Neto'te 17

Lén Abram kaṅ ntù' Abraham

1Ngelaṅ ze Abram kum ngu'njù ntshob bwe'e ṅam bwe'e là, Tshùaben ṅwag mbaṅ i ntshob yi ndù: Me b'a Nsi Nganeta ntshùate, ke nzin mbwe àm, mbe kelo'. 2Me nsi ghù be wat kàn netèt be, me nsi ghù nzwil o yàm nga' mbu.

3Abram vù nsi kabkab, Nsi tshobte bo yi, ntshob ndù: 4Tshù kàn se me wat bag wù li: O nsi tù' tànjam ngôngô yàme. 5Bo #Rom. 4.17ke bèn netsiaṅ o Abram, là lén so tù' b'a Abraham, nummbe me nsi ghù o tù' tànjam ngôngô yàme. 6Me nsi ghù o bwe bon neshu; tsemo' netèt bo nsi tù' fenfen. Ngô yàm nsi tum num o. 7Me #Luk. 1.55nsi wat kàn bag wù, wat kàn bag nzwil o, ndùlala num ngu'ngu', kàn sen nà tswe matmat, ndùlala ndù me be Nsi o mba ze nzwil o. 8Me #Mfa' Gha. 7.5nsi fà ngô z'o be ngùn ntùm bwe là wù bin nzwil o, boa njoṅ ngô Kanaan fa, a tù' yu matmat. Me nsi be Nsi zin.

9Nsi tshob Abraham ndù: A bwô ndù o ze kàn sàm, mba nzwil o bèn nz'é, num yub zwiaṅ njù. 10Tshù #Mfa' Gha. 7.8; Rom. 4.11kàn se bin nsi ke ze netèt bin, wù bin nzwil o li: Bin a' ke si ket njoṅ bon bandum fa. 11Bin ghù bo si ngub ntshu ket sine. Yen nà b'a keki kàn s'a be netèt be là. 12Mén mandum nkum lé'njù fom netèt bin bo si ket se; bin ke ngù ndùlala num njoṅ zwiaṅ njù fa; k'a b'a kuan tse bo bwe yub ntùm ndà ke tse bo jun yub ntshùanze lo, 13mb'a bwô ndù bo si ket se. Bo nsi tshebte kàn sàm mum mbàb wut zin, nedù a tù' kàn s'a tswe matmat là. 14Kesiket, mén mandum ze bo ke' si ngub ntshu kel i là, bo nsi sô yen mén nà netèt fèt tse; nummb'a bagte kàn sàm.

15Nsi tshob Abraham ndù: O ke bèn ntsiaṅ nzwi o ndù Saraï, là lén se tù' b'a Sara. 16Me nsi yab kàn yi, tshùa mba njam i ze fà mén mandum wù. Me nsi yab kàn yi, a tù' màa ngôngô. Fenfen ngôngô nsi tum netèt nzwil i. 17Abraham vù nsi kabkab nzwi i, ntshob ntùm ntù i ndù: Be mandum z'a ghù ngu'njù nkù là bwe mén mandum ké? Be Sara z'a ghù ngu'njù ṅam bwe'e là bèn mbwe ké? 18Abraham tshob Nsi ndù: A bwô ndù o kabte Ismaél. 19Là Nsi bèn ntshob ndù: A ke b'a ndùlala! Kua' nzwi o Sara nsi bwe mén mandum wù, o yab lén se ndù Isak. Me nsi wat kàn bag yi, wal à kàn s'a tswe matmat là, mba bag nzwil i. 20Mbe se' mba Ismaél là, me ju' mb'o tshob là. Me nsi yab kàn yi, ghù a bwe, bon tse yàm nga' mbu. A nsi bwe ben ndùbndùb ntshob bàa gham, me lo' i ngù tànjam ngô ndùb yi. 21Me nsi wat kàn bag Isak ze Sara nsi bwe wù là be num sen lé'njù li ngumo'. 22Ndùse Nsi miagte netshobte bo Abraham nà, Nsi lo mbaṅ Abraham nène.

23Ndùlala Abraham lo' mén i Ismaél boa njoṅ benntùn fa tse bo bwe yub ndà i là, njoṅ ts'a lo' nkàb i njun yub yi là; nekebte b'a ndù a lo' njoṅ bon bandum fa, nsi ngub z'a ntshu ket bo là num sen lé'njù là, ndaṅndaṅ mba Nsi na' ntshob yi là. 24Bo lo be si ngub ntshu ket Abraham ndù a ghù ngu'njù ntshob bwe'e ṅam bwe'e, 25nshum i Ismaél ghù ngu'njù ntshob tat gham. 26Be num sen lé'njù là bo si ket Abraham bo nshum i Ismaél. 27Bo si ket njoṅ bon bandum fa ntùm ndà i, tse bo bwe yub mum ndà boa tse bo lo' nkàb njum yi mo' ntshùanze là.

Currently Selected:

Neto'te 17: BMa

Highlight

Copy