Neto'te 44

Bo te nu tu Benjamin mb'a yi i

1Yosèf tshob ngalôte ndà ndù: So jujù mum mbàm bandum nà njoṅ ze bo ku'ni neket là, mbèn njab nkàb mba we lo ntshu ze bàm. 2O nsi yab mba ntu' àm, ntu' ze bo lo' tùn nkàb nabte yi là ntshu bàm kebatnjab bo ze nkàb nsa. Ngalôte ndà ghù mba Yosèf tshob yi là.

3Ngelaṅ njù làn nà, bo sô tshen ben ni boa kekwèn tshobe, ndé'te yube. 4Ndùse bo yoṅ ntum ntùm ngô, ke yoṅ nèn ngùanesà là, Yosèf tshob ngalôte ndà ndù: Lo nsi, yoṅ tshen bandum nà, ngom yub ntshob bo ndù: Numke bin ndo' nukebwô njagte numebwô yi à? 5A ke b'a ju ze tàfa' àm be nu ntùm bwe mbèn nke ntshaṅ ngàm yi li ké? Bin ghù a bag, mba bin ghù ndùlala là.

6A kote yube, ntshob men ntshob là bo. 7Là bo bùnte ndù: Numke tshùaben àm nke ntshob men lèn ntshob li ndù à? Nga yag, ghafa' tsho ke' ghù tshob mo' ju ndùlala! 8Nkàb ze bag na' njen ntshu mbàm mag là, yen ndù bag lo lo' mfe yi ngô Kanaan, nse' yi! Be bag bèn nj'é nkàb ke gol lo ntùm ndà tàfa' o à ndùke? 9Mba we lo netèt ghafa' tsho z'o nsi tèt ju mbit yi là, mba bo nsi zwi i, tu wut tshag bèn ntù' kuan tshùaben àm. 10A tshob ndù: A bwô ndù fe neto'te ndonni njoṅ nu fa b'a mba bin tshob là! Mba we lo ze bo nsi tèt ju mbit yi là, nsi tù' nkuan àm, tu wut tsin tum tsin bwe! 11Bo nànte, mba we lo te ze bàm nsi, nga't'é be ze tu wut. 12A ta' mbàm mube, nto' num ze ntshùambwe nèn miagte num ze kebatnjab, mbe se' bàm Benjamin ntèt ntu' bwe. 13Ndùlala bo fagte nzwe tshobe, mba we lo bèn nkut tshu num kekwèn bo bèn njam ntùm ngô.

Yuda kwé nu Benjamin ngù ze yi

14Ndùse Yuda boa fèt tse tsho ndà Yosèf là, Yosèf ke' à be ndà, bo vùte nsi mbwe i num tsha'a. 15Yosèf bètte yub ndù: A ke lèn nu li ze bin ghù à? Bin ke' lèn ndù mènntùn mba me là ku'ni nelèn nu ndamnjù ké? 16Yuda bùnte ndù: Ke ze be bag tshob tshùaben à? Be bag tshob à ndùke nelo' nkwé nta wut yag yi à? Nsi yen nukebwô ghafa' tsho. Ndonni a bwô ndù bag tù' kuan tshùaben àm bag à mén ze bo fon ntu' bàm i là. 17Là Yosèf tshob ndù: Yen nkwate là nèn ngùanesà mbaṅ àm. Mén ze bo fon ntu' bàm i là, a yi bèn tù' nkuan àm. Mbe se' mba bin nà, bin bèn njam ntèt tà zin ntùm fite.

18Yuda kù'te nèn mbaṅ Yosèf, ntshob yi ndù: Tshùaben àm, mba mb'o b'a mba Faraon nà, ko ndèn ngafa' o, mbam ndù a tshob ta' ntshob ntshù' toṅ o; kà bam ndù yantù o lo nsi num àm. 19Tshùaben lo bètte ghafa' tse ndù: Bin ghù tà ke mfèt lo ké? 20Bag bùnte ndù: Bag ghù tà ndù a ywène; bag ghù mfèle, mén z'a bwe à mum ywèn nà, mfèt yen mén nà lo kwù, a tù' màab à tù' i. Tàab be nkô i. 21O lo bèn ntshob ghafa' tsho ndù: Bin lo' i nse' yi mbaṅ àm me tam lag num i. 22Bag lo tshob tshùaben ndù be mén nà ke lo mbaṅ tàab, nummb'a lo mbaṅ i mb'a b'a kwù. 23Tu wul o lo tshob ghafa' tsho ndù: A be ze bin à kebatnjab zin ke' bèn nswe' là, mba bin ke nsi bèn yen se àm!

24Ndùlala, ngelaṅ bag ko' nèn mbaṅ ngafa' o, tà yag, nsoṅ i ntshob tshùaben nà, 25tà yag tshob ndù: Bin bèn njam njun mo' ze be metsit jujù. 26Là bag lo tshob yi ndù: Be bag ke swe', a be ze kebatnjab ke' nèn bag à bo là; nummbe bag ke' ku'ni neyen se mandum nà, a be ze bag à kebatnjab ke' bèn mbe là. 27Ndùlala ngafa' o tà yag tshob bag ndù: Bin lèn ndù nzwi àm lo bwe bonnshum me bàa. 28Mo' lo lo mbaṅ àm nène, mo' tshùagkèt nyàm kebt'é mfémfé, nummbe me ke' bèn njen i tà nkum sènni. 29A be ze bin bèn ndo' mba yen ni nèn yi ngùanesà num miag màm, mo' ju tsho ngù i là, mba me nsi kwù à zwe, me ze me be njwèn mèn nà.

30Ndonni, a be ze bag bèn njam ke be ndù bag à mén z'a be njab ntù i num i bèn mbe là. 31Mb'a nsi yoṅ be yen ndù bag à bo ke bèn mbe kwù. A be ndùlala, mba ghafa' tsho ghù ngafa' o, tà yag kwù à zwe, yi z'a be njwèn mèn nà. 32Ngafa' o me lo lo' wul àm nte tshwèt yi num tu mén ni mbwe tàa ntshob ndù: A be ze me ke' lo' i nse' yi là, mba me nsi be ngafànnu mbwe tàa njoṅ ngelaṅ fa me be ntùn nà. 33Ndonni, a bwô ndù ngafa' o me ghô num ze tu mén nà, ndù a ko' nèn boa fèt tse. 34Be me ko' nèn mbaṅ tàa ke be ndù bag mén nà bèn mbe à ndùke? Me ke' kô nelo' lag sàm njen nge' z'a nsi tsho num tàa là yi.

Currently Selected:

Neto'te 44: BMa

Highlight

Copy