Neto'te 50

Mba bo sa vù Yakob là

1Yosèf tum ngwù num se tàab, ndo' ntsenyà njo' i yi, ntat'é.

2Yosèf tshob ghatshwinte tse bo ke mfa' yi là ndù bo se' fe tàab ndù k'a bi, bo se' fe tàab Israél. 3Yen nu là tswe lé'njù ṅam nkuà, nummb'a njoṅ ze nese' fe mèn be ntswe là. Ba Egipto làn i lé'njù ṅam sammbàa. 4Ngelaṅ ze ndé'njù tse bo làn i tôg là, Yosèf tswi nkùn ndà Faraon ntshob ndù: A be ze bin tshàm ndèn màm nà, bin tshob ju ze me nsi tshob bin nà Faraon, me le'te zin neshu. Bin tshob yi ndù: 5Tàa #Net. 47.29-31lo ghù me kàn mfe ntshob ndù me bam mb'a bètte là ndù me nsi tshoṅ i ntùm fi s'a na' ntswe' ntùm ngô Kanaan nà, ngelaṅ z'a nsi kwù là. Bin bètt'é ndù me ghù nenèn ntshoṅ tàa ntùm fi ndonni, kà mbèn njam ke di!

6Faraon tshob ndù: Ko' nèn ntshoṅ tàan, ndaṅndaṅ mb'a na' ngù o kàn mfe là. 7Yosèf ko' nèn tshoṅ tàab, njoṅ ghafa' Faraon fa, ben ndùbndùb ntùm ndà i boa ben ndùbndùb ntùm ngô Egipto tam njam i nèn ntshag i, 8njoṅ tunndà Yosèf fa, fèt tse mba tunndà tàab. Bo faṅ nda' bontsit bônke', mbwe tshob boa nyàm tshob mà Gosen. 9Nkalig mba ghako' nyàm tam njam i. A na' mb'a bwoṅ benntùn ndù a yàm neshu.

10Bo zin nkum Athad z'a be yoṅ Yordan nà, bo kua' vù bwe, ndàn vù bwe tata; Yosèf làn vù tàab lé'njù sammbàa. 11Bon la', ba Kanaan lo yen sen vù là se bon làn Athad là ntshob ndù: Tshù kua' mà vù ndùb là netèt ba Egipto! A num ndùlala, bo tswi lén dù' là ndù Abél-Mitoraim. Yen dù' là b'a yoṅ Yordan.

12Bon Yakob tse bandum ghù ju ze tà yub na' ntshob là. 13Bo #Mfa' Gha. 7.16kel i nèn yi mum ngô Kanaan ntshoṅ i mum ngabloṅ ntùm fèn mà Makpéla, fèn ze Abraham na' njun Efron ze Hétia, num nelo' ngù dù' tufi sob yi là. Yen dù' b'a mbwe Mamré.

14Yosèf be miagte netshoṅ tàab, mbèn njam Egipto boa fèt tse mba njoṅ benntùn fa tse bo à bo ko' nèn tshoṅ tàab là.

Miagte mfa' Yosèf

15Fèt Yosèf be yen mba tà yub kwù là ntshob ndù: A be Yosèf lo' be mba tse ghakeban mba' nukebwô tse be na' ngù yi là be l'o? 16Ndùlala bo tum bo nèn ntshob Yosèf ndù: Tàan lo tshob yen nu li ndù kà nkwù, 17ndù bag tshob wù Yosèf ndù o lagte nukebwô fèt tsho boa mfànnu mube! Nummbe bo lo ghù nukebwô num o! Ndonni lagte nukebwô ghafa' Nsi tàan! Yosèf be ju' men ntshob là nkua'a.

18Kua' fèt tse se' yub tu ngwù nsi mbwe i ntshob ndù: Bag b'a ghafa' tsho. 19Là Yosèf tshob bo ndù: Kà bin bwôg! Nummbe me ke lo' ze dù' Nsi. 20Bin lo kwate neghù nukebwô num àm, là Nsi kaṅ a tù' ze mebwô num neghù ndù nu ze bin tshwèt njen sènni là bumte, yen nà b'a ndù neyôg ta' ngô z'a ghù benntùn yàm nà. 21Kà bin bwôg; me nsi lôte zine, bin mba bon tsine. A fite ntù yube, ntshob nu ts'a b'a kwag ntù yub là.

22Yosèf tswe mà Egipto, boa tunndà tàab. A tswe num ngu'njù mén bùm nkù. 23Yosèf yen bon Efraim tà nèn nkum num zwiaṅ benntùn tat; a yen bon Makir tse bandum, bon Manasé tse bandum, tse bo bwe yub mum mbu mi là. 24Yosèf tshob fèt tse ndù: Me nsi kwù! Là Nsi a' lôte zine, ghù bin tum mà ntùm yen ngô li nko' nèn ntùm ngô z'a na' nsaṅlaṅ bwe fà Abraham, Isak mba Yakob là. 25Yosèf #Netu. 13.19; Yosh. 24.32; Héb. 11.22ghù bon Israél kàn mfe ndù bo nsi lo' mvôg mi tum yi Egipto ndùse Nsi a' se' lôte yub là.

26Yosèf be kwù ndù a tswe ngu'njù mén bùm nkù. Bo se' fe i ndù k'a bi, njab mum koṅ mà Egipto.

Currently Selected:

Neto'te 50: BMa

Highlight

Copy