Neto'te 48

Mba Yakob naṅ mbotni num bon Yosèf là

1Tshen nu là lo be tôge, mèn tshob Yosèf ndù: Tshù tàan nà z'a tshwèt ngon nà! Ndùlal'a lo' nshumnshum tse bàa, Manasé bo Efraim nèn bo à bo mbwe tàab Yakob. 2Mèn tshob Yakob ndù: Tshù nshum o Yosèf li z'a se' mbaṅ o là. Israél kùmte wul i, ndo ntswe netswe num kunndà.

3Ndùlala #Net. 28.13-14Yakob tshob Yosèf ndù: Nsi Nganeta lo ṅwag me Luz ngô Kanaan, njab kàn me. 4Ntshob me ndù: Tshù, me nsi ghù o bwe, nzwil o yàme; me nsi lo' o ghù bwoṅ ngô yi, fà yen ngô li nzwil o, a be yub ju ntsi'i. 5Fe ndonni bon tsho tse bandum bàa, ts'o bwe yub ngô Egipto kà me nse' mbaṅ o Egipto là b'a tshàm. Efraim bo Manasé b'a tshàm bon ndaṅndaṅ mba Rubèn bo Siméon nà. 6Là bon ts'o bwe yub njam tshen ni là b'a tsho. Bo nsi tshùa njam lén fèt tshob tsiaṅ yub num ntsi'i. 7Me #Net. 35.16-19lo be fe Padan, Rashél kwù mum mbu màm num manze, ntùm ngô Kanaan, a nke ntù' metsili me kum Efrata; me lo tshoṅ i bwe num manze Efrata, z'a be Bétléhém sènni là.

8Israél lôte nshumnshum Yosèf bàa, ntshob ndù: A b'a we li à? 9Yosèf bùnte tàab ndù: A nshumnshum tshàm tse Nsi fà me nsen ni là. Yakob tshob ndù: Me le't'o ndù o lo' yub nse' yi nsen ni, ndù me yab kàn bo.

10A lo be ndù ywèn à sènte miag mi k'a ke bèn neyene. Yosèf ghù bon tse kù'te nèn mbaṅ tàab, a tate yube, ntsiag yube. 11Israél tshob Yosèf ndù: Me lo ke bèn ndèn ndù me ghù nebèn njen o, là Nsi ghù me yen mba nzwil o. 12Ndùlala Yosèf sô yub neta' tàab nkwim ntunkekwi' mi nsi, nkab se i num tsha'a.

13Yosèf tshùb yub ntu tshob bàa, nte Efraim num bu i ze zwim, yen nà b'a ndù num bu Israél ze kwéb, nte Manasé num bu i ze kwéb, yen nà b'a ndù num bu Israél ze zwim, ngù bo kù'te nèn mbaṅ i. 14Là Israél nyit mbu mi, mfa, njab bu i ze zwim num tu Efraim z'a b'a ntù'njam nà, njab bu i ze kwéb num tu Manasé z'a b'a ntshùambwe là. 15A yab kàn bo ntshob ndù: A bwô ndù Nsi ze tà tshàm Abraham bo Isak ke nzin mbwe i là yab kàn tshen bonnshum ni. A bwô ndù Nsi z'a be Ngabéb àm fe lé'njù se me be tà nse' nkum sènni là yab kàn bo. 16A bwô ndù Angél z'a na' nsô àm mum nge' là yab kàn tshen bonnshum ni. A bwô ndù lén sàm, se tà tshàm Abraham bo Isak tshùa njam bo nju'ni. A bwô ndù bo bwe, njàm ntùm ngô!

17Ndùse Yosèf yen ndù tàab yab bu i ze zwim à num tu Efraim nà, nu tse ke bwô i; ndùlala, a tshùb bu tàab, ndé' i num tu Efraim neyab num tu Manasé. 18Yosèf tshob tàab ndù: A ke b'a ndùlala me tàa, yen mén ni bèn mbe ntshùambwe. Yab bu o ze zwim a num tu i. 19Là tàab gha, ntshob ndù: Nshum àm, me lène, faṅ nà, me lène. Mba yi ze nsi tù' ta' nzwit, tu wul i ze nsi ku'u; mba ndùlala ntù'njam i nsi be mèn ndùb tshùa i, nzwil i nsi b'a ngôngô yàme. 20A #Héb. 11.21yab kàn bo sen lé'njù là ntshob ndù: Israél nsi tshùa njam o kà yab kàn tshob ndù: Nsi ghù wù mba Efraim, mba Manasé là. Là, a bwôgmbwe njab kàn Efraim kà njab Manasé.

21Israél be miagte mbèn ntshob Yosèf ndù: Tshù, m'a' kwù. Bin à Nsi nsi tù' bèn mbe, a bèn ndo' zin mbèn yi ngô tà tsine. 22Me fà Sikém wù, ke ba fèt tsho. Me na' ndo' à ṅwi àm bo ngoṅkét sàm nkwé yi bu ba Amor.

Currently Selected:

Neto'te 48: BMa

Highlight

Copy