Neto'te 46

Yakob bèn mfon mén i Yosèf

1Israél lo' njoṅ tshu fa ts'a ghù là nène, nzin nkum Ber-Shéba mfà jule'te Nsi tàab Isak bwe. 2Nsi tshob Israél mum njem tèttswe' ndù: Yakob! Yakob! A bùnte ndù: Tshù me li! 3A tshob ndù: Me b'a Nsi, Nsi tàan. Kà bwôg neswe' nèn mà Egipto, nummbe me nsi te o mà bwe mba ngô ndùb là. 4Tu wul àm bag wù nsi swe' nèn mà Egipto, tu wul àm, me nsi lo' o ko' yi mà bwe. A b'a kua' Yosèf nsi bèn fi miag mu.

5Yakob lo Ber-Shéba; bon Israél yab tà yub Yakob boa bon mba zwi tshob mum nkalig mi Faraon na' ntum nelo' nket yub yi là. 6Bo #Mfa' Gha. 7.15lo' nyàm tshob boa tshu tse bo ghù ntùm ngô Kanaan nà; tshù mba Yakob tsho mà Egipto mba njoṅ ze nzwit fa là. 7A tsho Egipto boa bon tse tse bandum mba bon bon tse tse bandum, bon tse tse bènnzwi, ngonngon bon tse tse bandum boa njoṅ ze nzwit fa.

8Tshù ndèn nshumnshum Israél tse bo tsho Egipto, yen nà b'a ndù nshumnshum Yakob li:

Tuswe Yakob b'a Rubèn. 9Bon Rubèn tse bandum: Hénok, Palu, Hétsron, Karmi.

10Bon Siméon tse bandum: Jemuel, Jamin, Ohad, Jakin bo Tsokar: ngù Saul, nshum ngon Kanaan.

11Bon Lévi tse bandum: Guershom, Kehat bo Mérari.

12Bon Yuda tse bandum: Er, Onan, Shéla, Péréts bo Zarak, là, Er bo Onan lo kwù mà ngô Kanaan. Tse bon Péréts tse bandum: Hétsron bo Hamul.

13Bon Isakar tse bandum: Tola, Puba, Yob bo Shimron.

14Bon Zabulon tse bandum: Seréd, Elon bo Jahleel.

15Tshù bon bandum tse Léa bwe Yakob Padan-Aram, bo Dina mfèt yub ze mènnzwi là. Bon tse tse bandum boa tse bènnzwi lo tamte mbe benntùn ntshob tat ṅam ntat.

16Bon Gad tse bandum: Tsifjon, Haggi, Shuni, Etsbon, Eri, Arodi bo Areéli.

17Bon Aser tse bandum: Jimna, Jishva, Jishvi bo Béria mba Sérak mfèt yub ze mènnzwi. Tse bon Béria: Héber bo Malkiél.

18Tshù bon bandum tse Zilpa ze Laban na' mfà ngon i Léa na' mbwe Yakob là. Bo tamte mba benntùn ntshob ntôg gham.

19Tse bon Rashél, nzwi Yakob, tse bandum: Yosèf bo Benjamin.

20Asnat #Net. 41.50-52ngon Potiféra ngale'te Nsi z'a ke ntswe tusô On nà lo bwe Manasé bo Efraim Yosèf mà Egipto.

21Bon Benjamin tse bandum: Béla, Beker, Ashbél, Guéra, Naaman, Ehi, Rosh, Muppim bo Ard.

22Tshù bon bandum tse Rashél bwe Yakob là. Bo tamte mba benntùn ntshob kuà gham.

23Nshum Dan: Hushim.

24Bon Néftali tse bandum: Yattseel, Guni, Yetser bo Shilém.

25Tshù bon bandum tse Bila ze Laban na' mfà ngon i Rashél na' mbwe Yakob là. Bo tamte mba benntùn sammbàa.

26Benntùn tse boa Yakob swe' nèn mà Egipto ndù bo b'a lem tse là lo b'a benntùn ntshob ntôg ṅam ntôge, ke tùn zwi bon Yakob. Yakob lo ghù bon bandum bàa, ndù bo bwe yub à Egipto. 27Njoṅ #Mfa' Gha. 7.14ze tunndà Yakob fa z'a nèn mà Egipto là tamte ngù benntùn ṅam sammbàa.

28Yakob tum Yuda mbwe i, ndù a nèn ntshob Yosèf ndù a tshwèt nèn Gosen. 29Yosèf nabte kalig se, nko' bwe nèn Gosen nebumte bo tàab Israél. Ndùs'a yoṅ njen i là, a tsho' ngwù num tô i, ṅwate be kua' num tô i ngelaṅ yàme, ndù bo tat'é.

30Israél tshob Yosèf ndù: A be me kwù ndonni, nummbe me tam lag num o, o ke' à ntùn.

Yakob te la' mà Egipto

31Yosèf tshob fèt tse boa tunndà tàab ndù: M'a' nèn nsoṅ Faraon ntshob yi ndù: Fèt tshàm mba tunndà tàa z'a be ngô Kanaan nà se' nkum mbaṅ àm nsen ni. 32Tshen ben nà b'a ghabéb mbwe, nummbe bo be nkwiagte nyàm, bo lo' mbwe tshob boa nyàmna' tshobe, boa njoṅ tshu fa tse bo ghù là nse' yi. 33Ndùlala, ndùse Faraon nsi tsiaṅ zine, 34bètte ju ze bin ke mfa' là, bin bùnte yi ndù: Ghafa' tsho b'a ghakwiagte nyàm, fe ngelaṅ mônke' tà nkum sènni, ke b'a nda' bag, mba tà tshage. A nsi tshùa ndùlala bin tswe Gosen, nummbe njoṅ ba Egipto fa ke' be kô ghabéb mbwe.

Currently Selected:

Neto'te 46: BMa

Highlight

Copy