Yohané Ju z'a ntùm bwe là
Ju z'a ntùm bwe là
A se' num ba Nkùn Mebwô kuà fa, z'a be kua' ko' fetsebwe là b'a ze Yohané. A ke nda' tshô nge' bo vù Yésu, mba nu ts'a be ntùm bwe là ke' fute ts'a be ntùm tsemo' Nkùn Mebwô là (kam 18—19). Mbèn mbe, a b'a nda' Yohané bèn nkwi'te ba tsemo' tshô ntùm ze Nkùn Mebwô. Mfi': a b'a nda' ntùm ze Nkùn Mebwô Yohané ze tshô nandà Kana mba mba Yésu bumte bo Nikôdémo, bo mènnzwi Samaria, bo neyate kekat Bètèsda, mba mèn ze bo na' mbe bwe i ndù a vù fù be là 3.1-21; 4.1-12; 5.1-18; 9.1-41. O nèn nesiaṅte mebwô, mbo a' yen ndù a nèn netèt ba évaṅglio fa, mb'o a' yen ndù Yohané ke' soṅ nu yàme num mfa' Yésu mba num yôg se num nsitsha'a. Nda' ndù, a be ke tshob nu num bwe, nke nso nku'ni bwe neshu, nummb'a nèn num bwe fa tsemo' nke ntswit'a ndù a bwô bo lèn Yésu kua' mebwô mba mfa' mi a na' mfa' là.
A se' num ntshob mi a tswi lén ze Nkùn Mebwô yi là (1.1-18) évaṅglio nke nda'te ndù Yésu b'a Ntshob Nsi mi a tswe ntùn nà bèn nkaṅ ntù' mèn nyiaṅtu nse' nke ntswe netèt benntùn mba: yôg là, mba nka' là, mba nunenùn nà.
A be bo kebte ze Nkùn Mebwô ndaṅ mbàa: ngelaṅ yôg Yésu nèn nkum num vù se (2.4) ndùlala b'a ndù, mba Nsi ṅa' i mfà tù mbèn mbù'te ghamt'é là (12.23).
— Kà ze ngelaṅ Yésu mbe (1.19—12.50); sen laṅ se li ke ntshob nu mfà à num ba neba'nkuan nzenze: Yohané nganyu' benntùn ntse, ze ngazi'te Andréa, Filibo, Natanaél, mba zit lo netèt bo tshwèt nsoṅ nu num mba Yésu be yi là, nda' ndù mba we lo num mi mbe mi. Mbèn mbe évaṅglio tshwèt nsoṅ mba Yésu bumte yoṅ yàme boa benntùn nà mba nsà nze sammbàa ts'a ghù là. A ke nda'te tshen tshu l'a mba keki, s'a bwô mba we lo yen mbèn nju' ndèn mbagte mi là. Yohané be miagte sen mbwe laṅ se li, ntùnte mbèn nkut tu mfa' Yésu (12.37-50).
— Ngelaṅ ze ze ngelaṅ Yésu ku' là (13.1), Yésu fà mfa' ghazi'te nu i mi bo tù' ke fa' là. Men mfa' là b'a mba mi ntagvù Yésu là (kam 13—16). Mbe tôg ndùlala, a le'te Nsi nke nabte nu vù se mbèn mfà ben ts'a tshwèt mfaṅ nà Nsi (kam 17). Yohané be soṅ mba bo ghom Yésu là, mba bo tsho'te ntsha i là, mb'a na' nkwù num fanta'tù là, mbèn ngù mba bo yen fi nge là, bumte kuzin boa tsemo' évaṅglio num mat ze bo lo' nkite ntshob ṅwa'ni Nkùn Mebwô yi là (kam 18—20). Lé' Pasa nsen ni nke nda'te mba Yésu lo num vù nda'te wul i Maria ze Magdala, nda'te wul i bônke' tse, mebwô mebwô Tomas. Kam 21, bônke' tse ntu sammbàa ze Pétro be netèt bo là tswi nkùn mbe Yésu bam num vù mbaṅ diaṅnkat ntse Tibériade (bo na' kut mba tu ṅwa'ni kà nkite yen ni).
Nekut tu yen Nkùn Mebwô li b'a ntùm (kam 20.30-31). A tshwèt mbagte mfa' évaṅglio mbèn nsoṅ ngasiaṅ yen ṅwa'ni li ndù Yésu b'a Mésia, Mén Nsi ze Nsi na' mbù ben tse là. A b'a ndùlala bèn ghù a yôge, nummbe Yésu z'a be ngantum Tà là, tshob mb'a b'a “Manze, mbe nenùne mbèn mbe yôg” (14.6).
Currently Selected:
Yohané Ju z'a ntùm bwe là: BMa
Highlight
Share
Copy
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.