Neto'te 39

Yosèf ju Potifar mà Egipto

1Bo lo' Yosèf nswe' nèn yi mà Egipto; Potifar, tàndà ntsho Faraon, z'a be mfen ghabéb ntshwèt, mbe ze Egipto là, jun Yosèf ba Ismaél tse bo lo' i nèn yi mà Egipto là. 2Tshùaben #Mfa' Gha. 7.9nke mbe bo Yosèf, nke ngù a njôg ntùm fen; a nke ntswe mum ndà tàfa' i ze Egipto. 3Tàfa' yen ndù Tshùaben lo ke mbe bo Yosèf, mba ndù tshu tse ts'a be ntùm mbu mi là lo ke nèn mbwe, mba ndùke lo z'a kô nefa' ju là. 4Yosèf tum ngafen num miag tàfa' i, a yab i mum fa' se, njab i ngalôte ndà i, ndem njoṅ tshu fa ts'a ghù là yi.

5Ndùse Potifar yab Yosèf ngalôte ndà i boa njoṅ tshu tse fa là, Tshùaben tshùa num tu Yosèf naṅ mbotni mum ndà ze Egipto mba num njoṅ tshu tse fa ts'a ghù là; mbotni Tshùaben be num tshu fa ts'a ghù là, ts'a be mum ndà là mba ts'a be mà tshwèt là. 6Potifar faṅ njoṅ tshu fa ts'a ghù là mum mbu Yosèf, ke bèn nke ngùtni num sàm ju k'a ke nda' nebètte ze jujù. Yosèf lo ghù ntsewut mebwô mba se z'a bwô là.

Yosèf bo nzwi tàfa' i

7Tshen nu li lo be tôge, nzwi tàfa' Yosèf te lag num i, ntshob ndù: Be be! 8A gha, ntshob nzwi tàfa' i ndù: Yen ndù bag tàfa' àm ke' be soṅte sàm ju num tshu ts'a tshwèt ntôg mum ndà là; a bèn ndem tshu ts'a ghù là ntùm mbu màm! 9A ke' tshùa àm ntùm yen ndà li, ke bèn nke nga sàm ju me, kà ntag nda' tu wul o, nummb'o b'a nzwi i. Be me ghù tshàm yen lèn nukebwô ndùb li, mfàn nu num miag Nsi à ndùke? 10Mba mb'a ke ntshob yi njoṅ lé'njù fa là, Yosèf gha nenô mbaṅ i, mbe bo yi. 11A lo be mo' lé'njù, Yosèf tsho ndà num se fa', sàm mèn netèt ghandà ke be nsi, 12nzwi tàfa' i tshùb i num nzwe i, ntshob ndù: Be be! Yosèf kag nzwe i bu i, nkù ntum nèn njù.

13Ndùs'a yen ndù a kag nzwe i yi nkù ntum nèn njù là, 14a tsiaṅ ba ndà, ntshob bo ndù: Tshù là, ndu àm lo nèn ndo' meze Héber ndù a se' nke nyiaṅte njam nku be. Mandum nà se' mbaṅ àm ndù bag yi be; là me tshag nz'àm tù. 15Mb'a lo nju' me tshag nz'àm tù, nkua' là, a kag nzwe i mbaṅ àm nkù nèn njù. 16A yab nzwe Yosèf mbaṅ i tà nkum ndùse tàndà bèn njam ndà là. 17Ndùlala, a tshob Potifar ndù: Nkuan, mén Héber z'o lo' nse' yi bag là, lo nse' mbaṅ àm, nenyiaṅte njam nku màm. 18Mba me lo ntshag nz'àm tù nkua' là, a kag nzwe i mbaṅ àm nkù nèn njù. 19Mènnzwi là tshob ndu i ndù: Tshù tshu tse nkuan o ghù me là. Ndùlala tàfa' Yosèf be miagte neju' ntshob mi nzwi i tshob yi là, ngù mà yantù ndùb num Yosèf. 20Ndùlala Potifar lo' Yosèf ma' ndàtsha dù' ze tse ghandàtsha mfen ke mbe là. A tsho tsha yen dù' là.

Yosèf ndàtsha

21Tshùaben #Mfa' Gha. 7.9nke mbe bo Yosèf, ngù bwôntù ze ndùb num i. Tshùaben ghù a ghù fen mbwe ngabéb ndàtsha. 22Ngabéb ndàtsha ghù Yosèf nke ndôte njoṅ ghandàtsha fa tse bo be tsha là; sàm ju ke be tôg ke be ndù Yosèf bèn ntshobe. 23Ngabéb ndàtsha lo ke be te lag num se fa', nummbe Tshùaben lo ke mbe bo yi, nke ngù mba ke lo z'a to' là vù lag.

Currently Selected:

Neto'te 39: BMa

Highlight

Copy