Neto'te 45

Yosèf ghù bo lèn i

1Ndùlala #Mfa' Gha. 7.13Yosèf ke bèn nku'ni netshùb ntù i mbwe njoṅ tse ben fa tse boa bo be là, a kua' ntshob ndù: Bin ghù njoṅ benntùn fa lo mbaṅ àm; sàm mèn ke bèn ntù' mbaṅ Yosèf ndùs'a ke nda'te wul i fèt tse là; 2a tshag nz'é tù, nkua'a, njoṅ ba Egipto fa ju', kà tshô i nèn nkum ntshwèt Faraon.

3Yosèf tshob fèt tse ndù: Me b'a Yosèf, tàa ke' à ntùn ké? Fèt tse ke ku'ni nebùnte yi, nummbe tu yub lo tshu'u, mba bo bèn njen i là.

4Ndùlala Yosèf tshob fèt tse ndù: Bin kù'te nse' mbaṅ àm, bo kù'te nèn mbaṅ i. A tshob ndù: Me b'a Yosèf, mfèt zin ze bin na' nswèn mà Egipto là. 5Là ndonni kà bin nywin ke bèn nja ntù mba bin na' nswèn àm ndù bo se' me nsen ni là, nummbe Nsi na' ntum àm mbwe bin à ndù me yôg zine. 6Tshù, a ndonni ngu'njù bàa mba nziku' se ka mum ngô là, a nke ntù' ngu'njù tàn ze fa' nedù' tsha' bo netsho' tshu ke nsi be là. 7Nsi lo tum àm mbwe bin ndù me ghù bin tswe ntùm ngô, mba ndù me tshùa njam netshu' ze ndùb njôg zine. 8Ndùlala, a ke b'a bin na' ntum àm nsen ni, là Nsi. A lo yab àm mba tà Faraon nà, mba tshùaben tunndà i là, mba ngomna là ntùm njoṅ ngô Egipto fa.

9Bin #Mfa' Gha. 7.14nànte nko' nèn mbaṅ tàa. Bin nsi tshob yi ndù: Tshù mba nshum o Yosèf tshob li: Nsi yab àm mba tshùaben njoṅ ngô Egipto fa là; swe' nse' mbaṅ àm, kà tsin! 10O nsi tswe mum ngô Gosen, dù' z'o nsi ghebte mbaṅ àm nà, tu wul o, bon tsho tse bandum, nyàm tsho tse nke'nke' boa tse ndùbndùb, boa njoṅ tshu fa ts'a b'a tsho là. 11O nsi be bwe, me ke ntomt'o, nummbe ngu'njù nziku' ke' à tàn, ndùlala ndù k'o bwoṅ, tu wul o, tunndà mba njoṅ tshu fa ts'a b'a tsho là.

12Tu wut tsin lo' kua' miag min njen yi, mba mfèl àm Benjamin yen ndù a kua' tu wul àm ke ntshob bin. 13Bin soṅ tàa njoṅ ghamte fa ze me be ntùm bwe mà Egipto là, mba njoṅ tshu fa tse tu wut tsin yen nà; bin nànte ndo' tàa nse' yi nsen ni.

Bo tsiaṅ Yakob mà Egipto

14Yosèf tsho' ngwù num tô mfèl i Benjamin ntu tshob bàa fa tate nke nkua'a. 15Yen ni be tôge, a tate njoṅ fèt tse fa, tsiag yub nke nkua'a. Yen ni be tshùa boa fèt tse tshobte. 16Tshô zin nkum ntshwèt Faraon ndù fèt Yosèf se'e! Yen nu là bwô Faraon be ndaṅndaṅ mb'a bwô ghafa' tse là. 17Faraon tshob Yosèf ndù: Tshob fèt tsho ndù bo kut tshu num ba nyàm, mbèn njam ngô Kanaan. 18Tshob bo ndù bo mbe se' bo lo' tà yub, tunndà tshobe nse' mbaṅ àm, me nsi fà dù' tsha' ntùn z'a Egipto là bo, bo tete bwe, nke njù nzit ngô.

19Tshob bo yu tu wut ndù bo lo' nkalig Egipto num bon tshob mba zwi tshobe, mbèn nket tà yub mbèn njam nsen ni. 20Kà miag min ghe'te ju ze bin faṅ njam nà, nummbe njoṅ ju mebwô fa ntùm ngô Egipto nsi be zine.

21Bon Israél ghù ndùlala. Yosèf fà nkalig bo mba Faraon tshob là, mfà mba jujù nze bo. 22A fà nzwe nebate mo' yi mba we lo, là mfà nkàb nkù tat bo nzwe nebate mo' yi Benjamin tàn. 23Yosèf tum kekwèn tàab gham ndù bo ket mbwômbwô tshu ts'a Egipto là, mba zwi kekwèn gham ndù bo ket nsa, ngefele bo jujù nze tàab. 24A lé'te fèt tse bo nèn, a tshob bo ndù: Kà bin kam ntanta num manze.

25Bo lo mà Egipto nko' nèn nkum ngô Kanaan mbaṅ tà yub Yakob. 26Bo soṅ i ntshob ndù: Yosèf b'a ntùn, a bèn mbe ngomna ntùm njoṅ ngô Egipto fa! Ndùlala ntù Yakob tum, nummb'a lo ke ke mbam ju bo tshwèt ntshob là. 27Là, bo soṅ i njoṅ ntshob fa mi Yosèf tshob bo là, tu wul i bèn njen nkalig mi Yosèf tum a se' nkel i là; yen ngelaṅ nà ntù tà yub Yakob bèn nto' netame. 28Israél tshob ndù: A ku'u! Mén àm Yosèf ke' ntùn, m'a' nèn nte lag num i kà nkwù.

Currently Selected:

Neto'te 45: BMa

Highlight

Copy