Yohané 1

Ntshob Nsi ntùm njù

(Yoha. 8.12; 14.9)

1Neto'te, ntshob lo be, ntshob na' mb'a bo Nsi, ntshob na' mb'a Nsi. 2A lo be fe neto'te bo Nsi. 3A lo nabte njoṅ tshu fa. Sàm ju ke bwe num ts'a be, ndù a lo ke bèn nabt'é là. 4Yôg lo be num i, yôg na' mb'a nka' benntùn. 5Nka' ké' ntùm njame, njam ke tshùb i.

6Mo' #Mat. 3.1; Mark. 1.4; Luk. 3.1-2mèn lo be bwe ze Nsi tum i là, lén se Yohané. 7A lo se' num nu kwénta, ndù a kwé nta num nka', ndù njoṅ benntùn fa tshùa njam i mbame. 8Ke b'a ndù tu wul i b'a nka', là ndù a kwé nta num nka'. 9A na' mb'a kua' nka' nenùne, z'a num nké' njoṅ benntùn fa bo se' ntùm njù là.

10A lo be ntùm njù; a lo nabte njù, njù ke lèn i. 11A lo se' la' i, tse ben ke lèn i. 12Là njoṅ benntùn fa bo lo' i, mbam lén se là, a lo fà ngù' bo ndù bo tù' bon Nsi, 13tse bo ke' bwe yub à lem ke nekô mbàb wut, ke nekô mènntùn lo, là tse Nsi bwe yub là.

14Ntshob lo tù' mènntùn, nke ntswe netèt be; be yen nkuni mi, nkuni mi a kwé Tà, yi z'a be nkwi Mén ntshù', ndù a dun kondèn mba nenùn nà. 15Yohané kwé nta num i, nkua' ntshob ndù: Yen mèn ni b'a ze me na' ntshob ndù a tshwèt nse' njam àm nà; a kwé mbwe me. Nummbe a na' mbèn mbwôg be me. 16Ntùm ze nedune, be lo kwé kondèn num kondèn njoṅ be fa. 17Nummbe ntshù' lo tshùa njam Mosé nse'e, kondèn mba nenùn njam Yésu Kristô nse'e. 18Sàm mèn ke' yoṅ nto' yen Nsi; a b'a nkwi Mén Nsi ntshù' z'a be num ndàntù Tà là, a b'a yi bèn nto't'é.

Kwénta Yohané nganyu' benntùn ntse

(Luk. 3.1-18; Yoha. 5.33-36)

19Yen *gi*ni b'a kwénta Yohané: Ngelaṅ ba Yuda tum ghale'te Nsi mba ba Lévi tse bo be Yérusalém, mbaṅ i ndù bo bètt'é ndù: O b'a we là, 20a tshob nunenùne, ke gha, ntshob nunenùn ndù: Me ke' b'a Kristô. 21Bo #Neb. 18.15,18; Mal. 3.23bètt'é ndù: K'o b'a we? O b'a Elia ké? A tshob ndù: Me ke b'a yi. O b'a ngatshob ntshob Nsi ké? A bùnte ndù: Nga. 22Ndùlala bo tshob yi ndù: O b'a we bag tsho mfà bùn ntshob ben tse bo tum yag l'à? Ke z'o tshob mfà num tu wul o à? 23A #Es. 40.3tshob ndù: Me b'a nze mèn z'a tshwèt nkua' num kônkwa là, bin late manze Tshùaben mba Esaya ngatshob ntshob Nsi na' ntshob là, ngù a tsine. 24Ben tse bo tum yub là na' mb'a benntùn netèt ba Férésia. 25Bo bèn mbètt'é, ntshob yi ndù: Kà numk'o nke nyu' benntùn ntse, a be z'o ke' b'a Kristô, ke be Elia, ke be ngatshob ntshob Nsi lo l'à? 26Yohané bùnte bo ntshob ndù: Mba me là, me ke nyu' benntùn à ntùm ntse, là netèt bin, mo' mèn tsin bwe, ze bin ke' lèn i là. 27A tshwèt nse' njam àm, me ke' ku'ni tshàm neké'te nkù nketo' mi. 28Yen nu là tôg Bètania mo' yoṅ Yordan, dù' ze Yohané ke nyu' benntùn ntse là.

29Njù be làne, Yohané yen Yésu, a nke nse' mbaṅ i, a tshob ndù: Tshù mén njùmbwe Nsi z'a ket nukebwô njù là. 30A b'a yi ze me na' ntshob num i ndù: Mo' mèn tshwèt nse' njam àm z'a kwé mbwe me là. 31Nummbe a na' mbèn mbwôg be me. Mba tu wul àm lo ke lèn i, là me na' nse' nke nyu' benntùn à ntùm ntse ndù bo tswit'é Israél. 32Yohané kwé nta ntshob ndù: Me lo yen Ywèt Nsi swe' mba bwoṅsaṅ nà mfe kamànyam nse' ntswe num i. 33Mba tu wul àm, me lo ke lèn i, là mèn z'a tum àm ndù me se' nyu' benntùn ntùm ntse là, yen mèn nà lo tshob me ndù: Mèn z'o nsi yen Ywèt Nsi swe'e, nswe' ntswe num i là, a b'a yi z'a nyu' benntùn Ywèt Nelàn nà. 34Mba tu wul àm lo yene, me lo kwé nta ndù yen mèn ni b'a Mén Nsi.

Netsiaṅ mbwe ghazi'te nu Yésu

(Mat. 4.18-22; 9.9; Yoha. 6.37)

35Njù be làne, Yohané bèn ntsin bwe, mba ghazi'te nu i bàa; 36a be yen Yésu z'a ke ntshùa là, nte miag mi num i, ntshob ndù: Tshù Mén njùmbwe Nsi là. 37Tshen ghazi'te nu i bàa là ju' mb'a tshob là, ntam njam Yésu. 38Là Yésu kaṅ wul i njam, mbe yen mba bo tshwèt ntam njam i là, ntshob bo ndù: Ke ze bin tshwèt ndiag à? Bo tshob yi ndù: Rabbi (yen nà bagt'a ndù ngatswite), o ke ntswe à yà? 39A tshob bo ndù: Bin se' njene. Ndùlala bo nèn, njen dù' z'a ke ntswe bwe là. Bo à bo tswe num sen lé'njù là. A na' mb'a nguan nyam kuà mfetnjù. 40Andréa mfèt Simon Pétro na' mb'a mo' mèn netèt tshen ben bàa li tse bo na' nju' ntshob Yohané, ntam njam Yésu là. 41A bwôgmbwe mfon mfèl i Simon, ntshob yi ndù: Bag fon Mésia, (yen nà bagt'a ndù Kristô). 42A lo' i nèn yi mbwe Yésu. Yésu lôt'é ntshob ndù: O b'a Simon mén Yohané, bo nsi ke tsiaṅ o ndù Kéfa, (yen nà bagt'a ndù Pétro).

43Njù be làne, Yésu kô nenèn Galiléa, mfon Filibo, ntshob yi ndù: Tam njam me. 44Filibo na' mb'a ze Bètania, ngô Andréa mba Pétro. 45Filibo fon Natanaél, ntshob yi ndù: Bag fon mèn ze Mosé kite nu num i ntùm ntshù', ghatshob ntshob Nsi bèn ntshob là, Yésu mén Yosèf, Yésu ze Nazarèt. 46Natanaél tshob yi ndù: Be ju mebwô tum Nazarèt ké? Filibo tshob yi ndù: Se' njene. 47Yésu be yen Natanaél mb'a tshwèt nse' yi là, ntshob num i ndù: Tshù kua' mén Israél ze nenùn ze nkùnkù ke' be ntùm ntù i là. 48Natanaél tshob yi ndù: O lèn àm à yà? Yésu bùnte ntshob yi ndù: Filibo lo mbe tsiaṅ o ndù m'a yen o ngelaṅ o lo ntswe nsi tun mbatsi là.

49Natanaél bùnte yi ndù: Rabbi, o b'a Mén Nsi. O b'a mfen ba Israél. 50Yésu bùnte ntshob yi ndù: O bam à nummbe me tshob wù ndù me lo njen o ngelaṅ o lo ntswe nsi tun mbatsi là. O nsi yen tshu ndùbndùb ts'a tshùa tshen nà là. 51A #Net. 28.12tshob yi ndù: Kua' nenùne, kua' nenùne, me tshob bin ndù: Bin nsi yen kamànyam gha' ntenge mba ba Angél Nsi tse bo tshwèt nko'o, mbèn nke nswe' num Mèn mèn nà.

Currently Selected:

Yohané 1: BMa

Highlight

Copy