Netume Ju z'a ntùm bwe là
Ju z'a ntùm bwe là
“Me b'a Tshùaben Nsi o, a b'a me na' mbèn nsô o dù' z'o be kuan bwe Egipto là.” Men ntshob li mi a b'a mi tanjoṅ ntùm ṅwa'ni Netume là, ke nda'te à ju ze Netume be yi là (20.2). Netume — nelo nène b'a ju tanjoṅ z'a be ntùm bwe là: Nsi b'a Ngayôg ben tse. Mbèn mbe, men ntshob li b'a dù' ze ntshù' Nsi gham taṅ nga bwe là. Nsi z'a b'a Nsi nkôni là, sô ba Israél ndà kuan, mbètte yub mbe bo kô i ntùm neju' ntshu i mbèn nze ntshù' mi.
Ngelaṅ ze ba Israél na' ntsho Egipto mfon dù' nelem tu yub bwe là (Neto' 45.17-20; 47.11), bo tswe bwe ngu'njù yàme mbèn njàm bwoṅ yube, là, mfen Egipto lo' yub ngù kuan yi. Nsi ke tshù nsi num nge' ze ba Israél ke njen nà, a tsho' mo' ta' mèn netèt bo, lén se Mosé, ndo' i ngù ngatshagte yub yi, yen nà be tôge, a tshùate num tsemo' manze nzenze boa ngù', a ghù ba Egipto kag ba Israél bo tum nène (1.1—15.21). Nsi be miagte neywimte ba Israél num kônkwa, ndo' yub ngù ben tse yi, ngù boa bo wat mo' kàn nswe num mbat Sinaï a bèn tswite ntshù' mi bo (15.22—18.27; 19.1—24.18). Ngelaṅ ze Mosé ke ndiag nekut dù' nele'te Nsi bwe là (kam 25.31), ba Israél faṅ manze Nsi, ntù' ke mbél à njam nsi neto ze bo lo' tùn nabte yi là. A tshùate ndùlala, ntù Nsi ya. Bo be miagte ṅwa'ni li, ndo' à tshô nekut Ndà Nsi, dù' ze Nsi ghù mbumte boa ben tse là miagte yi (kam 35—40).
Num njoṅ ngelaṅ fa, num njoṅ benntùn fa tse bo be ba kuan nà, yen ṅwa'ni li ke nda't'a mba bo num nsô mèn ndà kuan nà, yen nesô là ze Nsi num ngù benntùn tamte netèt bo mbèn ntamte boa Nsi là.
Currently Selected:
Netume Ju z'a ntùm bwe là: BMa
Highlight
Share
Copy
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.