Neto'te 40

1Tshen nu là lo be tôge, ngama' ndu' mfen Egipto bo ngana bàn i fàn nu mbwe tàfa' yub mfen Egipto.

2Faraon ya ntù tshen ghafa' bàa li, mfen ghama' ndu' bo mfen ghana bàn. 3A ghù bo ghom yub ma' ndà, la' mfen ghabéb ntshwèt, ntùm ndàtsha dù' ze bo fùn Yosèf bwe là. 4Mfen ghabéb ntshwèt, fà yub Yosèf ndù a ke mfa' bo; bo tswe ntùm ndàtsha mo' mén ngelaṅ.

Yosèf bagte njem ghandàtsha bàa

5A be mo' tèttswe', ntu tshob bàa fa, ngama' ndu' bo ngana bàn mfen Egipto, zi njem ntùm ndàtsha dù' ze bo fùn yub là; mba we lo ghù ze lèn njem, mbagte ntun mi ke be ju ntshù'. 6Yosèf nèn mbaṅ bo nkebnjù lôte yube, mbe tèt yub bo nke ntshù kebwô. 7Ndùlala, a bètte tshen ghafa' Faraon nà tse bo à bo be ntùm ndàtsha tàfa' i là, ntshob ndù: Numke bin nke ntshù kebwô sènni à? 8Bo bùnte yi ndù: Mba we lo netèt bag zi njem, mèn z'a tote ntun mi bag là ke be. Yosèf tshob bo ndù: A ke b'a nda' Nsi bèn nke ntote njem ké? Bin soṅ àm njem zin di!

9Mfen ghama' ndu' soṅ Yosèf ze njem ntshob ndù: Tshù, me lo njen mo' tù ndu' mbwe àm ntùm njem; sen tù ndu' là ghù nkaṅ mi ntat. 10Ngelaṅ z'a te' là, a sàm, nsàm mi gha'te, mfà tsha tse, a tswe. 11Ndô Faraon lo mbe ntùm mbu màm, me lo' ntàm tù ndu' nyi naṅ ntùm ndô Faraon, mfà ndô ntùm mbu mi.

12Yosèf tshob yi ndù: Tshù mbagte ntun mi li. Nkaṅ tù ntat b'a lé'njù tat. 13A tù' lé'njù tat Faraon bèn mbù' o tù, njab o num fa' so; o nsi bèn fà ndô ntùm mbu mi mb'a na' mbe matnu wù, ndùs'o na' mbe ngama' ndu' i là. 14Là, kwimt'àm ngelaṅ z'o nsi tswe mebwô là; me le't'o la'te bwôntù num àm; tshob nu ntùn num àm mbwe Faraon, ngù me tum ntùm yen ndà li. 15Tshù, bo na' ndo' àm à ntùm ngô ba Héber, mba nsen ni bo ma' àm ndàtsha ke be ndù me ghù sàm ju.

16Mfen ghana bàn be yen mba Yosèf bagte ntun njem mebwô là, ntshob ndù: Tshù, me lo yen yàm nkesoṅ bàn ntat tu àm, ndù bàn nefôg be ntùm bwe. 17Bon nzenze jujù Faraon tse bo kate là lo be ntùm kesoṅ s'a be num tù là. Bon nsaṅ se' njù njoṅ i fa be num tu àm. 18Yosèf bùnte ntshob ndù: Tshù mbagte ntun mi li: Nkesoṅ bàn ntat b'a lé'njù tat. 19A tù' lé'njù tat, Faraon ghù bo tsho' tu o, a ghù bo taṅ wul o num mo' tù, bon nsaṅ se' mfèt mbàb o.

20A lo be mbatte lé'njù tat, lé'njù se bo bwe Faraon nà be, a jù jùa boa njoṅ ghafa' tse fa; a bù' mfen ghama' ndu' tù mba mfen ghana bàn netèt ghafa' tse: 21A yab mfen ghama' ndu' num fa' nema' ndu' ndù a ke mfà ndô mum mbu Faraon. 22Là ngù bo taṅ mfen ghana bàn tù, ndaṅndaṅ mba Yosèf tote ntun njem bo là.

23Mfen ghama' ndu' tsho ndag Yosèf, ke bèn nekwimt'é tse.

Currently Selected:

Neto'te 40: BMa

Highlight

Copy