Netume 4

Nsi la'te ngù' i Mosé

1Mosé bùnte ntshob ndù: Bo ke nsi bam ju ze me nsi tshob là, ke bèn nju' ntshu àm, nummbe bo nsi tshob ndù: Tshùaben ke' ṅwag wù. 2Tshùaben tshob yi ndù: Ke z'o tshùb bu o à? Mosé tshob ndù a b'a ta' kôg. 3Tshùaben tshob ndù: Ma' kôg num tsha'a. A ma' i num tsha' a kaṅ ntù' nyu. Mosé yen ndùlala mbènte tuntun. 4Tshùaben tshob Mosé ndù: Nyit bu o ntshùb i num nkun i. A nyit bu i ntshùb i, a bèn ntù' kôg mum mbu mi. 5Yen ni b'a neghù bo lèn ndù Tshùaben Nsi tà tshobe, Nsi Abraham, Nsi Isak, Nsi Yakob lo ṅwag wù. 6Tshùaben bèn ntshob yi ndù: So bu o ndàntù o! A so bu i ndàntù i, mbèn nsô; ndùlala nkin ṅab num bu i mfôg mba mbem nà. 7Tshùaben tshob ndù: Bèn nso bu o ndàntù o. A bèn nso bu i ndàntù i mbèn nsô. Ndùlala bu i bèn mbe mba mo' dù' wul i là. 8Tshùaben tshob ndù: A be ze bo ke' bam mbwe nsà, ke ju' ntshu là, mba bo nsi bam mbatte nsà bàa. 9A be ze bo ke' bam tshen nsà bàa là, ke ju' ntshu o là, mb'o nsi tu' ntse ntùm ta'ntse fètte num tsha'a; ntse mi o nsi tu' ntùm ta'ntse là nsi tù' lem num tsha'a.

Nsi lo' Aron ngom nkwébo Mosé yi

10Mosé tshob Tshùaben ndù: Netsho' Tshùaben, me ke' ghù ntshu nefùage, yen nà ke' b'a nu nkôg, ke lé'mo' lo, ke bèn njé't'a fe ndùs'o to' netshob nu ngafa' o me là; nummbe ntshu àm bo lém sàm lèt neshu; 11Tshùaben tshob yi ndù: We z'a fà ntshu mènntùn, ke nelo' i nkaṅ ketshob, mbu'ntoṅ, njennze ke mfùmiag lo yi à? A ke b'a me Tshùaben ké? 12Ndùlala, ndonni a bwô o nène, me nsi be bag ntshu o, tswit'o ju z'a bwô ndù o tshob là.

13Mosé tshob ndù: Netsho' Tshùaben, tum mèn z'o kô là. 14Ndùlala yantù Tshùaben kam num Mosé, a tshob ndù: mfèl o Aron mèn ntùm tunndà Lévi ke bwe ké? Me lèn ndù a nsi tshob nu a fùage. Tshù i là z'a tshwèt nse' mbwe o là, bin yi bumte, a yen o ntsiaṅte ntù i là. 15O nsi tshob nu fa yi, so ntshob ntshu i. Me nsi be bag ntshu o, mba ze ntshu, tswite zin ju z'a bwô ndù bin ghù là. 16A nsi tshob nu ngô num yu tu, be yu ntshu, o be mba ze Nsi là. 17Mbe se' mba sen kôg li là, tshùb i bu o! O nsi lo' i ghù nsà yi.

Mosé bèn njam mà Egipto

18Mosé lo mbèn njam mbaṅ ntse i Yétro ntshob yi ndù: Me le't'o ndù o faṅ me bèn Egipto ntèt fèt tshàm bwe, njen mbe ze bo ke' ntùn nà. Yétro tshob Mosé ndù: Nèn ntùm fite. 19Tshùaben tshob Mosé Madian ndù: Lo mbèn njam Egipto, nummbe njoṅ benntùn fa tse bo ke nya' tu o là kwù.

20Mosé lo' nzwi i boa bon tse, nte yub num kekwène, mbèn ntùm ngô Egipto. Mosé tshùb kôg Nsi bu i. 21Tshùaben tshob Mosé ndù: ndùs'o nsi bèn Egipto là, mb'a bwô o lèn ndù o nsi ghù njoṅ nsà fa tse me fà mum mbu mu là mbwe Faraon. Là, tu wul àm, me nsi kag sagntù ntù i, a gha nefaṅ yàm nzwit mèn nène. 22O nsi tshob Faraon ndù: Tshù mba Tshùaben tshob li: Tuswe àm b'a Israél. 23Me #Netu. 12.29tshob wù ndù o faṅ nshum àm nèn ngamt'àm. O gha nefaṅ a nèn à? Mb'a be ndùlala là, me nsi zwi tuswe o.

24Tshù, a lo be num manze, ndùs'a ke nzi là, Tshùaben se' ndende nkam Mosé ntanta, nke ndiag nezwi i. 25Séfora lo' mo' mfé loṅ, nsi ket nshum i yi, ndo' ntshoṅ ket nshum i nkwag Mosé yi, ntshob ndù: O be m'a ndu lem. 26Ndùlala Tshùaben kag i. Séfora ke ntshob mbe ndu lem à num nu nesi ket.

27Tshùaben tshob Aron ndù: Nèn bin Mosé bumte kônkwa. A nèn, nkot'é num mbat Nsi, nyô nge' mi. 28Mosé soṅ Aron njoṅ ntshob fa mi Tshùaben na' ntum i a nèn ntshob là, boa njoṅ nsà fa ts'a na' ntshob mb'a ghù là. 29Mosé bo Aron nèn ntse'te njoṅ ghakwé mbwe bon Israél fa. 30Aron bèn ntshob njoṅ ntshob fa mi Tshùaben na' ntshob Mosé là, ngù nsà mbwe ngô. 31Ngô bam yen nu là. Ndùse bo ju' ndù Tshùaben lo lo nsi netshètte ze njam bon Israél, mba ndù a yen nge' yub là, bo vù nsi kabkab, ngamt'é.

Currently Selected:

Netume 4: BMa

Highlight

Copy