Neto'te 49

Yakob naṅ mbotni num bon tse tse bandum ntu ntshob bàa gham

1Yakob tsiaṅ bon tse tse bandum ntshob bo ndù:

Bin kùmte me soṅ zin ju z'a nsi tum num bin

ntùm ntswe'njù mi a tshwèt nse' là!

2Bon Yakob tse bandum, bin bumte nju'u,

bin ju' ju ze tà zin Israél tshob là.

3Wù Rubèn tuswe àm,

yàm neta mba yàm mbwe ngù'.

O b'a mèn ndùb ntùm nku'ni, mbe mèn ndùb ntùm mba'.

4O be nswe mba ntse là,

là, o ke nsi tum ndà!

Nummb'o lo ko' num kunndà tàan;

tshù, o lo sagte kunndà sàm, nko' num bwe.

5Siméon bo Lévi b'a fètfèle,

mbi mub b'a tshuntshùag nefètte lem.

6Me ke nsi tsin nsi tsham bag à bo.

Me ke nsi te ku ntùm mbumte yub.

Nummbe bo be nzwite benntùn

ndùse bo ya ntù là.

Bo be nkù ntù nekag mfaṅ njam nku mfotmfô.

7Ndon tu yantù yub num njabnge' mi;

ndon tu tshùagntù yub num ntanta i.

Me nsi yabte yub mum ngô Yakob,

me nsi sate yub mum ngô Israél.

8Yuda, fèt tsho nsi ke nyàmt'o!

O nsi ghom ghakeban tsho à njam kekot bo;

bentàan tse bandum nsi vùte nsi mbwe o.

9Yuda #Nes. 24.9; Apok. 5.5b'a metshab mén ngwayit;

nshum àm, o fe ghom à nyàm.

A kab nsi, a nô nsi mba ngwayit là:

We z'a nànt'é k'a lo nsi à?

10Yuda nsi tshùb kôg fen,

tshùb kôg nesa' yi mfé' nku mi,

tà nkum ndùse mèn z'a be se nsi se' là.

Ngôngô nsi ju' ntshu yen mén nà.

11A taṅ metsit kekwèn i tun tù ndu',

ntaṅ mén kekwèn i ze mènnzwi num kaṅtù.

A be nsôg nzwe i ntùm ndu',

nsôg kummbaṅ se ntùm ndu'

mi bo tshab a tswe mba lem nà.

12Ndu' tshwèt nshùmte miag mi,

mbùn fôg nsô mi fa.

13Zabulon nsi tswe num nkaṅ dibantse,

a nsi ke zinte ntùm ba sitima,

ze ndù nèn tà nkum nze Sidon.

14Isakar b'a kekwèn ndù a dunte,

z'a nô netèt nka' nyàm bàa là;

15a yen ndù nefite be mebwô,

mba ndù ngô bwô;

a shù mvèn i nekwé lèt bwe,

ntù' nkuan, nke mfa' njôgmasi.

16Dan nsi tô ze nzwit mèn.

Nzwit Dan b'a be mo' nzwit bon Israél.

17Dan nsi be nyu num manze,

mbe swenyu num ntshagnze;

a nsi ke tshôg tunku nyàmdiaṅ ze

ngako' i nsi tum tam nsi njam njam nà!

18Tshùaben me ke nywint'a num yôg s'a fe wù là.

19Gad, ba fimntshu nsi lam i bume.

Là, tu wul i nsi tam njam bo yoṅ yube.

20Aser, a nsi ke dù' jujù mebwô.

A yi bèn ke fà jujù fenfen.

21Néftali, b'a kwinyàm se be mèn ke ta' i ngom nà.

A be mbwe shutnyàm. A be ntshob ntshob ntùn.

22Yosèf b'a metob tù num ta' tù,

metob tù num ta' tù s'a kaṅ ntse là.

Nkaṅ mi be nku'u, nsag nèn tù tà ntôg kum kàbngô.

23Bo kamt'é, bo tam i nkô,

ghama' nkét bàn i tà miagte;

24là ngoṅkél i ke' yab nsi,

neta ke mi num mbu mi;

yen nà fe à Nsi neta Yakob

yen nà b'a num lén Ngabéb mbwe z'a be ghuloṅ Israél là.

25Yen nà fe à Nsi tàan.

A bwô ndù a ywimt'o!

Yen nà fe a Nganeta Tshùate z'a yab kàn wù,

lèn kàn z'a fe mfe tù,

lèn kàn s'a ko' mà ntùm ntse,

lèn kàn s'a tum ntùm mbùn

mi a tum mum mbùn màm nà!

26Kàn se tàan yab ntù o là

tshùa mbat ts'a tswe matmat là boa

nkônga mi a be mbwembwe là.

A bwô ndù njoṅ men mfu' là fa be Yosèf,

yi ze mbom na' ntsho' i netèt fèt tse là.

27Benjamin b'a nzwimàntô z'a be nsé'te là;

a be mbe nkebnjù mfèt nyàm z'a ghom nà;

nke ngabte ntsha' ntsho tà nkum mfetnjù.

Mba Yakob kwù là

28Tshù tunndà Israél tse ntshob bàa gham nà. A b'a ju ze tà yub na' ntshob bo ndùs'a ke njab kàn bo là. A yab kàn bo, njab mba se kàn wù lo tù' i. 29A tshob nu bo, ntshob ndù: Bin nsi lo' àm nèn tshoṅ mbaṅ nzwit yag: Bin tshoṅ àm ntùm fi, mbaṅ tà tshàm, ntùm ngabloṅ z'a be ntùm fèn Efron ze Hétia là. 30Ngabloṅ #Net. 23.3-20nà b'a mà fèn z'a Makpéla, mbwe Mamré ntùm ngô Kanaan, fèn ze Abraham na' njun Efron, ze Hétia, num neghù dù' tufi sob yi là. 31Bo #Net. 25.9-10; 35.29tshoṅ Abraham mba nzwi i Sara à bwe; bo tshoṅ Isak mba nzwi i Rébéka à bwe; me lo bèn ntshoṅ Léa à bwe. 32Bo na' njun fèn mba ngabloṅ z'a be bwe l'a ba Hétia.

33Ndùse #Mfa' Gha. 7.15Yakob miagte netshob nu nshumnshum tse là, a lo' nku mi mbèn yi num kunndà, zwiag se keb, bo lo' i nèn ntshoṅ mbaṅ tà tse.

Currently Selected:

Neto'te 49: BMa

Highlight

Copy