Neto'te 18

Nsi bù mén mandum Sara

1Tshùaben ṅwag Abraham bam ntù mbwe' mi a be Mamré là. Mbe be ndù Abraham tswe ntshu ntàb nke njôg nyam mbwôgtshù. 2A #Héb. 13.2bù' miag mi, njen benntùn tat ndù bo tsinte ngelaṅ mbaṅ i. Ndùs'a yen yub là, a lo ntshu ntàb nkù nde nèn mbumte boa bo, ngwù nsi num tsha'a, 3ntshob ndù: Tshùaben àm, a be ze me b'a ngafen num miag mu là, kà nànte ntôg ngafa' o me ntshùa nène. 4Bin bam ndù bo fà metsit ntse bin sôg nku min yi, mbèn mfite tun sen tù li; 5mba ndù me nèn ndiag metu' bàn bin jù ndo' ntshùbte ntù zin yi kà nèn mbwe, mba bin tshùa mbaṅ ngafa' zin me là. Ndùlala bo tshob ndù: Ghù mb'o tshob là. 6Abraham nànte nèn mbaṅ Sara mum ntàb ntshob yi ndù: Lo' bon nkesoṅ mbab bàn ntat, na bàn yi. 7Abraham tshob ndùlala nkù nde nèn netèt nyàm tse ndo' mén mfô z'a tshote mbèn mbwô là, nse' mfà ngafa' i. Yen mén ni nànte na ndende. 8A lo' mbùn nyàm mi a kut là, mi ntsentse boa mén mfô ze bo na là, ntamte nte njoṅ i fa mbwe bo, mbèn ntsin tù mbaṅ bo tun tù. Bo jù jujù.

9Bo bètte Abraham ndù: Sara nzwi o yà? A bùnte ndù: A b'a mum ntàb. 10Ngùn #Rom. 9.9bèn ntshob ndù: Me nsi bèn se' la' o ngumo'. Ndùlala nzwi o Sara nsi ghù mén mandum. Sara tswe mum ntàb z'a njam i là, nke nju'u. 11Abraham bo Sara lo ywène, ngu'njù tshob nèn mbwe neshu. A lo be be ndù Sara ke' bèn neyen ṅwù. 12Sara #1 Pét. 3.6zwi ntùm ntù i, ntshob ndù: Ndonni ze m'a ywèn nà, be me bèn ndèn mbwô ju ké? Mba kua' ndu àm a ywène. 13Tshùaben tshob Abraham ndù: Numke Sara nzwi à? A tshob ndù: Be kua' me li bèn mbwe ndonni ze me ywèn nà ké? 14Mo' #Luk. 1.37ju ze b'a tshùa Tshùaben nà num bwe ké? Be kua' num sen lé'njù li, num yen ngelaṅ njù li, me nsi bèn se' mbaṅ o, me nsi be se' ndù Sara ghù mén mandum. 15Sara gha ntshob ndù a ke' zwi, nummb'a lo bwôge. Tshùaben tshob yi ndù: Nga me tshen, o zwi kua' nenùne.

Abraham le'te Nsi num tu ngô Sodom

16Benntùn nà lo nsi nsen nà, nèn nze mà Sodom. Abraham nèn tshag yube. 17Tshùaben tshob ntù i ndù: Be me lem Abraham ju me nsi ghù là ké? 18Abraham a' tù' tànjam ngô mba ze neta. Bo nsi tshùa à njam i kà yab kàn njoṅ ngôngô fa nsitsha'a. 19Nummbe me lo tsho' i, ndù a tshob bon tse tse bandum boa njoṅ tunndà i fa ndù bo tù' nke nzin num manz'àm, nke ngù nunetsin bo ze ndaṅndaṅ. A nsi tshùa ndùlala ju ze me Tshùaben na' mbù Abraham nà bumte. 20Ndùlala Tshùaben tshob ndù: Tshu'te z'a be num nu Sodom bo Gomora là yàm neshu! Nukebwô yub bèn mbag neshu! 21M'a' swe' nèn njene, a be ze tshu'te z'a be nse' mbwe àm b'a ndaṅndaṅ mba ngùninu mub be là. A be z'a ke' b'a ndùlala là, mba me nsi lène.

22Benntùn nà lo nsen nà, nèn nze mà Sodom. Abraham ke' be mbwe Tshùaben dù' z'a tsin nà. 23Abraham kù'te nèn mbaṅ Tshùaben ntshob yi ndù: Ndùlala o nsi biagte mèn netsin bo mèn kebwô ké? 24Mo' ndù be ben netsin be num ngô ntu ṅam ntàn. A be Ndùlala mb'o nsi biagte yube, ke ko ndèn ngô num tu ben netsin tse ṅam ntàn tse bo num bwe là ké? 25Nga, be lèn yen nkwate là ke be ntù o, b'o ke bam ndù mèn netsin bo mèn kebwô vù ntùm nkù ntshù'. Ngatsho'te njoṅ njù nsitsha' fa nsi ghù nunetsine. 26Tshùaben bùnte ndù: A be ze me tèt ben netsin ṅam ntàn mà Sodom nà, mba m'a lagte njoṅ ngô fa num tu bo.

27Abraham bèn ntshob ndù: Me ze me be mbabe, mbe bwembwôg là fèn ntù netshob nu Tshùaben àm. 28Là, mo' ndù a nèn num ben netsin ṅam ntàn tse tàn tsi. A be ndùlala mb'o nsi bagte ngô num ben tàn ké? Tshùaben bùnte ndù: Nga, a be ze me tèt ben netsin bwe ntshob tàn ṅam nkuà là.

29Abraham nèn ntshob mbwe ntshob ndù: Mo' ndù be ben netsin be bwe ṅam nkuà. Tshùaben tshob ndù: Mba me ke nsi ghù sàm ju, a be ze me tèt ben ṅam nkuà bwe là.

30Abraham tshob ndù: Kà Tshùaben àm ya ntù. M'a' bèn ntshob nu. Mo' ndù be a b'a ben netsin ṅam ntat. Tshùaben tshob ndù: Mba me ke nsi ghù sàm ju, a be ze me tèt ben ṅam ntat bwe là.

31Abraham bèn ntshob ndù: Me bèn mfèn ntù netshob nu Tshùaben àm. Mo' ndù be ben netsin ṅam mbàa bèn mbe bwe. Tshùaben tshob ndù: Mba me ke nsi bagte ngô num tu tshen ben ṅam mbàa là.

32Abraham tshob ndù: Kà Tshùaben àm ya ntù, m'a' bèn ntshob nu nda' yoṅ ntshù', a b'a miagt'é. Mo' ndù be ben netsin be bwe gham. Tshùaben tshob ndù: Mba me ke nsi bagte ngô num tu tshen ben gham nà.

33Tshùaben be miagte netshob nu Abraham, nèn tse. Abraham bèn njam la' i.

Currently Selected:

Neto'te 18: BMa

Highlight

Copy