi se' là.

Mba Yésu na' nsoṅ vù se bo mb'a lo num vù là

(Mat. 20.17-19; Mark. 10.32-34)

31Yésu lo' tse ntshob bàa gham tù' bo, ntshob bo ndù: Tshù, bag bin tshwèt nko' nèn Yérusalém, njoṅ nu fa tse ghatshob ntshob Nsi na' nkite mfà num Mén mèn nà nsi bumte. 32Bo nsi fà Mén mèn mbu ghakelèn Nsi, bo tshabt'é, ngùtni i, ntôg nkekùà num i, 33ndab i nshua'a, nzwi i; a be be mbatte lé'njù tat a bam num vù. 34Ghazi'te nu i ke ju' sàm ju num yen nu là; men ntshob li lo lemte mbwe bo, ntun mi bèn nke ndemte num zenu yube.

Mba Yésu na' njate mfùmiag Yériko là

(Mat. 20.29-34; Mark. 10.46-52)

35Mba Yésu ke ngebte Yériko là, mo' mfùmiag tswe nsi nkaṅ manze nke ndon tshu. 36A be ju' mba bwoṅ benntùn tshwèt ntshùa là, mbètte ju z'a tshwèt ntôg là. 37Bo bùnte yi ndù: A Yésu ze Nazarèt bèn nke ntshùa. 38A kua' neta ndù: Yésu Mén David, ko ndèn màm! 39Ben tse bo ke nzin mbwe là, nke ntshobt'é ndù a mi ntswe, là, a bèn nkua' kua' neta ndù: Mén David ko ndèn màm! 40Yésu tsin ngù bo lo' i nse' yi; ngelaṅ ze mfùmiag ghebte mbaṅ i là, a bètt'é, ntshob ndù: 41Ke z'o kô ndù me ghù wù à? Mfùmiag bùnte ndù: Tshùaben, ghù me yen nze. 42Yésu tshob yi ndù: Yen nze, bamntù o yôg o. 43Be num yen ngelaṅ nà, a yen nze, ntam njam Yésu nke ngamte Nsi. Njoṅ benntùn fa be yen yen nu là, mfà ghamte Nsi.

Currently Selected:

Lukas 18: BMa

Highlight

Copy